ବରଗଡ଼ ଅଫିସ୍,୨୭।୩- ପରିବାରରେ କାହାକୁ କରୋନା ଭାଇରସ୍ ସଂକ୍ରମଣ କରି ନାହିଁ । କେହି ପରିବାର ସଦସ୍ୟ ରାଜ୍ୟ କିମ୍ବା ଦେଶ ଫେରନ୍ତା ନୁହଁନ୍ତି । ତଥାପି ଗତ ୨୨ତାରିଖରୁ ପରିବାର ସବୁ ସଦସ୍ୟ ହୋମ କ୍ବାରେଣ୍ଟାଇନରେ ରହିଛନ୍ତି । ଏଭଳି ସଚେତନତା, ସତର୍କତା ଅବଲମ୍ବନ କରିଥିବା ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ଯୋଖିପାଲି ଗ୍ରାମର ଯାଜ୍ଞସେନୀ ସାହୁଙ୍କ ପରିବାର ଲୋକେ ଏହି ସମୟରେ ଅନ୍ୟମାନଙ୍କ ପାଇଁ ଦୃଷ୍ଟାନ୍ତ, ପ୍ରେରଣା ସାଜିଛନ୍ତି ।
ଯାଜ୍ଞସେନୀଙ୍କ ପରିବାର କହିଲେ, ୪ପୁଅ, ୩ପୁତ୍ରବଧୂ, ନାତୁଣୀ, ନାତି ଏଭଳି ୧୬ଜଣ ଅଛନ୍ତି । ନାତି ଦିବସ କୁମାର ସାହୁ ବରଗଡ଼ ଜିଲା ଝାରବନ୍ଧ ବ୍ଲକ ତୁମୁରିପାଣି ପ୍ରକଳ୍ପ ଉଚ୍ଚ ପ୍ରାଥମିକ ସ୍କୁଲରେ ଶିକ୍ଷକତା କରନ୍ତି । ରାଜ୍ୟ ସରକାର ସ୍କୁଲ ବନ୍ଦ ଘୋଷଣା କରିବା ପରେ ସେ ଗାଁକୁ ଫେରିଛନ୍ତି । ଘରକୁ ସେ ଆସିବା ପରେ ନାତିଙ୍କ କଥା ରଖି ପରିବାର ଲୋକେ ସେଭଳି ସତର୍କତା, ସଚେତନତା ଅବଲମ୍ବନ କରି ରହୁଥିବା ଯାଜ୍ଞସେନୀ କହିଛନ୍ତି ।
ସେ କହିଛନ୍ତି, ଘର ମଧ୍ୟରେ ତାଙ୍କୁ ଏକ ସ୍ବତନ୍ତ୍ର କୋଠରୀ ମଧ୍ୟରେ ରଖାଯାଇଛି । ସେହିଭଳି ପରିବାରର ଅନ୍ୟଲୋକେ ମଧ୍ୟ ସାଧାରଣ କାମରେ ଘରକୁ ବାହାରୁ ନାହାନ୍ତି । ଆବଶ୍ୟକ ହେଲେ ପରିବା କିମ୍ବା ମେଡ଼ିକାଲ କାମରେ ବାହାରକୁ ଯାଉଛନ୍ତି ଏବଂ ଫେରିବା ସମୟରେ ଘର ଆଗରେ ବାଲଟିରେ ରଖାଯାଇଥିବା ପାଣି ଏବଂ ସାବୁନରେ ହାତ ଧୋଇ ଘରକୁ ପଶୁଛନ୍ତି । ସେହିପରି ବହୁବର୍ଷ ତଳର କଥା ମନେ ପକାଇ ଯାଜ୍ଞସେନୀ କହିଥିଲେ, ଆଗରୁ ଥରେ ଏଭଳି ଲୋକେ ଜଣେ ପରେ ଜଣେ ମୃତ୍ୟୁମୁଖରେ ପଡ଼ୁଥିଲେ । ଏବେ ସିନା ଘରେ ରହୁଛୁ, ସେତେବେଳେ ଲୋକେ ଜଙ୍ଗଲକୁ ଯାଇ ରହୁଥିଲେ ବୋଲି ସେ କହନ୍ତି ।
ଯାଜ୍ଞସେନୀଙ୍କ ନାତି ଦିବସ କହନ୍ତି, ମହାମାରୀ କରୋନା ଦିନକୁ ଦିନ ସାଂଘାତିକ ହେବାରେ ଲାଗିଛି । ଏହାକୁ ପ୍ରତିହତ କରିବା ପାଇଁ ମେଡ଼ିସିନ କିମ୍ବା ଭେକ୍ସିନ୍ ଏପର୍ଯ୍ୟନ୍ତ ବାହାରି ପାରି ନାହିଁ । ସଚେତନତା, ସତର୍କତାରୁ ହିଁ କରୋନା ଆମଠାରୁ ଦୂରେଇ ଯିବ । ଫଳରେ କେବଳ ପରିବାର ପାଇଁ ନୁହଁ, ସ୍କୁଲରେ ଥିବାବେଳେ ଛାତ୍ରୀଛାତ୍ରଙ୍କ ମଧ୍ୟରେ ଏଭଳି ସଚେତନତା କାର୍ଯ୍ୟକ୍ରମ ହୋଇ ସାରିଛି । ଏହା ସହିତ ସ୍କୁଲ ବନ୍ଦ ହୋଇ ଗ୍ରାମକୁ ଫେରିବା ପରେ ପଡ଼ୋଶୀ ୪ଟି ଗ୍ରାମ ଲିଟିପାଲି, ବାଦିପାଲି, ଭାଟିବାହାଲି ଏବଂ କମଳପଦର ଗ୍ରାମକୁ ଯାଇ କରୋନାକୁ ପ୍ରତିହତ କରିବା ପାଇଁ ସାମାଜିକ ଦୂରତା ବଜାୟ ରଖି ଲୋକଙ୍କୁ ସଚେତନ କରାଇଥିବା ଦିବସ କହିଛନ୍ତି । ସେହିଭଳି ଦିବସ ନିୟମିତ ସୋସିଆଲ ମିଡ଼ିଆରେ କରୋନା ସଚେତନତା ପାଇଁ ଉଦ୍ଦିଷ୍ଟ ବାର୍ତ୍ତା ଦେଇ ଏଭଳି ପରିସ୍ଥିତିରେ ନିଜର ଏକ ଭିନ୍ନ ପରିଚୟ ସୃଷ୍ଟି କରିଛନ୍ତି।