ଢେଙ୍କାନାଳ ଅଫିସ, ୨୦।୨ – ଢେଙ୍କାନାଳ ସହରରେ ସମ୍ପୂର୍ଣ୍ଣ ଦେୟ ପ୍ରଦାନ କରିଥିବା ସଚେତନ ବିଦ୍ୟୁତ୍ ଉପଭୋକ୍ତାଙ୍କୁ ପ୍ରଦାନ କରାଯାଇଛି ଗୋଲାପ, ଥ୍ୟାଙ୍କ ୟୁ କାର୍ଡ ସାଙ୍ଗକୁ ଚକୋଲେଟ। ସେସୁ ଏବଂ ଏନ୍ଜେନ କର୍ମଚାରୀମାନେ ବୁଧବାର ଘରକୁ ଘର ବୁଲି ବକେୟା ମୁକ୍ତ ଥିବା ଗ୍ରାହକଙ୍କୁ ଏସବୁ ସାମଗ୍ରୀ ବାଣ୍ଟିଥିଲେ। ପ୍ରଥମ ଦିବସରେ ୧୦୦ଜଣ ଉପଭୋକ୍ତାଙ୍କୁ ଏହା ପ୍ରଦାନ କରାଯାଇଛି। ୧୦୦% ବକେୟା ବିଦ୍ୟୁତ୍ ବିଲ୍ ପୈଠ କରିଥିବା ଉପଭୋକ୍ତା ପରିବାରକୁ ପ୍ରୋତ୍ସାହିତ କରିବାକୁ ଏପରି ପଦକ୍ଷେପ ନିଆଯାଇଥିବା ଏନ୍ଜେନ୍ ପକ୍ଷରୁ ସୂଚନା ଦିଆଯାଇଛି। ସେସୁ ନୋଡାଲ ଅଫିସର ପି.କେ. ଲେଙ୍କା, ଏସ୍ଡିଓ ଅଶୋକ କୁମାର ପାତ୍ର, ଏନ୍ଜେନ୍ ଏମ୍ଆରପି ମୁଖ୍ୟ ଶ୍ରୀକାନ୍ତ ଶର୍ମା, ସର୍କଲ ମୁଖ୍ୟ ସୌମ୍ୟଶ୍ରୀ ପାର୍ଥସାରଥୀ, ଏସ୍ଡିଓ ବିବେକ ମହାପାତ୍ର, କନିଷ୍ଠ ଯନ୍ତ୍ରୀ ଚନ୍ଦନ କୁମାର ବାରିକ ପ୍ରମୁଖ ଏହି ଅଭିଯାନରେ ସାମିଲ ହୋଇଥିଲେ।
