ନୂଆଦିଲ୍ଲୀ,୧୦।୬(ପି.ଟି.): ଭାରତୀୟ ମହିଳା ଭାରୋତ୍ତୋଳିକା ସଞ୍ଜିତା ଚାନୁଙ୍କ ଉପରେ ଲାଗୁ କରାଯାଇଥିବା ଡୋପିଂ ମାମଲା ପ୍ରତ୍ୟାହାର କରାଯାଇଛି। ଅନ୍ତର୍ଜାତୀୟ ଓ୍ବେଟ ଲିଫ୍ଟିଂ ଫେଡେରେଶନ (ଆଇଡବ୍ଲ୍ୟଏଫ୍) ତାଙ୍କ ସବୁ ମାମଲା ପ୍ରତ୍ୟାହାର କରିଛି। ତାଙ୍କ ନମୁନାରେ ଏକ ରୂପତା ନ ଥିଲା। ଅର୍ଥାତ୍ ତାଙ୍କ ନମୁନାକୁ ନେଇ ମତଭେଦ ଥିବାରୁ ଶେଷରେ ବିଶ୍ୱ ନିଶା ନିବାରଣ ସଂସ୍ଥା (ଓ୍ବାଡା) ତାଙ୍କ ଉପରୁ ମାମଲା ପ୍ରତ୍ୟାହାର କରିବାକୁ ସୁପାରିସ୍ କରିଥିଲା। ସୁପାରିସ୍ ଅନୁସାରେ ଆଇଡବ୍ଲ୍ୟୁଏଫ୍ ମାମଲା ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛି। ତେବେ ଏଥିପାଇଁ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜୟିନୀ ସଞ୍ଜିତା ଆଇଡବ୍ଲ୍ୟୁଏଫ୍ କ୍ଷମା ମାଗୁ ଓ କ୍ଷତିପୂରଣ ଦେଉ ବୋଲି ଦାବି କରିଛନ୍ତି। ୨୬ ବର୍ଷୀୟା ଚାନୁ ଆରମ୍ଭରୁ ନିର୍ଦ୍ଦୋଷ ବୋଲି ଦାବି କରିଆସୁଥିଲେ। ତାଙ୍କ ଆଇଡବ୍ଲ୍ୟୁଏଫ୍ ଇ-ମେଲ ଜରିଆରେ ଅନ୍ତିମ ନିଷ୍ପତ୍ତି ନେଇ ଅବଗତ କରିଛି। ଏଥିରେ ଆଇଡବ୍ଲ୍ୟୁଏଫ୍ ଲିଗାଲ କନସେଲ ଲିଲା ସାଗିଙ୍କ ସ୍ବାକ୍ଷର ରହିଛି।
ଚାନୁଙ୍କ ନମୁନା ବିଶ୍ଳେଷଣ ବେଳେ ଏକରୂପତା ଦେଖିବାକୁ ମିଳି ନ ଥିଲା। ଫଳରେ ଆଇଡବ୍ଲ୍ୟୁଏଫ୍ ତାଙ୍କ ବିରୋଧରୁ ସବୁ ଡୋପିଂ ମାମଲା ପ୍ରତ୍ୟାହାର କରିବାକୁ ନିଷ୍ପତ୍ତି ନେବା ସହ ସବୁ ମାମଲାକୁ ସମାପ୍ତ କରିଛି। ସବୁ ଡୋପିଂ ଚାର୍ଜରୁ ବାଦ୍ ପଡିଥିବାରୁ ଚାନୁ ଏ ନେଇ ଖୁସି ଜାହିର କରିଛନ୍ତି। ତେବେ ଇତିମଧ୍ୟରେ କେତୋଟି ସୁଯୋଗ ହରାଇଛି ଓ ମାନସିକ ଯନ୍ତ୍ରଣା ପାଇଛି। ଏଥିପାଇଁ ଦାୟୀ କିଏ ରହିବ ବୋଲି ଚାନୁ ପ୍ରଶ୍ନ କରିଛନ୍ତି। ଅନ୍ତିମ ନିଷ୍ପତ୍ତି ନେବା ପୂର୍ବରୁ ଜଣେ ଆଥଲେଟକୁ ସସ୍ପେଣ୍ଡ କରାଯିବା ନିହାତି ଦୁର୍ଭାଗ୍ୟଜନକ। ଏଥିପାଇଁ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାର ସୁଯୋଗ ମଧ୍ୟ ହରାଇଛି। ଏଥି ପାଇଁ କିଏ ଦାୟୀ ରହିବ ବୋଲି ସେ କହିଛନ୍ତି। ଏହା ଏକ ଜୋକ୍ରେ ପରିଣତ ହୋଇଛି। ଜଣେ ଆଥଲେଟ୍ର କ୍ୟାରିୟର ନେଇ ଆଇଡବ୍ଲ୍ୟୁଏଫ୍ ଆଦୌ ସଚେତନ ନୁହଁ। ଅଲିମ୍ପିକ୍ ସୁଯୋଗରୁ ଆଇଡବ୍ଲ୍ୟୁଏଫ୍ ମୋତେ ବଞ୍ଚିତ କରିଛି ବୋଲି ସେ ଅଭିଯୋଗ ଆଣିଛନ୍ତି।
ଉଲ୍ଲେଖଥାଉ କି, ୨୦୧୭ ନଭେମ୍ବରରେ ଆମେରିକାରେ ବିଶ୍ୱ ଚାମ୍ପିୟନଶିପ୍ ଆୟୋଜନ ହେବା ପୂର୍ବରୁ ୟୁନାଇଟେଡ ଷ୍ଟେଟ୍ସ ଆଣ୍ଟି ଡୋପିଂ ଏଜେନ୍ସି (ୟୁଏସ୍ଏଡିଏ) ତରଫରୁ ଏକ ଡୋପ୍ ଟେଷ୍ଟ ହୋଇଥିଲା। ଏଥିରେ ମଣିପୁରର ଏହି ଆଥଲେଟଙ୍କ ନମୁନାରେ ଆନୋବୋଲି ଷ୍ଟେରଏଡ ଥିଲା ଓ ଡୋପ୍ ଟେଷ୍ଟରେ ବିଫଳ ହୋଇଥିଲେ।