ଭୁବନେଶ୍ୱର,୩।୪(ବ୍ୟୁରୋ): କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାକୁ ଦୃଷ୍ଟିରେ ରଖି ଶୁକ୍ରବାର ରାଜ୍ୟ ସରକାରଙ୍କ ପକ୍ଷରୁ ବଡ଼ ଘୋଷଣା କରାଯାଉଛି। ରାଜଧାନୀ ସହ ଭଦ୍ରକ ଏବଂ କଟକ ସହର ସଟ୍ ଡାଉନ୍ ରହିବ। ପୂର୍ବରୁ ଲକ୍ଡାଉନ୍ ପାଇଁ ଜାରି ହୋଇଥିବା ସମସ୍ତ ସ୍ବତନ୍ତ୍ର ପାସ ରଦ୍ଦ କରାଯିବ। ହେଲେ ଜରୁରୀ ସେବା ପାଇଁ ସ୍ବତନ୍ତ୍ର ସଟ୍ ଡାଉନ୍ ପାସ ଦିଆଯିବ। ୧୦୦ ନଂ ସହ ଯୋଗାଯୋଗ କରି ଲୋକେ ତାହା ପାଇପାରିବେ ବୋଲି ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ପୋଲିସ ଡିଜି ଅଭୟ ସୂଚନା ଦେଇଛନ୍ତି।
ରାଜ୍ୟରେ ୬ କରୋନା ପଜିଟିଭ୍ ମିଳିଛି। ୬ଟିରୁ ଭୁବନେଶ୍ୱରରେ ୪ଟି ଥିବା ବେଳେ ଭଦ୍ରକ ଓ କଟକରେ ଗୋଟିଏ ପଜିଟିଭ୍ ଚିହ୍ନଟ ହୋଇଛି। ପଞ୍ଚମ ସଂକ୍ରମିତ ଆକ୍ରାନ୍ତ ହେବା କାରଣ ଜଣା ନ ପଡ଼ିବାକୁ ନେଇ ଉପରୋକ୍ତ ୩ ସହର ୪୮ ଘଣ୍ଟା ସଟ୍ଡାଉନ୍ ରହିବ। ଏହି ସମୟରେ ଲକ୍ଡାଉନ୍ ପାସ୍ ଦେଖାଇ ବୁଲି ପାରିବେ ନାହିଁ। ଜରୁରୀକାଳିନ ସେବା ପାଇଁ ସଟ୍ଡାଉନ୍ ପାସ୍ ଇସ୍ୟୁ କରାଯିବ। ସଟ୍ ଡାଉନ୍ ସମୟରେ କେହି ଘର ବାହାରେ ବୁଲିଲେ ପୋଲିସ୍ ଉଠାଇ ନେବ। ସେମାନଙ୍କୁ ଉଠାଇ ନେଇ ୧୪ ଦିନ କ୍ୱାରାଣ୍ଟାଇନ୍ରେ ରଖାଯିବ। ମାମଲା ରୁଜୁ କରାଯିବା ସହ ଜରିମାନା ମଧ୍ୟ ଆଦାୟ କରାଯିବ। ଅପରପକ୍ଷେ ପୂର୍ବଭଳି ମାଲବାହୀ ଟ୍ରକ ଚଳାଚଳ ଉପରେ କୌଣସି ପ୍ରତିବନ୍ଧକ ନାହିଁ। ଲୋକମାନଙ୍କୁ ଭୟଭୀତ ନ ହେବା ପାଇଁ ପୋଲିସ ଡିଜି ଅଭୟ କହିଛନ୍ତି।