ମୁମ୍ବାଇ, ୩।୧୨- ”ଭାରତକୁ ଆସିଥିବାରୁ ମୁଁ ବହୁତ ଖୁସି। ତେବେ ଏଠାରେ ପ୍ରତିବର୍ଷ ସଡ଼କ ଦୁର୍ଘଟଣାରେ ୧୫୦,୦୦୦ରୁ ଅଧିକ ଲୋକ ମୃତ୍ୟୁବରଣ କରୁଥିବା ଜାଣି ବହୁତ ଦୁଃଖିତ। ଏହା ଏକ ବଡ଼ ସଂଖ୍ୟା। ଆମେ ଏପରି ଭାବରେ ଜୀବନ ହରେଇବା ଠିକ୍ ନୁହେଁ। ବିଶ୍ୱରେ ଏଥିପାଇଁ ସଚେତନତା ବାର୍ତ୍ତା ଦେବାପାଇଁ ରୋଡ୍ ସେଫ୍ଟି ଓ୍ବାଲର୍ଡ ସିରିଜ ହିଁ ଉପଯୁକ୍ତ ପ୍ଲାଟଫର୍ମ ବୋଲି ମୁଁ ଭାବୁଛି। ମୁଁ ଜାଣିଛି ଯେ ଭାରତ ଏକ କ୍ରିକେଟ ପ୍ରିୟ ଦେଶ। ତେଣୁ ଏହି ଦେଶର ଲୋକମାନେ ନିଶ୍ଚିତ ଏହି ସିରିଜକୁ ମନଭରି ଉପଭୋଗ କରିବେ ବୋଲି ମୋର ଆଶା। ସଡ଼କ ଦୁର୍ଘଟଣାରେ ଲୋକମାନେ ଯେପରି ଅଧିକ ସଂଖ୍ୟାରେ ମୃତ୍ୟୁବରଣ ନ କରିବେ ସେଥିପାଇଁ ଆମକୁ ସମ୍ମିଳିତ ଉଦ୍ୟମ ଆବଶ୍ୟକ ଆବଶ୍ୟକ“ ବୋଲି ୨ ଥର ଅଲିମ୍ପିକ୍ ଗୋଲ୍ଡ ମେଡାଲିଷ୍ଟ ଜାମାଇକା ସ୍ପ୍ରିଣ୍ଟର ୟୋହାନ ବ୍ଲେକ୍ ଏଠାରେ ସୋମବାର ଆୟୋଜିତ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଭାରତରେ ସଡ଼କ ସୁରକ୍ଷା ଉପରେ ସଚେତନତା ସୃଷ୍ଟି ଏବଂ ଏହାର ଗୁରୁତ୍ୱ ସମ୍ପର୍କରେ ବ୍ଲେକ୍ ମତବ୍ୟକ୍ତ କରିଥିଲେ। ସର୍ବକନିଷ୍ଠ ୧୦୦ ମିଟର ବିଶ୍ୱ ଚାମ୍ପିୟନ ତଥା ଆଥଲେଟିକ୍ସରୁ ୪ଟି ଅଲିମ୍ପିକ୍ ପଦକ ହାସଲ କରି ସାରିଥିବା ବ୍ଲେକ ରୋଡ୍ ସେଫ୍ଟି ଓ୍ବାଲର୍ଡ ସିରିଜକୁ ପ୍ରମୋଟ କରିବା ପାଇଁ ଭାରତ ଆସିଛନ୍ତି। ଆସନ୍ତା ବର୍ଷ ଫେବୃୟାରୀରେ ହେବାକୁଥିବା ଏହି ବାର୍ଷିକ ଟି୨୦ କ୍ରିକେଟ ଇଭେଣ୍ଟରେ ଭାରତ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା, ଓ୍ବେଷ୍ଟଇଣ୍ଡିଜ ଓ ଶ୍ରୀଲଙ୍କାର କିମ୍ବଦନ୍ତୀ କ୍ରିକେଟରମାନେ ଭାଗନେବେ।
କ୍ରିକେଟ ପ୍ରଥମ ପ୍ରେମ-
ବ୍ଲେକ କହିଛନ୍ତି ଯେ, ଆସନ୍ତା ଫେବୃୟାରୀରେ ହେବାକୁଥିବା ରୋଡ୍ ସେଫ୍ଟି ଓ୍ବାଲର୍ଡ ସିରିଜକୁ ମୁଁ ଆଗ୍ରହର ସହିତ ଅପେକ୍ଷା କରିଛି। ପୂର୍ବରୁ ମୁଁ ଅନେକ ଥର କହି ସାରିଛି ଯେ କ୍ରିକେଟ ମୋର ପ୍ରଥମ ପ୍ରେମ। ତେଣୁ ମୁଁ କ୍ରିକେଟ ପଡ଼ିଆରେ ସଚିନ ତେନ୍ଦୁଲକର, ବ୍ରାଏନ ଲାରା, ବୀରେନ୍ଦ୍ର ସେହ୍ବାଗ, ବ୍ରେଟ୍ ଲୀଙ୍କ ପରି ଫେଭରାଇଟ କିମ୍ବଦନ୍ତୀ ଖେଳାଳିଙ୍କୁ ଦେଖିବାକୁ ନିଶ୍ଚିତ ଭଲ ପାଇବି। ଏହି ପ୍ରତିଯୋଗିତା କେବଳ ରୋମାଞ୍ଚକ ଖେଳ ପାଇଁ ନୁହେଁ ସଡ଼କ ସୁରକ୍ଷା ପ୍ରତି ଲୋକଙ୍କ ଆଭିମୁଖ୍ୟରେ ପରିବର୍ତ୍ତନ ଏବଂ ଏ ଦିଗରେ ସଚେତନତା ସୃଷ୍ଟି ହୋଇପାରିବ ବୋଲି ମୋର ବିଶ୍ୱାସ।
ଟୋକିଓରେ ସ୍ବର୍ଣ୍ଣ ଆଶା-
୨୦୨୦ ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ଜିତିବା ତାଙ୍କର ମୁଖ୍ୟ ଲକ୍ଷ୍ୟ ବୋଲି କହିଛନ୍ତି ବ୍ଲେକ। ଏହା ମୋର ଶେଷ ଅଲିମ୍ପିକ୍ସ। ତେଣୁ ମୁଁ ସ୍ବର୍ଣ୍ଣ ପଦକ ଜିତିବାକୁ ନିଶ୍ଚିତ ଚେଷ୍ଟା କରିବି। ପୂର୍ବରୁ ମୁଁ ଅନେକ ପଦକ ଜିତି ସାରିଛି। ମାତ୍ର ଟୋକିଓ ପଦକ ମୋ ପାଇଁ ସ୍ବତନ୍ତ୍ର ହେବ। ଟୋକିଓରେ ୧୦୦ ମିଟର ଇଭେଣ୍ଟ ପାଇଁ ସେ ଅନ୍ୟତମ ଫେଭରାଇଟ ଥିବା ପ୍ରକାଶ କରିଛନ୍ତି। ପୂର୍ବତନ ଭାରତୀୟ ଅଧିନାୟକ ତଥା ହାଇଦ୍ରାବାଦ କ୍ରିକେଟ ଆସୋସିଏଶନ ସଭାପତି ମହମ୍ମଦ ଆଝାରୁଦ୍ଦିନ ଏହି ଅବସରରେ ଉପସ୍ଥିତ ଥିଲେ।