ଜେନିଭା, ୨୦ା୬: ମହାମାରୀ କରୋନା ଏବେ ଏକ ନୂଆ ଓ ବିପଜ୍ଜନକ ପର୍ଯ୍ୟାୟରେ ପ୍ରବେଶ କରିଛି। ଗତ ଦୁଇଦିନ ହେବ ଉଗ୍ର ସଂକ୍ରମଣ ଦେଖାଦେଇଛି। ଗୁରୁବାର ୧.୫୦ ଲକ୍ଷ ଓ ଶୁକ୍ରବାର ଗୋଟିଏ ଦିନରେ ସର୍ବାଧିକ ୧.୮୧ ଲକ୍ଷରୁ ଅଧିକ ନୂଆ ମାମଲା ଦେଖାଦେଇଥିଲା। ଆମେରିକା ସମେତ ମଧ୍ୟ ପ୍ରାଚ୍ୟ ଓ ଦକ୍ଷିଣ ଏସିଆରେ ସର୍ବାଧିକ ମାମଲା ଦେଖିବାକୁ ମିଳିଥିଲା। ଆଗକୁ ଆହୁରି ଭୟଙ୍କର ସ୍ଥିତି ଦେଖାଦେବାର ଆଶଙ୍କା ରହିଛି ବୋଲି ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ)ର ମୁଖ୍ୟ ଟେଡୋସ୍ ଆଧାନମ୍ ଘେବ୍ରେୟେସସ୍ ଶନିବାର ସତର୍କ କରାଇଛନ୍ତି। କରୋନା ଭୂତାଣୁ ଦ୍ରୁତ ଗତିରେ ବ୍ୟାପିଚାଲିଛି। ଲୋକମାନେ ସଙ୍ଗରୋଧରେ ରହି ବିରକ୍ତ ପ୍ରକାଶ କରୁଛନ୍ତି ଓ ବାଣିଜ୍ୟ, ବ୍ୟବସାୟ ଲାଗି ଅନେକେ ମନ ବଳାଇଛନ୍ତି। ହେଲେ ସାମ୍ପ୍ରତିକ ସମୟ ସବୁଠାରୁ ଅଧିକ ସତର୍କ ରହିବାର ସମୟ ବୋଲି ସେ ପ୍ରକାଶ କରିଛନ୍ତି। ଡବ୍ଲ୍ୟୁଏଚ୍ଓର କାରିଗରି ବିଭାଗ ମୁଖ୍ୟ ମାରିଆ ଭାନ୍ କେର୍ଖୋଭ୍ ଏକ ଖବରଦାତା ସମ୍ମିଳନୀରେ କହିଛନ୍ତି, ଅନେକେ ସୁସ୍ଥ ହୋଇଥିଲେ ହେଁ ଭୂତାଣୁକୁ ନିୟନ୍ତ୍ରଣ କରାଯାଇପାରି ନାହିଁ। ଏହା ପୁଣି ଫେରିବାର ଭୟ ମଧ୍ୟ ରହିଛି। ସମ୍ଭବତଃ ବର୍ଷ ଶେଷ ଆଡ଼କୁ ପୁଣି ଭnୂତାଣୁର ଲେଉଟାଣି ହୋଇପାରେ। ସର୍ବଦା ସତର୍କ ରହିବା ସହ କରୋନା ଭୂତାଣୁଠାରୁ ଦୂରେଇ ରହିବା ଉଚିତ ବୋଲି ଡବ୍ଲ୍ୟୁଏଚ୍ଓ ପକ୍ଷରୁ କୁହାଯାଇଛି।