ପୁରୀ ଅଫିସ,୨୪।୫: ସତ୍ୟବାଦୀରେ ପ୍ରଥମ ଥର ଲାଗି ଖାତା ଖୋଲିଛି ବିଜେଡି। ବିଜେଡି ପ୍ରତିଷ୍ଠା ପରଠାରୁ ଏଠାରେ କେବେହେଲେ ଜିତିପାରି ନ ଥିଲା। ହେଲେ ଏଥର ବଦଳିଛି ଇତିହାସ। ବିଜେଡି ପ୍ରାର୍ଥୀ ଉମାକାନ୍ତ ସାମନ୍ତରାୟ ଭାଜପା ପ୍ରାର୍ଥୀ ଭାଜପା ପ୍ରାର୍ଥୀ ଓମ୍ପ୍ରକାଶ ମିଶ୍ରଙ୍କୁ ହରାଇଛନ୍ତି। ଏଠାରୁ କଂଗ୍ରେସ ପ୍ରାର୍ଥୀ ହୋଇଥିବା ପୂର୍ବତନ ପିସିସି ସଭାପ୍ତ ପ୍ରସାଦ ହରିଚନ୍ଦନଙ୍କୁ ତୃତୀୟ ସ୍ଥାନରେ ସନ୍ତୁଷ୍ଟ ହେବାକୁ ପଡ଼ିଛି। ଉମାକାନ୍ତ ନିଜ ବିଜୟରେ ଖୁସି ହୋଇ କହିଛନ୍ତି,
ନବୀନଙ୍କ ପ୍ରତି ଲୋକଙ୍କ ଶ୍ରଦ୍ଧା ଓ ବିଶ୍ୱାସ ପ୍ରମାଣ କରିଛି ୨୦୧୯ ସାଧାରଣ ନିର୍ବାଚନର ଫଳାଫଳ। ଓଡିଶାବାସୀ ପୁଣି ଥରେ ନବୀନଙ୍କ ପ୍ରତି ଆସ୍ଥା ପ୍ରକଟ କରିଛନ୍ତି । ପୂର୍ବରୁ ମୁଁ ସ୍ବାଧୀନ ପ୍ରାର୍ଥୀ ଭାବେ ୨୦୧୪ରେ ବିଜୟଲାଭ କରିଥିଲି। ୨୦୧୯ରେ ବିଜେଡି ପ୍ରାର୍ଥୀ ଭାବେ ପୁଣି ଥରେ ଜନତାଙ୍କ ସମର୍ଥନ ପାଇଛି । ବିକାଶକୁ ସର୍ବଦା ପ୍ରାଥମିକତା ଦେଇ ଆସିଛି। ପାନୀୟ ଜଳ ଯୋଗାଣ, ମେଗା ଗ୍ରୀଡ ଷ୍ଟେଶନ, ୩୩କେଭି ବିଦ୍ୟୁତ ସଂଯୋଗୀକରଣ, କୋର୍ଟ ସ୍ଥାପନା, ଉନ୍ନତମାନର ଷ୍ଟାଡିୟମ ନିର୍ମାଣ କରିଛି। ଐତିହ୍ୟ କୀର୍ତ୍ତି ବକୁଳବନର ପୁନରୁଦ୍ଧାର ଲାଗି ଉଦ୍ୟମ କରିଛି। ଏହି ଐତିହ୍ୟ କୀର୍ତ୍ତିର ସୁରକ୍ଷା ତଥା ଖୁବଶୀଘ୍ର ଓଡିଆ ବିଶ୍ୱବିଦ୍ୟାଳୟ କାର୍ଯ୍ୟକ୍ଷମ ନେଇ ଚେଷ୍ଟା ରହିବ। ଆଗାମୀ ଦିନରେ ଦଳରେ ରହିଥିବା ମତଭେଦକୁ ଦୂରକରି ସାଙ୍ଗଠନିକ କାର୍ଯ୍ୟକୁ ସୁଦୃଢ ଲାଗି ଉଦ୍ୟମ କରିବି। ଆମ ହାତରୁ ପୁରୀ ଓ ବ୍ରହ୍ମଗିରି ବିଧାନସଭା ନିର୍ବାଚନମଣ୍ଡଳୀ ହାତରୁ ଚାଲିଯାଇଛି। ଜିଲାର ଅନ୍ୟ ଆସନରେ ଦଳ ବିଜୟ ଲାଭ କରିଛି । ବିଜେଡି ପ୍ରତି ଲୋକଙ୍କ ବହୁ ଆଶା ରହିଛି । ନବୀନଙ୍କ ନେତୃତ୍ୱରେ ଓଡିଶାର ବିକାଶ ଧାରା ଜାରି ରହିବ। ସତ୍ୟବାଦୀକୁ ନମ୍ବର ୱାନ କରିବା ଲାଗି ଚେଷ୍ଟା କରିବି ବୋଲି ଉମାକାନ୍ତ କହିଛନ୍ତି।