ଚଣ୍ଡିଖୋଲ,୩୧-୧(ଡି.ଏନ୍.ଏ.):ବର୍ତ୍ତମାନ ଧର୍ମନାମରେ ବିଭେଦ ସୃଷ୍ଟି ହେଉଛି। ଜାତି, ଧର୍ମ, ବର୍ଣ୍ଣକୁ ନେଇ ରାଜନୀତି କରାଯାଉଛି। ଏପରିକି ଭେଦଭାବ ସୃଷ୍ଟି କରାଯାଇ ପରସ୍ପର ପ୍ରତି ବିଦ୍ୱେଷ ଭାବ ସୃଷ୍ଟି ହେଉଛି। ସତ୍ସଙ୍ଗ ହେଉଛି ଜୀବନଧାରା ପରିବର୍ତ୍ତନର ମାର୍ଗ। ସମସ୍ତେ ଏଠାରେ ପ୍ରେମପ୍ରୀତିରେ ବାନ୍ଧି ହୋଇରହିଛନ୍ତି। ଏଭଳି ସତ୍ସଙ୍ଗ ଦ୍ୱାରା ଆମ ଭିତରେ ରହିଥିବା ସାମ୍ପ୍ରଦାୟିକତା ଦୂର ହୋଇଥାଏ ବୋଲି ଯାଜପୁର ଜିଲା ବଡଚଣା ବ୍ଲକ ଅନ୍ତର୍ଗତ ତାଳୁଆସ୍ଥିତ ସତ୍ସଙ୍ଗ ବିହାରରେ ଏକ ଆଲୋଚନାଚକ୍ରରେ ମୁଖ୍ୟ ଅତିଥି ଭାବେ ଯୋଗଦେଇ ‘ଧରିତ୍ରୀ’ର ସମ୍ପାଦକ ତଥା ପୂର୍ବତନ ଏମ୍ପି ତଥାଗତ ସତପଥୀ ଏହା କହିଛନ୍ତି। ଶ୍ରୀଶ୍ରୀଠାକୁର ଅନୁକୂଳଚନ୍ଦ୍ରଙ୍କର ୧୩୨ତମ ଜନ୍ମୋତ୍ସବ ଓ ତାଳୁଆସ୍ଥିତ ସତସଙ୍ଗ ମନ୍ଦିରର ୧୩ଶ ପ୍ରତିଷ୍ଠା ଦିବସରେ ଭାରତୀୟ ସଂସ୍କୃତିରେ ଶ୍ରୀଶ୍ରୀଠାକୁରଙ୍କ ଦୃଷ୍ଟିରେ ଜୀବନ ବିକାଶର ଧାରା ଶୀର୍ଷକ ଆଲୋଚନାଚକ୍ରରେ ସତପଥୀ ଯୋଗଦେଇ ମୁଁ ଅନୁକୂଳଚନ୍ଦ୍ରଙ୍କ ଦୀକ୍ଷା ନେଇ ନ ଥିଲେ ମଧ୍ୟ ୧୯୭୨ ମସିହାରେ ଶ୍ରୀଶ୍ରୀବଡଦା ମୋ ମୁଣ୍ଡ ଉପରେ ହାତରଖିି ଯେଉଁ ଅମୃତ ସ୍ପର୍ଶ ଦେଇଛନ୍ତି ତାହାକୁ ଜୀବନରେ କେବେ ଭୁଲିପାରିବି ନାହଁି ବୋଲି ପ୍ରକାଶ କରିଥିଲେ। ପ୍ରାଧ୍ୟାପକ ସରୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆଲୋଚନାଚକ୍ରରେ ମୁଖ୍ୟବକ୍ତାଭାବେ ପଣ୍ଡିତ ହୃଷୀକେଶ ଆଚାର୍ଯ୍ୟ ଯୋଗଦେଇ ସାମାଜିକ ପରିସ୍ଥିତିରେ ସତ୍ସଙ୍ଗର ଆବଶ୍ୟକତା ସମ୍ପର୍କରେ ବର୍ଣ୍ଣନା କରିବା ସହିତ ପରସ୍ପର ମଧ୍ୟରେ ସୁସମ୍ପର୍କ ସ୍ଥାପନର ଏହା ଏକ ଉତ୍ତମ ମାଧ୍ୟମ ବୋଲି ପ୍ରକାଶ କରିଥିଲେ। ସମ୍ମାନିତ ଅତିଥିଭାବେ ‘ଧରିତ୍ରୀ’ର ବରିଷ୍ଠ ସହ-ସମ୍ପାଦକ ଦୋଳଗୋବିନ୍ଦ ପଣ୍ଡା, ଇଂ ଦୀନବନ୍ଧୁ ସୋରେନ, ଇଂ ପାର୍ଥ ତ୍ରିପାଠୀ ଓ ତାଳୁଆ ସତ୍ସଙ୍ଗ ବିହାରର ଅଧ୍ୟକ୍ଷ ସୁବାସ ଚନ୍ଦ୍ର ମହାପାତ୍ର ଯୋଗ ଦେଇଥିଲେ। ପ୍ରାରମ୍ଭରେ ରାକେଶ ମହାରଣା ପ୍ରାରମ୍ଭିକ ସଙ୍ଗୀତ ଗାନ କରିବା ସହ ନୀତିବାଣୀ ସଙ୍ଗୀତ ଗାନ କରିଥିଲେ। ଏହି ଅବସରରେ ସତ୍ସଙ୍ଗ ବିହାର ପରିସରରେ ଏକ ମାତୃସମ୍ମିଳନୀ ଅନୁଷ୍ଠିତ ହୋଇଥିଲା। ଏହାକୁ ମିନତି ଦେବୀ, ଶୁକ୍ଳା ତ୍ରିପାଠୀ, ଶାନ୍ତିଲତା ମହାପାତ୍ର, ମଞ୍ଜୁବାଳା ମହାପାତ୍ର, ମିନତି ଦେଈ, ସୁଜାତା ମହାପାତ୍ର ପ୍ରମୁଖ ପରିଚାଳନା କରିଥିଲେ। କମଳାକାନ୍ତ ରାୟ, ଅଶୋକ କୁମାର ଜେନା, ଜଳଧର ପ୍ରଧାନ, ପ୍ରଭାକର ଜେନା, ପ୍ରଭାତ କୁମାର ମହାପାତ୍ର ପ୍ରମୁଖ ଆଲୋଚନାଚକ୍ର ଓ ସତ୍ସଙ୍ଗ କାର୍ଯ୍ୟକ୍ରମକୁ ପରିଚାଳନା କରିଥିଲେ।