ଲୁଧିଆନା, ୨୦।୪(ପି.ଟି.)-ଭାରତୀୟ ଘରୋଇ ଫୁଟ୍ବଲର ଅନ୍ୟତମ ସମ୍ମାନଜନକ ପ୍ରତିଯୋଗିତା ସନ୍ତୋଷ ଟ୍ରଫିର ଫାଇନାଲ ରବିବାର ପଞ୍ଜାବ ଓ ସର୍ଭିସେସ୍ ମଧ୍ୟରେ ହେବ। ଶୁକ୍ରବାର ସ୍ଥାନୀୟ ଗୁରୁ ନାନକ ଷ୍ଟାଡିୟମରେ ଖେଳାଯାଇଥିବା ପ୍ରଥମ ସେମିଫାଇନାଲରେ ଘରୋଇ ପଞ୍ଜାବ ୨-୧ ଗୋଲରେ ଗୋଆକୁ ପରାସ୍ତ କରିଛି। ମ୍ୟାଚ୍ର ଦ୍ୱାଦଶ ମିନିଟ୍ରେ ପଞ୍ଜାବ ପକ୍ଷରୁ ଯଶପ୍ରୀତ୍ ସିଂ ଗୋଲ ଦେଇ ଦଳକୁ ପ୍ରଥମାର୍ଦ୍ଧ ସୁଦ୍ଧା ୧-୦ରେ ଅଗ୍ରଣୀ କରାଇଥିଲେ। ଦ୍ୱିତୀୟାର୍ଦ୍ଧରେ ଗୋଆ ଗୋଲକୁ ଶୁଝାଇବା ପାଇଁ ଜୋର୍ଦାର ପ୍ରୟାସ କରିଥିଲା। ତେବେ ମ୍ୟାଚ୍ ଶେଷ ଭାଗରେ ଗୋଆ ଅଧିନାୟକ ସତବୀର ସିଂଙ୍କଠାରୁ ବଲ୍ ପାସ୍ ପାଇ ବଦଳ ଖେଳାଳି ରୋନାଲ୍ଡୋ ଓଲିଭେରିଆ ବଲ୍କୁ ନେଟ୍ ମଧ୍ୟକୁ ପଠାଇଦେବାରେ କୌଣସି ତ୍ରୁଟି କରି ନ ଥିଲେ। ଫଳରେ ମ୍ୟାଚ୍ ୧-୧ ସ୍ଥିତିକୁ ଚାଲିଆସିଥିଲା। ଗୋଆର ଏହି ଖୁସି କିନ୍ତୁ ବେଶି ସମୟ ରହି ନ ଥିଲା। ଏହାର କିଛି ସମୟ ପରେ ହରଜିନ୍ଦରଙ୍କ ଗୋଲବଳରେ ପଞ୍ଜାବ ୨-୧ ଗୋଲରେ ବିଜୟୀ ହୋଇଥିଲା। ଶୁକ୍ରବାର ଖେଳାଯାଇଥିବା ଦ୍ୱିତୀୟ ସେମିଫାଇନାଲରେ ସର୍ଭିସେସ୍ ପେନାଲଟି ଶୁଟ୍ଆଉଟରେ କର୍ନାଟକକୁ ପରାସ୍ତ କରିଥିଲା। ମ୍ୟାଚର ନିର୍ଦ୍ଧାରିତ ସମୟ ଖେଳ ୧-୧ ଗୋଲରେ ଅମୀମାଂସିତ ରହିଥିଲା। ଶୁଟ୍ ଆଉଟରେ ସର୍ଭିସେସ୍ ସମସ୍ତ ୪ଟି ପେନାଲ୍ଟିକୁ ଗୋଲରେ ପରିଣତ କରିବାରେ ସମର୍ଥ ହୋଇଥିବା ବେଳେ କର୍ନାଟକ ଦୁଇଟି କିକ୍ ମିସ୍ କରିଥିଲା।
