ସମ୍ବଲପୁର/ହେମଗିର,୨୭ା୨(ବ୍ୟୁରୋ/ଡି.ଏନ.ଏ.): ସମ୍ବଲପୁର ଜିଲା ବୁର୍ଲାସ୍ଥିତ ଭିମ୍ସାରରେ ଜଣେ ସନ୍ଦିଗ୍ଧ କରୋନା ସଂକ୍ରମଣ ରୋଗୀ ଭର୍ତ୍ତି ହୋଇଛନ୍ତି। ସେ ସୁନ୍ଦରଗଡ ଜିଲା ହେମଗିର ଅଞ୍ଚଳର ବୋଲି ଜଣାପଡିଛି। ରୋଗୀଙ୍କୁ ଆଇସୋଲେସନ୍ ବ୍ୟବସ୍ଥାରେ ରଖାଯାଇ ସ୍ବତନ୍ତ୍ର ଚିକିତ୍ସା କରାଯାଉଛି। ଏଥିପାଇଁ ଡା. ସୁଦର୍ଶନ ପୋଥାଳଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଛି। ବୁଧବାର ରକ୍ତ ଓ ସ୍ବାପ୍ ନମୁନା ସଂଗ୍ରହ କରି ଭୁବନେଶ୍ୱର ଆର୍ଏମ୍ଆର୍ସି ଲ୍ୟାବକୁ ପରୀକ୍ଷା ପାଇଁ ପଠାଯାଇଛି । ଭୁବନେଶ୍ୱରରୁ ଆବଶ୍ୟକ ପଡିଲେ ପୁଣେ ପରୀକ୍ଷା ପାଇଁ ନିଆଯିବ । ରିପୋର୍ଟ ଆସିଲା ପରେ ସଂକ୍ରମଣ ହୋଇଛି କି ନାହିଁ ଜଣାପଡିବ। ଏଥିପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ପୂର୍ବରୁ ଭିମ୍ସାର ପକ୍ଷରୁ ପ୍ରସ୍ତୁତ କରାଯାଇଥିଲା। ଏବେ ତାଙ୍କ ସ୍ବାସ୍ଥ୍ୟାବସ୍ଥା ଠିକ୍ ରହିଛି । କାଶ ଓ ଜ୍ୱର ହେଉଛି । ରିପୋର୍ଟକୁ ଅପେକ୍ଷା କରାଯାଇଛି ବୋଲି ଡାକ୍ତର ପୋଥାଳ ସୂଚନା ଦେଇଛନ୍ତି। ସୂଚନାଯୋଗ୍ୟ ଯେ, ସୁନ୍ଦରଗଡ ଜିଲା ହେମଗିର ବସୁନ୍ଧରା କୋଇଲା ଖଣି କାର୍ଯ୍ୟରତ ଜଣେ ଅଧିକାରୀଙ୍କ ଏହି ୨୩ ବର୍ଷୀୟ ପୁଅ ଦକ୍ଷିଣ କୋରିଆରେ ରିସର୍ଚ୍ଚ କରନ୍ତି। ଗତ ୨୨ ତାରିଖରେ ସେ ଦିଲ୍ଲୀରେ ଓହ୍ଲାଇଥିଲେ। ଦିଲ୍ଲୀ ବିମାନ ବନ୍ଦରରେ ତାଙ୍କଠାରେ କରୋନା ଭାଇରାସ ଉପରେ ଯାଞ୍ଚ କରାଯିବାରୁ ନେଗେଟିଭ ରିପୋର୍ଟ ଆସିଥିଲା। ହେଲେ ୨୩ ତାରିଖ ସେ ଘରେ ପହଞ୍ଚିବା ପରେ ୨୪ ତାରିଖ ତାଙ୍କୁ ଜ୍ୱର, କାଶ ହୋଇଥିଲା। ମଙ୍ଗଳବାର ରାତିରେ ତାଙ୍କୁ ବୁର୍ଲା ଭିମ୍ସାରରେ ଭର୍ତ୍ତି କରାଯାଇଥିଲା।