ଚଣ୍ଡିଗଡ଼,୧୮।୬: ବଡ଼ ବଡ଼ ଫିଲ୍ମ ଷ୍ଟାର ଓ ଅଧିକାରୀଙ୍କ ସହ ସେଲଫି ଦେଖାଇ କିଛି ଲୋକ ଚତୁରତାର ସହ ସାଧାରଣ ଲୋକଙ୍କୁ ନିଜର ଠକେଇର ଶୀକାର କରିଥାନ୍ତି। ନିକଟରେ ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ହରିୟାଣା ରାଜ୍ୟର ଫତେହାବାଦର ରତିଆ ଅଞ୍ଚଳରେ। ଉକ୍ତ ଅଞ୍ଚଳର ଟେଲର ମହେନ୍ଦ୍ର ପାଲ ଧମେନ୍ଦ୍ର ଓ ସନ୍ନି ଦେଓଲଙ୍କ ଭଳି ବଡ଼ ବଡ଼ ହସ୍ତିଙ୍କ ଫଟୋ ଦେଖାଇ ଲୋକଙ୍କଠାରୁ ଟଙ୍କା ଲୁଟ କରୁଥିବା ଅଭିଯୋଗ ହୋଇଛି। ଏହି ଅଭିଯୋଗରେ ସ୍ଥାନୀୟ ପୋଲିସ ସୋମବାର ମହେନ୍ଦ୍ରଙ୍କୁ ଗିରଫ କରି କୋର୍ଟ ଚାଲାଣ କରିଛି। ସୂଚନାଯୋଗ୍ୟ, ମହେନ୍ଦ୍ର କପଡ଼ା ସିଲେଇ ବାହାନାରେ ସେଲେବସ୍ଙ୍କ ସହ ସମ୍ପର୍କରେ ଆସି ତାଙ୍କ ସହ ସେଲଫି ନେଇଥାନ୍ତି। ପରେ ଏହାକୁ ଦେଖାଇ ଲୋକଙ୍କଠାରୁ ଲକ୍ଷ ଲକ୍ଷ ଟଙ୍କା ଲୁଟ କରିଥାନ୍ତି। ଯଦି କେହି ଟଙ୍କା ଫେରସ୍ତ ପାଇଁ ଆସନ୍ତି ମହନ୍ଦ୍ର ତାଙ୍କୁ ନିଜର ବଡ଼ ବଡ଼ ଲିଙ୍କ୍ ଦେଖାଇ ସେମାନଙ୍କ ଧମକ ଚମକ ଦେଇ ଭୟଭୀତ କରିଥାନ୍ତି। କିଛି ଦିନ ତଳେ ଜଣେ ଦୋକାନୀଙ୍କୁ ମହେନ୍ଦ୍ର ୪୦ହଜାର ଟଙ୍କା ଦେବାର ଥିଲା। ହେଲେ ଟଙ୍କା ନ ଦେଇ ଦୋକାନୀଙ୍କୁ ସେ ଧମକ ଦେଇଥିଲେ। ଏନେଇ ଦୋକାନୀ ଜଣଙ୍କ ପୋଲିସ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ପୋଲିସ ତାଙ୍କୁ ଗିରଫ କରିଛି।