ଗ୍ବାଙ୍ଗଜୁ, ୨୧ା୭ (ଏଏଫ୍ପି)- ଚାଇନାର ସନ୍୍ ୟାଙ୍ଗ୍ ଏଠାରେ ଚାଲିଥିବା ବିଶ୍ୱ ସନ୍ତରଣ ପ୍ରତିଯୋଗିତାର ୪୦୦ ମିଟର ଫ୍ରିଷ୍ଟାଇଲ ଇଭେଣ୍ଟରେ ସ୍ବର୍ଣ୍ଣ ପଦକ ଲାଭ କରିଛନ୍ତି। ଏହା ଦ୍ୱାରା ସେ ଟାଇଟଲ ବଜାୟ ରଖିବା ସହ ରେକର୍ଡ ଚତୁର୍ଥ ଥର ପାଇଁ ବିଜୟୀ ହୋଇପାରିଛନ୍ତି। ବିବାଦୀୟ ଅଲିମ୍ପିକ ଚାମ୍ପିୟନ ୩ ମିନିଟ ୪୨.୪୪ ସେକେଣ୍ଡ ଟଇମିଂରେ ରେସ୍ ଶେଷ କରି ପ୍ରଥମ ହୋଇଥିଲେ। ଅଷ୍ଟ୍ରେଲୀୟ ପ୍ରତିଦ୍ୱନ୍ଦ୍ୱୀ ମ୍ୟାକ୍ ହର୍ଟନ (୩:୪୩.୧୭) ରୌପ୍ୟ ପଦକ ଲାଭ କରିଥିଲେ, ଯାହା ଫଳରେ ୨୦୧୭ (ବୁଦାପେଷ୍ଟ)ଫଳାଫଳର ପୁନରାବୃତ୍ତି ଦେଖିବାକୁ ମିଳିଥିଲା। ସୂଚନାଯୋଗ୍ୟ, ଏହି ୮ ଦିନିଆ ପ୍ରତିଯୋଗିତାରେ ଅଂଶଗ୍ରହଣ ପୂର୍ବରୁ ସନ୍ଙ୍କ ବିରୋଧରେ ଡୋପିଂ ପ୍ରୋଟୋକଲ ଉଲ୍ଲଂଘନ ଅଭିଯୋଗ ହୋଇଛି। ଏହି ମାମଲା ଏବେ କ୍ରୀଡ଼ାର ସର୍ବୋଚ୍ଚ ନ୍ୟାୟାଳୟ କୋର୍ଟ ଅଫ୍ ଆର୍ବିଟ୍ରେଶନ ଫର୍ ସ୍ପୋଟର୍ସ (କାସ୍)ରେ ବିଚାରଧୀନ ରହିଛି।
