ଭୁବନେଶ୍ୱର,୧୨।୪(ବ୍ୟୁରୋ): ସାରା ଦେଶରେ କରୋନା ମୁକାବିଲା ପାଇଁ ଲକ୍ଡାଉନ ଜାରି ରହିଛି। ଓଡ଼ିଶାରେ ମଧ୍ୟ ଚଳିତ ମାସ ୩୦ତାରିଖ ଯାଏ ଲକ୍ଡାଉନ ଅବଧିକୁ ବୃଦ୍ଧି କରାଯାଇଛି। ଏଥିଯୋଗୁ କେନ୍ଦୁପତ୍ର ସଂଗ୍ରହ, ବିକ୍ରୟ କାର୍ଯ୍ୟ ବାଧାପ୍ରାପ୍ତ ହୋଇଛି। ସାମାଜିକ ଦୂରତା ରକ୍ଷାକରି ଯଦି ଏହି କାର୍ଯ୍ୟ ଆରମ୍ଭ କରାଯାଇପାରନ୍ତା, ତେବେ ଏକ ବଡ଼ ବର୍ଗ ଉପକୃତ ହୁଅନ୍ତେ। ରାଜ୍ୟ ସରକାର କୃଷି କାର୍ଯ୍ୟ ଯଥାରୀତି ଚାଲୁ କରିବା ପାଇଁ ମଧ୍ୟ ମତ ରଖିଛନ୍ତି। ତେଣୁ ତୁରନ୍ତ କେନ୍ଦୁପତ୍ର ତଥା ଅନ୍ୟାନ୍ୟ ଜଙ୍ଗଲଜାତ ଦ୍ରବ୍ୟ ସଂଗ୍ରହ କାର୍ଯ୍ୟ ଆରମ୍ଭ କରିବା ପାଇଁ ଏହା ସହ ଜଡିତ ଥିବା ବ୍ୟକ୍ତିବିଶେଷ ମତ ରଖିଛନ୍ତି। କେନ୍ଦୁଝର, କନ୍ଧମାଳ, ବଲାଙ୍ଗୀର, ଅନୁଗୋଳ, ସମ୍ବଲପୁର,କୋରାପୁଟ ଏବଂ ମୟୂରଭଞ୍ଜ ଜିଲାରେ କେନ୍ଦୁପତ୍ର ତୋଳାଯାଇଥାଏ। ଏହିସବୁ ଜିଲାର ପ୍ରାୟ ୬ ଲକ୍ଷ ହେକ୍ଟର ଜାଗାରୁ କେନ୍ଦୁପତ୍ର ଉତ୍ପାଦନ ହୁଏ। ୩ରୁ ୪ ମାସ ମଧ୍ୟରେ ଲକ୍ଷ ଲକ୍ଷ ଶ୍ରମଦିବସ ସୃଷ୍ଟି କରିବାର କ୍ଷମତା ଏହି କେନ୍ଦୁପତ୍ର ପ୍ରଦାନ କରିଥାଏ। ରାଜ୍ୟର ବାର୍ଷିକ ୫ ଲକ୍ଷ କୁଇଣ୍ଟାଲ କେନ୍ଦୁପତ୍ର ଉତ୍ପାଦିତ ହୋଇଥାଏ। ମଧ୍ୟପ୍ରଦେଶ ଓ ଛତିଶଗଡ଼ ପରେ ସର୍ବାଧିକ କେନ୍ଦୁପତ୍ର ଓଡ଼ିଶାରେ ଉତ୍ପାଦିତ ହୋଇଥାଏ। ଦେଶର ମୋଟ ଉତ୍ପାଦନର ୨୦% ରାଜ୍ୟରେ ଉତ୍ପାଦିତ ହୁଏ। ଏକଦା ରାଜ୍ୟରେ ୯ ଲକ୍ଷ ପଞ୍ଜୀକୃତ କେନ୍ଦୁପତ୍ର ତୋଳାଳି ଥିବାବେଳେ ଏହି ସଂଖ୍ୟା ଏବେ ସାଢ଼େ ସାତ ଲକ୍ଷରେ ପହଞ୍ଚିଛି। ସେହିଭଳି ପ୍ରାୟ ୨୬,୦୦୦ କେନ୍ଦୁପତ୍ର ବନ୍ଧାଳି ମଧ୍ୟ ରାଜ୍ୟରେ କାର୍ଯ୍ୟ କରୁଛନ୍ତି। ଋତୁକାଳୀନ ଭାବେ ୬ ହଜାର ଏବଂ ପରୋକ୍ଷ ଭାବେ ପ୍ରାୟ ଏକ ଲକ୍ଷ ବ୍ୟକ୍ତିବିଶେଷ କେନ୍ଦୁପତ୍ର ସଂଗ୍ରହ, ବିକ୍ରୟ ସହ ଜଡିତ ରହିଥାନ୍ତି। କେନ୍ଦୁପତ୍ର ସଂଗ୍ରହ ଏବଂ ବିପଣନ ସହ ଜଡିତ ଥିବା କେତେକ ବ୍ୟକ୍ତିବିଶେଷଙ୍କ କହିବାନୁଯାୟୀ, ରାଜ୍ୟରେ ୧୯ ଗୋଟି କେନ୍ଦୁପତ୍ର ତୋଳିବା କେନ୍ଦ୍ର ରହିଛି। ଏହାକୁ ପୂର୍ବଭଳି ତୋଳାଯାଉ। କରୋନାକୁ ଦୃଷ୍ଟିରେ ରଖି ଅତିକମ୍ରେ ସପ୍ତାହକୁ ୩ ଦିନ କେନ୍ଦୁପତ୍ର ତୋଳିବା ପାଇଁ ଦାବି ଉଠିଛି। ଏଥିରେ ଜଡିତ ହେଉଥିବା ଶ୍ରମଜୀବୀଙ୍କୁ ତୁରନ୍ତ ଅନ୍ଲାଇନ୍ ପାରିଶ୍ରମିକ ପ୍ରଦାନ କରାଯାଉ। ଏପରିକି ତୋଳିବା ପୂର୍ବରୁ ହାତକୁ ସାନିଟାଇଜ୍ କରିବା, ତୋଳା ସରିଲେ ହାତକୁ ଭଲ ଭାବେ ଧୋଇ ପୁନର୍ବାର ସାନିଟାଇଜ ହେବା ଜରୁରୀ। ଅନୁରୂପ ଭାବେ ବନ୍ଧାଳି ଏବଂ ସଂଗ୍ରହକାରୀମାନେ ମଧ୍ୟ ସାନିଟାଇଜ ହେବା ଆବଶ୍ୟକ ବୋଲି ମତ ପ୍ରକାଶ ପାଇଛି।