ମୁମ୍ବାଇ: ବି-ଟାଉନର ସବୁଠାରୁ ଲୋକପ୍ରିୟ ଅଭିନେତାମାନଙ୍କ ମଧ୍ୟରୁ ଆୟୁଷ୍ମାନ୍ ଖୁରାନା ଅନ୍ୟତମ। ସେ ଯେଉଁ ଗୀତ ଗାଆନ୍ତି ଏବଂ ଯେଉଁ ଫିଲ୍ମରେ ଅଭିନୟ କରନ୍ତି ସବୁ ହିଟ୍ ହୋଇଯାଏ। ଆୟୁଷ୍ମାନ୍ଙ୍କ ଅଭିନୀତ ଫିଲ୍ମ ‘ଅନ୍ଧାଧୂନ୍’ ଏବଂ ‘ବଧାଇ ହୋ’କୁ ଅନେକ ନ୍ୟାଶନାଲ୍ ଆଓ୍ବାର୍ଡ ମିଳିଛି। ଏହାସହ ସେ ନିଜେ ମଧ୍ୟ ଶ୍ରେଷ୍ଠ ଅଭିନେତା ଭାବେ ନ୍ୟାଶନାଲ ଆଓ୍ବାର୍ଡ ହାସଲ କରିଛନ୍ତି। ବଲିଉଡ୍ରେ ଏଣ୍ଟ୍ରି କରିବାର ଅଳ୍ପ ଦିନ ମଧ୍ୟରେ ଆୟୁଷ୍ମାନ୍ ନିଜର ନିଷ୍ଠା ଏବଂ ଉଚ୍ଚକୋଟୀର ଅଭିନୟ ପାଇଁ ହିନ୍ଦୀ ସିନେମା ଜଗତରେ ଏକ ସ୍ବତନ୍ତ୍ର ସ୍ଥାନ ଅଧିକାର କରିପାରିଛନ୍ତି। କେବଳ ଏତିକି ନୁହେଁ, ସେ ଜଣେ ଲୋକପ୍ରିୟ ଗାୟକ ମଧ୍ୟ। ତେବେ ଅଧୁନା ଏତେ ସଫଳତା ଓ ଲୋକପ୍ରିୟତା ହାସଲ କରିଥିବା ଆୟୁଷ୍ମାନ୍ଙ୍କ ଷ୍ଟ୍ରଗଲ୍ ବିଷୟରେ ଆସନ୍ତୁ କିଛି ଜାଣିବା।
ନିକଟରେ ଏକ ଜାତୀୟ ଗଣମାଧ୍ୟମକୁ ଦେଇଥିବା ସାକ୍ଷାତ୍କାରରେ ଆୟୁଷ୍ମାନ୍ ସଫଳତା ପାଇବା ପୂର୍ବରୁ ତାଙ୍କର ଷ୍ଟ୍ରଗଲ୍ ସମୟକୁ ନେଇ କିଛି ଖୁଲାସା କରିଥିଲେ। ସେ କହିଥିଲେ, ଯେତେବେଳେ ସେ ଥିଏଟର ଶୋ’ କରିବାକୁ ଯାଉଥିଲେ, ସେ ଟ୍ରେନ୍ରେ ଗୀତ ଗାଇ ଟଙ୍କା ରୋଜଗାର କରୁଥିଲେ। ଏଭଳି କରିବା ଦ୍ୱାରା ସେ ଗୋଆ ଟ୍ରିପ୍ ପାଇଁ ଟଙ୍କା ଜମା କରିପାରୁଥିଲେ। ଏଇଥିପାଇଁ ସେ ଆଜି ଠିକ୍ଠାକ୍ ଗୀତ ଗାଇପାରୁଛନ୍ତି ବୋଲି ଆୟୁଷ୍ମାନ୍ କହିଛନ୍ତି।
ଏମିତିରେ ସମସ୍ତେ ଜାଣନ୍ତି କ୍ୟାରିୟରକୁ ନେଇ ଆୟୁଷ୍ମାନ୍ ଟିକେ ସିରିୟସ୍। ସେ ଯେକୌଣସି ଫିଲ୍ମରେ ଅଭିନୟ କରିବାକୁ ରାଜି ହୁଅନ୍ତି ନାହିଁ। ଭାବିଚିନ୍ତି ଫିଲ୍ମର ସ୍କ୍ରିପ୍ଟ ଚୟନ କରନ୍ତି। ତେବେ ବଲିଉଡ୍ରେ ନିଜର ଡେବ୍ୟୁ କରିବା ପୂର୍ବରୁ ପ୍ରାୟ ୫-୬ ଫିଲ୍ମ ଅଫର୍କୁ ମନା କରିଦେଇଥିଲେ। ଗୋଟିଏ ଭଲ ଫିଲ୍ମ କରିବାକୁ ସେ ଅନେକ ଫିଲ୍ମକୁ ମନାକରି ଦେଇଥିବା କହିଛନ୍ତି। ଆୟୁଷ୍ମାନ୍ଙ୍କ କହିବା ହେଲା, ପ୍ରଥମ ଫିଲ୍ମ ସବୁବେଳେ ସ୍ବତନ୍ତ୍ର ହେବା ଉଚିତ୍। ତେବେ ୨-୩ଟି ଫିଲ୍ମ କରିବା ପରେ ସାମାଜିକ ପ୍ରସଙ୍ଗ ଓ ସମସ୍ୟାକୁ ନେଇ ଫିଲ୍ମ କରିବାକୁ ତାଙ୍କର ଇଚ୍ଛା ଥିଲା।
ସେହିଭଳି ବଲିଉଡ୍ରେ ଚାଲିଥିବା ନେପୋଟିଜମ୍ ବା ପରିବାରବାଦକୁ ନେଇ ମଧ୍ୟ ଆୟୁଷ୍ମାନ୍ ନିଜ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଷ୍ଟାର୍ କିଡ୍ମାନଙ୍କୁ ବଲିଉଡ୍ରେ ପ୍ରଥମ ବ୍ରେକ୍ ତ ମିଳିଯାଏ। ହେଲେ ଆଗକୁ ସେମାନଙ୍କ ପାଇଁ ରାସ୍ତା ବହୁତ କଠିନ ହୋଇଥାଏ। ଷ୍ଟାର୍ କିଡ୍ମାନେ ନିଜର ଶତ ପ୍ରତିଶତ ପର୍ଫର୍ମାନ୍ସ ଦେବା ପରେ ମଧ୍ୟ ଦର୍ଶକେ ସନ୍ତୁଷ୍ଟ ହୁଅନ୍ତିନାହିଁ। ହେଲେ ମୁଁ ୫୦ ପ୍ରତିଶତ ପ୍ରଚେଷ୍ଟା କଲେ ମଧ୍ୟ ପରିଶ୍ରମ ବଳରେ ଏହା ହାସଲ କରିଛି ବୋଲି ଦର୍ଶକେ କୁହନ୍ତି ବୋଲି ସେ କହିଛନ୍ତି।