ଚମ୍ପୁଆ,୨୬। ୮(ଡି.ଏନ.ଏ.)-ଆସୁଛି ପାର୍ବଣ ଋତୁ। ଆଗକୁ ବିଭିନ୍ନ ପୂଜା ପରେ ମୃଣ୍ମୟ ମୂର୍ତ୍ତି ବିସର୍ଜନ କରଯିବ। ସେଥିପାଇଁ ପ୍ରଶାସନ ପୂର୍ବରୁ ସଜାଗ ରହିବା ଦରକାର। କିନ୍ତୁ ଚମ୍ପୁଆ ଏନଏସିରେ ଏହାର ବ୍ୟତିକ୍ରମ ଦେଖିବାକୁ ମିଳିଛି।
ସରକାରଙ୍କ ପକ୍ଷରୁ ମୂର୍ତ୍ତି ବିସର୍ଜନ ଫଳରେ ପ୍ରଦୂଷିତ ହେଉଥିବା ନଦୀ ନାଳ ଗୁଡିକରେ ମୁର୍ତ୍ତି ବିସର୍ଜନ ନ କରିବାକୁ ଏକ ପ୍ରକାର ନିର୍ଦ୍ଦେଶ ଦିଆଯାଇଛି। କିନ୍ତୁ ଏହି ନିୟମ ଠିକ ଭାବେ କାର୍ଯ୍ୟକାରୀ ହୋଇପାରୁନି। ଚମ୍ପୁଆ ଏନଏସିରେ ୨ ନଂ ୱାର୍ଡ ପାଞ୍ଚପୋଖରୀଆଠାରେ ନିର୍ମାଣ କରାଯାଇଥିବା ମୁର୍ତ୍ତି ବିସର୍ଜନ କୃତ୍ରିମ ପୋଖରୀରେ ଏହାର ଉଦାହରଣ ଦେଖିବାକୁ ମିଳିଛି। ସୂଚନା ଅନୁସାରେ ଚମ୍ପୁଆ ଏନ.ଏ.ସି ଗଠନ ହେବାପରେ ସହରାଞ୍ଚଳ ପାଇଁ ଥିବା ନିୟମ ଲାଗୁ କରାଯାଇଥିଲା। ଚମ୍ପୁଆ ଅଞ୍ଚଳରେ କରାଯାଉଥିବା ଦୁର୍ଗା ପୂଜା, କାଳି ପୂଜା, ଲକ୍ଷ୍ମୀ ପୂଜା, ଗଣେଷ ପୂଜା, ସରସ୍ବତୀ ପୂଜା, ବିଶ୍ୱକର୍ମା ପୂଜା ଆଦିରେ ମୃଣ୍ମୟ ମୁର୍ତ୍ତି ଗୁଡିକ ଦିର୍ଘ ଦିନରୁ ବୈତରଣୀ ନଦୀରେ ବିସର୍ଜନ କରାଯାଉଥିଲା। ମାତ୍ର ଏନଏସି ହେବା ଦିନଠାରୁ ଏଥିପାଇଁ କଡା ନିୟମ କରାଯାଇ ପ୍ରଥମେ ବୈତରଣୀ ନଦୀ କୂଳ ଘାଗରାଘାଠ ଠାରେ କୃତ୍ରିମ ପୋଖରୀ କରାଯାଇ ମୁର୍ତ୍ତି ବିସର୍ଜନ କରାଯାଇଥିଲା। ମାତ୍ର ପରେ ଦୀର୍ଘ ୨ ବର୍ଷ ହେବ ଏହା ପାଞ୍ଚପୋଖରୀଆ ୟୁ.ଜି ଏମ.ଇ ସ୍କୁଲ ନିକଟ ବନ୍ଧ ନିକଟରେ ନିର୍ମାଣ କରାଯାଇ ମୁର୍ତ୍ତି ବିସର୍ଜନ କରାଯାଉଛି। ମୁର୍ତ୍ତି ବିସର୍ଜନ ପରେ ଏନ.ଏ.ସି ପକ୍ଷରୁ ଉକ୍ତ ମୁର୍ତ୍ତି ଗୁଡିକରେ ବ୍ୟବହୃତ କରାଯାଇଥିବା ଆନୁସାଙ୍ଗିକ ଜିନିଷକୁ ଉଦ୍ଧାର କରି ନଷ୍ଟ କରିବା ସହିତ ଉକ୍ତ ପୋଖରୀକୁ ପ୍ରଦୂଷଣ ମୁକ୍ତ କରିବା ପାଇଁ ଆବଶ୍ୟକ ପଦକ୍ଷେପ ନେବାର ବ୍ୟବସ୍ଥା କରିବା କଥା। ହେଲେ ଉକ୍ତ ପୋଖରୀକୁ ଉଦ୍ଧାର କରାଯାଇନଥିବାରୁ ବର୍ତ୍ତମାନ ସୁଦ୍ଧା ମୁର୍ତ୍ତିରେ ବ୍ୟବହୃତ ଛାଞ୍ଚ ଓ ଆବଶ୍ୟକ ଜିନିଷ ପତ୍ର ଗୁଡିକ ଭାସୁଥିବା ଦେଖିବାକୁ ମିଳିଛି। ଏହି ପୋଖରୀ ଆକାର ଛୋଟିଆ ହୋଇଥିବାରୁ ବର୍ଷା ଦିନେ ଏହା ମଧ୍ୟରୁ ଆବର୍ଜନା ଗୁଡ଼ିକ ବାହାରି ନିକଟ ବନ୍ଧରେ ପଡୁଥିବା ଦେଖିବାକୁ ମିଳିଛି। ଏସମ୍ପର୍କରେ ଏନଏସି ନିର୍ବାହୀ ଅଧିକାରୀ ସପନ କୁମାର ସାହୁଙ୍କୁ ପଚାରିବାରୁ ତୁରନ୍ତ ଉକ୍ତ ପୋଖରୀକୁ ସଫା କରିବା ସହିତ ଆବଶ୍ୟକ ବ୍ଲିଚିଙ୍ଗ ପକାଇ ପ୍ରଦୂଷଣ ମୁକ୍ତ କରାଯିବ। ଏତଦବ୍ୟତୀତ ପ୍ରଦୂଷଣ ବୋର୍ଡ ପକ୍ଷରୁ ଆସିଥିବା ନୂଆ ନିୟମ ଅନୁଯାୟୀ ମୁର୍ତ୍ତି ବିସର୍ଜନ ପାଇଁ ଏକ ସ୍ବତନ୍ତ୍ର ପୋଖରୀ ଖୋଳା ହେବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।