ଅନୁଗୋଳ ଅଫିସ, ୩୦।୪ – ଲକ୍ଡାଉନ୍ କଟକଣାକୁ ଉଲ୍ଲଂଘନ କରିଛନ୍ତି ଅନୁଗୋଳ ପୌରପାଳିକାର କେତେଜଣ କର୍ମଚାରୀ। ଡିସ୍ ସଫେଇ ବାହାନାରେ ସେମାନେ କଳାକେନ୍ଦ୍ରରେ ବୁଧବାର ଭୋଜିର ଆୟୋଜନ କରିଥିବା ଏବେ ସହରରେ ଚର୍ଚ୍ଚାର ବିଷୟ ହୋଇଛି। ଉକ୍ତ ଭୋଜିରେ ବିଜେଡିର କିଛି ନେତା ଓ କେତେଜଣ ଠିକାଦାର ସାମିଲ ଥିବା କୁହାଯାଉଛି।
ଅନୁଗୋଳ ସହରରେ ଥିବା କଳାକେନ୍ଦ୍ରରେ ବିଭିନ୍ନ ସଭା, ସାଂସ୍କୃତିକ କାର୍ଯ୍ୟକ୍ରମ ସହ ବୈଠକ କରାଯାଇଥାଏ। ତେବେ କରୋନା ପାଇଁ ଏବେ ସେସବୁ ବନ୍ଦ ରଖାଯାଇଛି। କିନ୍ତୁ ପୌର କର୍ମଚାରୀମାନେ ଏହାକୁ ଗୋଦାମରେ ପରିଣତ କରି ଦେଇଛନ୍ତି। ଅଳିଆ ସଫା ଗାଡ଼ି ଠାରୁ ଆରମ୍ଭ କରି ବିଜୁଳି ବିଭାଗର ବିଭିନ୍ନ ସାମଗ୍ରୀ ଏହି କଳାକେନ୍ଦ୍ରରେ ରଖାଯାଇଛି। ତେବେ ବୁଧବାର ପୂର୍ବ ପ୍ରସ୍ତୁତି ମୁତାବକ କଳାକେନ୍ଦ୍ରରେ ଭୋଜିର ଆୟୋଜନ କରାଯାଇଥିଲା। କିନ୍ତୁ ଚାବି ପୌରପାଳିକାର ସଫେଇ ଦାୟିତ୍ୱରେ ଥିବା ଅଧିକାରୀଙ୍କ ନିକଟରେ ଥିବାରୁ ଡିସ୍ ସଫେଇ ବାହାନାରେ ଜଣେ ୪ର୍ଥ ଶ୍ରେଣୀ କର୍ମଚାରୀ କଳାକେନ୍ଦ୍ରର ଚାବି ମଗାଇଥିଲେ। ଏହାପରେ ଆରମ୍ଭ ହୋଇଥିଲା ଭୋଜିଭାତ। ପାଖାପାଖି ୧୦ରୁ ୧୫ ଜଣ ଏଥିରେ ସାମିଲ ହୋଇଥିବା ଚର୍ଚ୍ଚା ହେଉଛି। ଏ ସମ୍ପର୍କରେ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କିଛି ଜାଣି ନ ଥିବା କହିଛନ୍ତି। ତେବେ ଘଟଣାକୁ ଅତି ଗୁରୁତ୍ୱର ସହ ନେଇ କଳାକେନ୍ଦ୍ରକୁ ଯାଇଥିବା କର୍ମଚାରୀଙ୍କୁ ପଚରାଉଚରା କରିଛନ୍ତି। ଗୁରୁବାର ଏ ନେଇ ଖୋଳତାଡ଼ କରାଯିବ ବୋଲି ନିର୍ବାହୀ ଅଧିକାରୀ ପଣ୍ଡା ପ୍ରକାଶ କରିଛନ୍ତି।