ଅନ୍ତର୍ଜାତୀୟ ପାରା ଆଥଲେଟିକ୍ ଚାମ୍ପିଅନସିପରେ ଦୁଇଟି ସ୍ବର୍ଣ୍ଣ ପଦକ ହାସଲ କରିଥିବା ବେଙ୍ଗାଲୁରୁ ନିବାସୀ ୩୯ ବର୍ଷୀୟ ଟି ଭି ସୁବ୍ରମଣୀ ନିଜ ଗାଁରେ ସବୁଜ ମିଶନ୍ ଆରମ୍ଭ କରିଛନ୍ତି। ନିଜ ଦମ୍ରେ ଗାଁକୁ ସବୁଜ କରିବାକୁ ପ୍ରତିଶ୍ରୁତିବଦ୍ଧ ହୋଇଛନ୍ତି। ଦିନକୁ ଦିନ ପରିବେଶ ପ୍ରଦୂଷଣ ମାତ୍ରା ବୃଦ୍ଧି ପାଇବାରେ ଲାଗିଛି। ସହରୀ ଅରାଜକତା ଯୋଗୁ ଜଙ୍ଗଲ ନଷ୍ଟ ହେବାରେ ଲାଗିଛି। ତେଣୁ ଏ ଦିଗରେ ଲୋକଙ୍କୁ ସଚେତନ କରିବା ପାଇଁ ସେ ଆରମ୍ଭ କରିଛନ୍ତି ସବୁଜ ମିଶନ୍। ସୁବ୍ରମଣୀ କହିଛନ୍ତି, ସେ ଶାରୀରିକ ଦିବ୍ୟାଙ୍ଗ ହୋଇପାରନ୍ତି, କିନ୍ତୁ ମନରେ ଖୁବ୍ ଦୃଢ଼ ଏବଂ ଶକ୍ତ। ଏହି ଦୃଢ଼ ମନୋବଳ ନେଇ ସେ ଗାଁକୁ ପ୍ରଦୂଷଣମୁକ୍ତ କରିବା ସହ ଚିରସବୁଜ କରିବାକୁ ଆଗେଇ ଆସିଛନ୍ତି। ନିମ୍ବ, ଆମ୍ବ ଭଳି ଅନେକ ପ୍ରକାର ବୃକ୍ଷରୋପଣ କରି ସେ ଏକ ସବୁଜ ଶୃଙ୍ଖଳ ଆରମ୍ଭ କରିଛନ୍ତି। ତାଙ୍କ ନିଃସ୍ବାର୍ଥପର ଭାବନା ଏବେ ଗ୍ରାମବାସୀଙ୍କୁ ମଧ୍ୟ ପରିବେଶ ରକ୍ଷା ଦିଗରେ ପ୍ରଭାବିତ କରିଛି। ସମସ୍ତେ ଏକଜୁଟ୍ ହୋଇ ତାଙ୍କୁ ସାହାଯ୍ୟ ଏବଂ ସହଯୋଗ କରୁଛନ୍ତି। ଗାଁ ରାସ୍ତାର ଉଭୟ ପାର୍ଶ୍ୱରେ ତାଙ୍କ ବୃକ୍ଷରୋପଣ କାର୍ଯ୍ୟକ୍ରମ ଦେଖି ଅନେକ ଆଶ୍ଚର୍ଯ୍ୟଚକିତ ହେଉଛନ୍ତି। ଜଣେ ଦିବ୍ୟାଙ୍ଗଙ୍କର ଏଭଳି ପଦକ୍ଷେପ ଅନ୍ୟମାନଙ୍କୁ ପ୍ରେରଣା ଯୋଗାଇପାରିଛି।