ନୟାଗଡ଼ ଅଫିସ,୧୩ା୬: ମହାନଦୀ ଗର୍ଭରେ ଲୀନ ହୋଇଯାଇଥିବା ନୟାଗଡ଼ ଜିଲା ଭାପୁର ବ୍ଲକ ପଦ୍ମାବତୀ ଗାଁକୁ ନେଇଏବେ ସବୁଠି ଚର୍ଚ୍ଚା। ଗାଁର ବିଶାଳ ଗୋପୀନାଥ ମନ୍ଦିରର ଦଧିନଉତି ଦୃଶ୍ୟମାନ ହେବା ପରେ ଅନେକ କଥା ଆଲୋଚନା ପରିସରକୁ ଆସିଛି। ବିଶେଷକରି ଗାଁଟି ଐତିହ୍ୟ ସମ୍ପନ୍ନ ଥିବାବେଳେ ଏହାର ଭିନ୍ନ ନାଁ ଥିବା କୁହାଯାଇଛି। କେହି ଏହାକୁ ହାଟୁଆରୀ ବୋଲି କହୁଥିବାବେଳେ କେହି ଏହାକୁ ବରୋହି ଗାଁ ବୋଲି କହୁଛନ୍ତି। ଅନ୍ୟପକ୍ଷରେ ଗୋପୀନାଥ ମନ୍ଦିରରେ ଠାକୁର ଗୋପୀନାଥଙ୍କ ସମେତ ଦଧିବାମନ, କାମନାଦେବୀ, ନୃସିଂହ, ରାହସବିହାରୀ ପୂଜା ପାଉଥିଲେ। ବନ୍ୟା ପୂର୍ବରୁ ଗ୍ରାମବାସୀ ସେଠାରୁ ଠାକୁରଙ୍କୁ ଧରି ପଳାଇ ଆସିଥିଲେ। କିନ୍ତୁ ଏହି ମନ୍ଦିର ସେଠାରେ ଥିବା ସମସ୍ତ ମନ୍ଦିରଠାରୁ ଅଧିକ ଉଚ୍ଚା ଥିଲା। ତେଣୁ ଏବେ ତାହା ଦେଖାଯାଉଛି ବୋଲି କୁହାଯାଉଛି। ପୂର୍ବରୁ ୧୧ ବର୍ଷ ତଳେ ମହାନଦୀର ଜଳସ୍ତର କମିବା ପରେ ମନ୍ଦିର ନଜରକୁ ଆସିଥିଲା। କିନ୍ତୁ ସେ ସମୟରେ ମନ୍ଦିର ସମ୍ପର୍କରେ ଖୋଳତାଡ ହୋଇ ନ ଥିଲା। ଏବେ ପ୍ରାୟ ସପ୍ତାହେ ହେଲା ପୁଣି ମନ୍ଦିରର ଚୂଡ଼ା ଦେଖିବାକୁ ମିଳିଛି। ମନ୍ଦିର ଭିତରେ ସେ ସମୟର ଐତିହ୍ୟ ଲୁଚି ରହିଛି, ତେଣୁ ଏହା ପୁନରୁଦ୍ଧାର ହେବାର ଆବଶ୍ୟକତା ରହିଛି ବୋଲି ସାଧାରଣରେ ମତ ପ୍ରକାଶ ପାଇଲାଣି।
ପିଲାଦିନର ସ୍ମୃତିକୁ ମନେ ପକାଇ ପଦ୍ମାବତୀ ଗ୍ରାମର ୯୫ ବର୍ଷର ବୃଦ୍ଧ ଦେବରାଜ ସାହୁଙ୍କ କହିବାନୁଯାୟୀ, ଗୋପୀନାଥ ମନ୍ଦିର ସବୁଠାରୁ ଉଚ୍ଚା ଥିଲା। ମନ୍ଦିର ବେଢ଼ାକୁ ସେ ବାପାଙ୍କ ସହ ଅନେକ ଥର ଯାଇଥିଲେ। ଠାକୁରଙ୍କ ନିକଟରେ ହେଉଥିବା ଭଜନ, ମେଳା ଓ କୀର୍ତ୍ତନରେ ଉପସ୍ଥିତ ରହି ମଜା ନେଇଥିଲେ। ମନ୍ଦିରର କାରୁକାର୍ଯ୍ୟ ଅତୀବ ମନୋରମ ଥିଲା ବୋଲି ସେ କହିଛନ୍ତି।
ଖଣ୍ଡପଡାର ପୂର୍ବତନ ବିଧାୟକ ଅନୁଭବ ପଟ୍ଟନାୟକଙ୍କ କହିବାନୁଯାୟୀ, ଖଣ୍ଡପଡା ରାଜା ନଟବର ସିଂଙ୍କ ମନ୍ତ୍ରୀ ଥିଲେ ଗୁଣ୍ଠୁଣୀ ଗଁାର କୃପାସିନ୍ଧୁ ଛୋଟରାୟ, ଯେ କି ତାଙ୍କ ବଂଶଜ। କୃପାସିନ୍ଧୁଙ୍କ ବାପା କେଶବ ବୈବର୍ତ୍ତାଙ୍କର ପୁଅ ଝିଅ ହେଉ ନ ଥିଲେ। ପୁଅଟିଏ ହେଲେ ଗୋପୀନାଥ ମନ୍ଦିର ନିର୍ମାଣ କରିବେ ବୋଲି କେଶବ ମନାସି ଥିଲେ। କେଶବଙ୍କ ପୁଅ କୃପାସିନ୍ଧୁ ମନ୍ତ୍ରୀ ହେବା ପରେ ମନ୍ଦିର ଗଢ଼ିବାର ସ୍ବପ୍ନ ସଫଳ ହୋଇଥିଲା, ଯାହାକି ୧୮୫୦ ମସିହାର ଘଟଣା ବୋଲି ତାଙ୍କ ବଂଶଜ କହୁଥିଲେ। ତେବେ ସେତେବେଳର ରାଜସ୍ବ ଗାଁ ହାଟୁଆରୀ ବର୍ତ୍ତମାନର ପଦ୍ମାବତୀ ବୋଲି କୁହାଯାଉଛି। ମହାନଦୀ ଗତିପଥ ପରିବର୍ତ୍ତନ କରିବାରୁ ହାଟୁଆରୀ ବୁଡିଗଲା। ପ୍ରାୟ ୧ କିଲୋମିଟର ଦୂରରେ ଗଢ଼ି ଉଠିଲା ହାଟୁଆରୀ ଗାଁ ଲୋକେଙ୍କ ନୂଆ ବସତି, ଯାହାର ନାଁ ରହିଲା ପଦ୍ମାବତୀ। ଗୋପୀନାଥ ମନ୍ଦିରର ଠାକୁର ଓ ଉପର ଚକ୍ର ପଦ୍ମାବତୀର ନୂଆ ଗୋପୀନାଥ ମନ୍ଦିରରେ ରହିଛି। ୨୦୧୮ରେ ନୂଆ ଗୋପୀନାଥ ମନ୍ଦିର ପୂର୍ଣ୍ଣାଙ୍ଗ ହୋଇଛି। ନଦୀ ଗର୍ଭର ମନ୍ଦିରରେ ଠାକୁର ନାହାନ୍ତି। କାରଣ ବନ୍ୟାରେ ମନ୍ଦିର ବୁଡିବା ପୂର୍ବରୁ ଠାକୁରଙ୍କୁ ସ୍ଥାନାନ୍ତର କରାଯାଇଥିଲା। କୃପାସିନ୍ଧୁ ଛୋଟରାୟ ବଞ୍ଚିବା ସମୟରେ ପୁଣି ନୂଆ ମନ୍ଦିର ନିର୍ମାଣ ହୋଇଥିଲା। ପରେ ତାଙ୍କ ପୁଅ ଦାଶରଥି ଛୋଟରାୟ ମନ୍ଦିର ଗଢ଼ିବାରେ ସହଯୋଗ କରିଥିଲେ। ହେଲେ ମନ୍ଦିର ଅପୂର୍ଣ୍ଣାଙ୍ଗ ରହିଯାଇଥିଲା ବୋଲି ଅନୁଭବ କହିଛନ୍ତି।
ସରପଞ୍ଚ ଶ୍ରୀକାନ୍ତ ସାହୁ କୁହନ୍ତି, ତାଙ୍କର ବାପା ଜେଜେ ବାପା କହିବାନୁଯାୟୀ ୧୯୩୩ ମସିହା ବନ୍ୟା ଗୋପୀନାଥ ମନ୍ଦିର ପରି ପ୍ରାୟ ୨୦ରୁ ଊର୍ଦ୍ଧ୍ୱ ମନ୍ଦିରକୁ ବୁଡାଇଦେଲା। ବନ୍ୟା ଯୋଗୁ ଗାଁ ଛାଡ଼ି ଲୋକେ ଅନ୍ୟତ୍ର ଚାଲିଗଲେ। ସେତେବେଳେ ପୁରୁଣା ପଦ୍ମାବତୀ ତଥା ବରୋହି ଗାଁରେ ୭ହଜାରରୁ ଊର୍ଦ୍ଧ୍ୱ ଲୋକ ଥିଲେ। ଏବେ ଗାଁର ଲୋକସଂଖ୍ୟା କମିଯାଇଛି। ତେବେ ମନ୍ଦିର ପୁନରୁଦ୍ଧାର ଦରକାର। ମନ୍ଦିର ଭିତରେ ଠାକୁର ଅଛନ୍ତି ନାଁ ନୂଆ ମନ୍ଦିରକୁ ଆସିଛନ୍ତି ତାହା ଜାଣିବା ନିହାତି ଆବଶ୍ୟକ ବୋଲି ସାହୁ କହିଛନ୍ତି।
ଐତିହ୍ୟ ବିଶାରଦ ସୁରେନ୍ଦ୍ର କୁମାର ମିଶ୍ର କୁହନ୍ତି, ପାଣି ଭିତରେ ବୁଡି ରହିଥିବା ମନ୍ଦିରର ଉପରି ଭାଗ ଦେଖା ଯାଉଥିବାରୁ ମୂଳଦୁଆ ଠିକ୍ ରହିଥିବା ଜଣାପଡୁଛି। ନଦୀର ତଟ ପରିବର୍ତ୍ତନ ଯୋଗୁ ଗୋପୀନାଥ ମନ୍ଦିର ପରି କିଛି ମନ୍ଦିର ପାଣିରେ ବୁଡି ଯାଇଥିବା ଜଣାପଡିଛି। ତେବେ ଉକ୍ତ ମନ୍ଦିର ସୂର୍ଯ୍ୟ ବଂଶର ଶାସକ ପୁରୁଷୋତ୍ତମ ଦେବଙ୍କ ସମୟରେ ନିର୍ମାଣ ହୋଇଥିବା ଅନୁମାନ କରାଯାଉଛି। କାଞ୍ଚି ଅଭିଯାନ ସମୟରେ ନୟାଗଡ, ଖଣ୍ଡପଡ଼ା, ରଣପୁର ଓ ଦଶପଲ୍ଲା ରାଜା ପୁରୁଷୋତ୍ତମ ଦେବଙ୍କୁ ସହଯୋଗ କରିଥିଲେ। ପରବର୍ତ୍ତୀ ସମୟରେ ସୂର୍ଯ୍ୟବଂଶର ପୃଷ୍ଠପୋଷକତାରେ ବିଭିନ୍ନ ମନ୍ଦିର ଗଢ଼ିଉଠିଛି। ୧୬ ଶାସନ ଓ ୩୨ କରମାଡ଼ରେ ଦେବୀ ମନ୍ଦିର, ଶିବ ମନ୍ଦିର ଓ ଗୋପୀନାଥ ମନ୍ଦିର ରହିଛି।