ନୂଆଦିଲ୍ଲୀ,୯-୭: କେନ୍ଦ୍ର ସରକାର ସଭରେନ ବଣ୍ଡ ମାଧ୍ୟମରେ ବିଦେଶରୁ ଋଣ କରିବେ। ଏଥିଲାଗି ସରକାରଙ୍କ ସହିତ ଆଲୋଚନା କରାଯିବ ବୋଲି ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଗଭର୍ନର ଶକ୍ତିକାନ୍ତ ଦାସ ସୋମବାର ପ୍ରକାଶ କରିଛନ୍ତି। ବଜେଟ ପରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କ ସହ ପାରମ୍ପରିକ ବୈଠକ ପରେ ଶକ୍ତିକାନ୍ତ କହିଛନ୍ତି ଯେ, ବଜାରରେ ଯଥେଷ୍ଟ ନଗଦ ରହିଛି ଏବଂ ବଜେଟରେ ଏନ୍୍ବିଏଫ୍ସି ସେକ୍ଟର ଲାଗି ଯଥେଷ୍ଟ ବ୍ୟବସ୍ଥା କରାଯାଇଛି। ସେ କହିଛନ୍ତି ଯେ, ଏନ୍ବିଏଫ୍ସିଙ୍କ କାର୍ଯ୍ୟକଳାପ ଉପରେ ନିର୍ଦ୍ଦିଷ୍ଟ ସମୟ ବ୍ୟବଧାନରେ ନଜର ରଖାଯାଉଛି। ପୁଞ୍ଜିକରଣ ଲାଗି ବ୍ୟାଙ୍କଗୁଡ଼ିକୁ ୭୦ହଜାର କୋଟି ଟଙ୍କା ପ୍ରଦାନ କରାଯିବ ବୋଲି ବଜେଟରେ ବ୍ୟବସ୍ଥା କରାଯାଇଥିବାରୁ ଏହା ଏକ ସକାରାମତ୍କ ପଦକ୍ଷେପ କୁହାଯାଇପାରେ ବୋଲି ଶକ୍ତିକାନ୍ତ କହିଛନ୍ତି। ଗ୍ରାହକଙ୍କ ନିକଟରେ ସୁଧ ହାର ପହଞ୍ଚାଇବା ଲାଗି ଅତିକମ୍ରେ ୬ ମାସ ସମୟ ଲାଗିଥାଏ ବୋଲି ସେ କହିଛନ୍ତି। ବଜେଟରେ ପେଟ୍ରୋଲ ଓ ଡିଜେଲ ଉପରେ ଟିକସ ବୃଦ୍ଧି ସତ୍ତ୍ୱେ ସାମଗ୍ରୀ ଦର ସାମାନ୍ୟ ବଢ଼ିଛି ବୋଲି ଉଲ୍ଲେଖ କରି ସେ କହିଛନ୍ତି ଯେ, ଏହାର ପ୍ରଭାବ ମୁଦ୍ରାସ୍ଫୀତି ଉପରେ ଏବେ ପଡ଼ିଥିବା ଭଳି ମନେ ହେଉନାହିଁ। ସେ କହିଛନ୍ତି ଯେ, ମୁଦ୍ରା ନୀତି ସମୀକ୍ଷା କମିଟିର ପରବର୍ତ୍ତୀ ବୈଠକ ଅଗଷ୍ଟ ପ୍ରଥମ ସପ୍ତାହରେ ବସିବ। ସେ ପର୍ଯ୍ୟନ୍ତ ଆର୍ବିଆଇର ଆଭ୍ୟନ୍ତରୀଣ ଦଳ ତୈଳ ଦର ବୃଦ୍ଧି ଯୋଗୁ ମୁଦ୍ରାସ୍ଫୀତି ଉପରେ ପଡୁଥିବା ପ୍ରଭାବର ବିଶ୍ଲେଷଣ ଜାରି ରଖିବେ ବୋଲି ଗଭର୍ନର ଦାସ କହିଛନ୍ତି।
ଘରୋଇ ବ୍ୟାଙ୍କ ସିଇଓଙ୍କୁ ଭେଟିବେ ଆର୍ବିଆଇ ଗଭର୍ନର
ଚଳିତ ମାସ ଶେଷାର୍ଦ୍ଧରେ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଗଭର୍ନର ଶକ୍ତିକାନ୍ତ ଦାସ ଘରୋଇ କ୍ଷେତ୍ରର ବ୍ୟାଙ୍କଗୁଡ଼ିକର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ମାନଙ୍କୁ ଭେଟିବେ। ଜୁଲାଇ ୨୫ କିମ୍ବା ୨୬ରେ ଏହି ବୈଠକ ଅନୁଷ୍ଠିତ ହେବ ବୋଲି ଜଣାପଡିଛି। ଅଣବ୍ୟାଙ୍କିଙ୍ଗ ଆର୍ଥିକ ସଂସ୍ଥାକୁ ନଗଦ ପ୍ରଦାନ, ଗ୍ରାହକଙ୍କୁ ସୁଧ ହାର ଫାଇଦା ପ୍ରଦାନ,ଏନ୍ପିଏ ଏବଂ ରିଏଲିଟି ସେକ୍ଟର ନେଇ ସେ ସିଇଓଙ୍କ ସହ ଆଲୋଚନା କରିବେ ବୋଲି ଜଣାପଡିଛି। ଏନ୍ପିଏ ସମସ୍ୟାକୁ ଦୃଷ୍ଟିରେ ରଖି ଘରୋଇ ବ୍ୟାଙ୍କଗୁଡ଼ିକ ଅଧିକ ମାତ୍ରାରେ ଋଣ ଦେଉ ନ ଥିବାରୁ ବଜାରରେ ନଗଦ ସଙ୍କଟ ସୃଷ୍ଟି ହେବାର ଆଉ ଏକ କାରଣ କୁହାଯାଉଛି।