ଭୁବନେଶ୍ୱର,୨୬ା୩ (ବ୍ୟୁରୋ): ଦେଶରେ କରୋନା ଭାଇରସର ମୁକାବିଲା ଲାଗି ମଙ୍ଗଳବାର ମଧ୍ୟରାତ୍ରରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମଗ୍ର ଦେଶରେ ଲକ୍ଡାଉନ୍ ଘୋଷଣା କରିଛନ୍ତି। ଆସନ୍ତା ୨୧ଦିନ ପର୍ଯ୍ୟନ୍ତ ଘରୁ ପଦାକୁ ବାହାରିବା ଉପରେ କଟକଣା ଲାଗୁ କରାଯାଇଛି। ଜରୁରୀ କାର୍ଯ୍ୟ କିମ୍ବା ଅତ୍ୟାବଶ୍ୟକ ସାମଗ୍ରୀ କିଣିବା ପାଇଁ ବାହାରକୁ ଯିବାକୁ କେବଳ ଅନୁମତି ରହିଛି। ହେଲେ କିଛି ଲୋକ ନିୟମକୁ ଉଲ୍ଲଂଘନ କରୁଥିବା ଦେଖିବାକୁ ମିଳୁଛି, ଯାହାଫଳରେ ରାଜ୍ୟ ପୋଲିସ କଠୋର ଆଭିମୁଖ୍ୟ ଗ୍ରହଣ କରିବାକୁ ବାଧ୍ୟ ହେଉଛି। ବୁଧବାର ରାଜ୍ୟର ବିଭିନ୍ନ ସ୍ଥାନରେ ପୋଲିସ ଭିନ୍ନଭିନ୍ନ ଉପାୟରେ କଟକଣା ଉଲ୍ଲଂଘନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଥିବା ଦେଖିବାକୁ ମିଳିଥିଲା। କେଉଁଠି ରାସ୍ତାରେ ବୁଲୁଥିବା ଯୁବକଙ୍କୁ କାନ ଧରି ବସ୍ ଉଠ କରୁଥିବାବେଳେ ଅନ୍ୟ କେଉଁଠି ହାତରେ ପ୍ଲାକାର୍ଡ ଧରାଇ ନିନ୍ଦିତ କରୁଥିଲା। ଏପରି କି କେଉଁଠି ଗାଡ଼ି ଜବତ କରି ଜରିମାନା ଆଦାୟ କରୁଥିବା ଦେଖିବାକୁ ମିଳିଥିଲା। ମିଳିଥିବା ତଥ୍ୟ ଅନୁସାରେ ୨୪ମାର୍ଚ୍ଚ ସକାଳଠାରୁ ୨୫ ମାର୍ଚ୍ଚ ସକାଳ ସୁଦ୍ଧା ସମଗ୍ର ରାଜ୍ୟରେ କୋଭିଡ-୧୯ ସମ୍ବନ୍ଧୀୟ ନିର୍ଦ୍ଦେଶାବଳୀ ଉଲ୍ଲଂଘନ କରିବା ଅଭିଯୋଗରେ ୧୪୯ଟି ମାମଲା ରୁଜୁ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏଥିମଧ୍ୟରୁ ୧୭୩ଟି ମାମଲା ‘ଲକ୍ଡାଉନ୍’ ଉଲ୍ଲଂଘନ ନେଇ ରୁଜୁ ହୋଇଥିବାବେଳେ ୫ଟି ମାମଲା ‘ହୋମ୍ କ୍ୱାରାଣ୍ଟାଇନ’ ନିୟମ ଉଲ୍ଲଂଘନ ଅଭିଯୋଗରେ ରୁଜୁ ହୋଇଛି। ଏତଦ୍ବ୍ୟତୀତ ୭ଟି ମାମଲା କୋଭିଡ-୧୯ ସମ୍ବନ୍ଧୀୟ ଅନ୍ୟ ନିର୍ଦ୍ଦେଶାବଳୀ ଖିଲାପ କରିବା ନେଇ ରୁଜୁ ହୋଇଛି। ଭୁବନେଶ୍ୱର ଥାନା ଅଞ୍ଚଳରେ ଶତାଧିକ ବାଇକ୍କୁ ଜବତ କରାଯାଇଥିବାବେଳେ ନିୟମ ଉଲ୍ଲଂଘନକାରୀ ଚାଳକଙ୍କଠାରୁ ୫୦୦ରୁ ୨୦୦୦ ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରାଯାଇଛି। ନିୟମ ଉଲ୍ଲଂଘନ କରି ରାସ୍ତାକୁ ବାହାରିଲେ ଜରିମାନା ସହ ଆବଶ୍ୟକସ୍ଥଳେ ଗିରଫ କରାଯିବ ବୋଲି ଟୁଇନ୍ସିଟି ଅତିରିକ୍ତ ପୋଲିସ କମିଶନର ଅନୁପ କୁମାର ସାହୁ କହିଛନ୍ତି।
ଗୁଟ୍ଖା କିଣିବାକୁ ଯାଇ କାନ ଧରି ବସ ଉଠ
ଭୁବନେଶ୍ୱର ଜୟଦେବ ବିହାର ଛକରେ ୪ଜଣ ଯୁବକ ୨ଟି ବାଇକରେ ଯାଉଥିବାବେଳେ ସେମାନଙ୍କୁ ଟ୍ରାଫିକ ପୋଷ୍ଟ ଚେକିଂରେ ଅଟକା ଯାଇଥିଲା। ହେଲେ ସେମାନେ ନ ମାନି ଖସି ପଳାଇବାକୁ ଚେଷ୍ଟା କରିଥିଲେ। ଏନେଇ ଖବର ପାଇ ବାଣୀବିହାର ଛକରେ କାର୍ଯ୍ୟରତ ପୋଲିସ ସେମାନଙ୍କୁ କାବୁ କରିନେଇଥିଲା। ଏହାପରେ ଉକ୍ତ ୪ ଜଣ ଯୁବକଙ୍କୁ ଯାଞ୍ଚ କରିବା ପରେ ଗୁଟ୍ଖା ଓ ସିଗାରେଟ ଆଣିବାକୁ ସେମାନେ ଯାଇଥିବା ଜଣାପଡ଼ିଥିଲା। ପୋଲିସ ସେମାନଙ୍କୁ କାନ ଧରି ବସ ଉଠ କରାଇବା ସହ ତତଲା ପିଚୁ ଉପରେ କିଛି ସମୟ ବସାଇଥିଲା। ପରେ ପୋଲିସ ସେମାନଙ୍କୁ ଏପରି ଭୁଲ ପୁନର୍ବାର ନ କରିବାକୁ ତାଗିତ କରି ବିଦା କରିଥିଲା।
‘ମୁଁ ସ୍ବାର୍ଥପର, ମୁଁ ସମାଜକୁ ବିପଦକୁ ଠେଲିପାରେ’
ମୁଁ ଗୋଟିଏ ସ୍ବାର୍ଥପର। ମୋ ବୁଲିବା ଚକ୍କରରେ ମୁଁ ସମାଜକୁ ବିପଦକୁ ଠେଲି ପାରେ। ଆଉ ଏଥିପାଇଁ ମୁଁ ଅନୁତପ୍ତ ବି ନୁହେଁ। ପ୍ଲା କାର୍ଡରେ ଲେଖାଥିବା ଏପରି କିଛି ସଚେତନ ବାର୍ତ୍ତାକୁ କନ୍ଧମାଳ ଜିଲା ବାଲିଗୁଡା, କେନ୍ଦୁଝର ଜିଲା ପାଟଣା ପୋଲିସ ନିୟମ ଉଲ୍ଲଂଘନକାରୀଙ୍କ ହାତରେ ଧରାଇ ରାସ୍ତାରେ ଠିଆ କରାଇଥିବା ଦେଖିବାକୁ ମିଳିଥିଲା। ଏପରି କି ସେମାନଙ୍କ ଫଟୋ ଉତ୍ତୋଳନ କରି ଚେତାବନୀ ଦେଇଥିଲା। ପୋଲିସର ଏଭଳି ଅଭିନବ ଢ଼ଙ୍ଗରେ ସଚେତନକୁ ବିଭିନ୍ନ ମହଲରୁ ପ୍ରଶଂସା କରାଯାଇଛି।