ଅନୁଗୋଳ ଅଫିସ, ୧୧।୬
ଅନୁଗୋଳ ଜିଲାପାଳଙ୍କ କାର୍ଯ୍ୟାଳୟ ପ୍ରକୋଷ୍ଠରେ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ସମଗ୍ର ଶିକ୍ଷା ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଜିଲାରେ ୬୦ଟି ଛୋଟ ବିଦ୍ୟାଳୟକୁ ୫୬ଟି ବଡ଼ ବିଦ୍ୟାଳୟରେ ମିଶ୍ରଣ ପାଇଁ ସରକାରଙ୍କ ପ୍ରସ୍ତାବର ସମୀକ୍ଷା କରାଯାଇଥିଲା। ଗ୍ରୀଷ୍ମ ଛୁଟି ଶେଷ ହେବାପରେ ଏହି କାର୍ଯ୍ୟକୁ ପ୍ରାଥମିକତା ଭିତ୍ତିରେ ଶେଷ କରିବାକୁ ଜିଲାପାଳ କହିଥିଲେ। ସେହିପରି ୧୦ରୁ କମ୍ ଛାତ୍ରୀଛାତ୍ର ଥିବା ଜିଲାର ୬୪ଟି ବିଦ୍ୟାଳୟକୁ ବନ୍ଦ କରିବା ପାଇଁ ସରକାର ଦେଇଥିବା ନିର୍ଦ୍ଦେଶକୁ ସମୀକ୍ଷା କରି ସବିଶେଷ ବିବରଣୀ ଉପସ୍ଥାପନ କରିବାକୁ ଗୋଷ୍ଠୀ ଶିକ୍ଷା ଅଧିକାରୀମାନଙ୍କୁ ଜିଲାପାଳ ମହାନ୍ତି ନିର୍ଦ୍ଦେଶ ଦେଇଥିଲେ। ଶିକ୍ଷଣ ପ୍ରଗତି କାର୍ଯ୍ୟକ୍ରମ ପୁସ୍ତିକା ବଣ୍ଟନ କରିବାକୁ ବୈଠକରେ କୁହାଯାଇଥିଲା। ସେହିପରି ବିଦ୍ୟାଳୟରେ ଥିବା ଶୌଚାଳୟ ଗୁଡ଼ିକ ବ୍ୟବହାର ପାଇଁ ପଦକ୍ଷେପ ଗ୍ରହଣ କରିବା ସହ ପ୍ରତି ବିଦ୍ୟାଳୟରେ ସ୍ଥାୟୀ ବିଦ୍ୟୁତ୍ ସଂଯୋଗ, ଛାତ୍ରୀଛାତ୍ରମାନଙ୍କ ତଥ୍ୟ ସମ୍ବଳିତ ସୂଚନାର ନବୀକରଣ କାର୍ଯ୍ୟକ୍ରମଗୁଡ଼ିକର ପ୍ରଗତି କେତେ ଦୂର ହୋଇଛି ତାହାର ସମୀକ୍ଷା କରିବାକୁ ମଧ୍ୟ ବୈଠକରେ ଜିଲାପାଳ ନିର୍ଦ୍ଦେଶ ଦେଇଥିଲେ। ଗତ ମାସରେ ରାଜ୍ୟରେ ଅନୁଗୋଳ ଜିଲା ସାଥ୍ କାର୍ଯ୍ୟକ୍ରମରେ ନବମ ସ୍ଥାନରେ ରହିଥିଲା। ଜିଲାର ସ୍ଥିତିରେ ଉନ୍ନତି ଆଣିବା ମନୋଭାବ ନେଇ କାର୍ଯ୍ୟକରିବାକୁ ଜିଲାପାଳ ନିର୍ଦ୍ଦେଶ ଦେଇଥିଲେ। ଏହି ବୈଠକରେ ଜିଲାପାଳ ଅଧ୍ୟକ୍ଷତା କରିଥିବାବେଳେ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଜିଲା ଗ୍ରାମ୍ୟ ଉନ୍ନୟନ ନିର୍ଦ୍ଦେଶକ ଅତୁଲ୍ୟ କୁମାର ଚମ୍ପତିରାୟ, ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରା, ଜିଲା ପ୍ରକଳ୍ପ ସଂଯୋଜକ ନିରଞ୍ଜନ ସାହୁଙ୍କ ସହ ୮ଟି ବ୍ଲକର ଗୋଷ୍ଠୀ ଶିକ୍ଷା ଅଧିକାରୀ, ସମଗ୍ର ଶିକ୍ଷା କାର୍ଯ୍ୟକ୍ରମର ସଂଯୋଜକ ସମୂହ ଉପସ୍ଥିତ ରହିଥିଲେ।