ଢେଙ୍କାନାଳ ଅଫିସ, ୨୭।୭ – ଢେଙ୍କାନାଳକୁ ଫାଇଲେରିଆମୁକ୍ତ କରିବାକୁ ଅଣ୍ଟା ଭିଡ଼ିଛି ଜିଲା ପ୍ରଶାସନ। ଏ ନେଇ ଶୁକ୍ରବାର ଅପରାହ୍ନରେ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଆୟୋଜିତ ହୋଇଛି ଜିଲା ସମନ୍ବୟ ବୈଠକ। ଜିଲାପାଳ ଭୂମେଶ ଚନ୍ଦ୍ର ବେହେରା ଏଥିରେ ଅଧ୍ୟକ୍ଷତା କରି କହିଲେ, ଫାଇଲେରିଆର ମୂଳୋତ୍ପାଟନ କରିବାକୁ ସବୁ ବିଭାଗର ସହଯୋଗ ଆବଶ୍ୟକ। ବିଧି ଅନୁଯାୟୀ ଔଷଧ ସେବନ କଲେ ଜିଲା ରୋଗମୁକ୍ତ ହୋଇପାରିବ ବୋଲି ସେ ଆହ୍ବାନ ଦେଇଥିଲେ।
ଅଗଷ୍ଟ ୮, ୯ ଏବଂ ୧୦ରେ ଫାଇଲେରିଆ ଔଷଧ ବିତରଣ କରାଯିବ। କେବଳ ଔଷଧ ବାଣ୍ଟିଦେଲେ ହେବନାହିଁ। ଏହାକୁ ଯେପରି ସମସ୍ତେ ସେବନ କରିବେ ସେଥିଲାଗି ନଜର ଦେବା ଜରୁରୀ। ଏଥିପାଇଁ ସରପଞ୍ଚ, ୱାର୍ଡମେମ୍ବର,ଏସ୍ଏଚ୍ଜି ସଦସ୍ୟ, ଗଁା କଲ୍ୟାଣ ସମିତି, ଆଶା, ଅଙ୍ଗନଓ୍ବାଡି କର୍ମୀ, ସ୍ବେଚ୍ଛାସେବୀ ଅନୁଷ୍ଠାନର କର୍ମକର୍ତ୍ତାଙ୍କୁ ପ୍ରଶିକ୍ଷଣ ଦେବାକୁ ସ୍ବାସ୍ଥ୍ୟ ବିଭାଗ ଅଧିକାରୀଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଫାଇଲେରିଆ ରୋଗୀ ଚିହ୍ନଟ ହେଉଥିବା ଅଞ୍ଚଳକୁ ଅଧିକ ଫୋକସ୍ କରିବା, ସମ୍ପୃକ୍ତ ଅଞ୍ଚଳରେ ପ୍ରତିଷେଧକ ବ୍ୟବସ୍ଥା କରିବା, ବିଦ୍ୟାଳୟରେ ସଚେତନତା ସୃଷ୍ଟି, ଗ୍ରାମାଞ୍ଚଳରେ ଶୋଭାଯାତ୍ରା, ନିର୍ଦ୍ଧାରିତ ଦିବସରେ ଔଷଧ ସେବନ ଆଦି ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା।
ଜିଲା ଚିକିତ୍ସାଧିକାରୀ ଡା. ନିରଞ୍ଜନ ମିଶ୍ର କହିଲେ, ୨ବର୍ଷରୁ କମ୍ ବୟସର ଶିଶୁ, ଗର୍ଭବତୀ, ଦୀର୍ଘଦିନ ଧରି ରୋଗରେ ପଡ଼ିଥିବା ବ୍ୟକ୍ତିଙ୍କୁ ବାଦ୍ ଦେଲେ ଅନ୍ୟ ସମସ୍ତେ ଔଷଧ ସେବନ କରିପାରିବେ। ଏକା ଦିନରେ ସମସ୍ତେ ଔଷଧ ଖାଇଲେ ବାତଜ୍ୱର କୀଟାଣୁ ମରିଯିବା ସମ୍ଭାବନା ଅଧିକ। ଫଳରେ ରୋଗ ବ୍ୟାପିବା ଆଶଙ୍କାକୁ ଅନେକାଂଶରେ ଏଡ଼ାଇ ଦିଆଯାଇପାରିବ। ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଜ୍ୟୋତିଷ ଚନ୍ଦ୍ର ମହାପାତ୍ର ରୋଗର ପ୍ରଭାବ ଓ ନିରାକରଣ ସମ୍ପର୍କରେ ଆଲୋଚନା କରିଥିଲେ। ଜିଲା ଭେକ୍ଟର ବାହିତ ରୋଗ ପରାମର୍ଶଦାତା ତପନ କୁମାର ସାହୁ ପାୱାର ପଏଣ୍ଟ ମାଧ୍ୟମରେ ଉପସ୍ଥିତ ସଦସ୍ୟଙ୍କୁ ସଚେତନ କରାଇଥିଲେ।
ବୈଠକରେ ଏଡିଏମ୍ଓ (ମେଡିକାଲ) ଡା. ସଙ୍କଳ୍ପ କେଶରୀ ଭୋଳ, ଜିଲା ସମାଜ ମଙ୍ଗଳ ଅଧିକାରୀ ଅହଲ୍ୟା ଧଳ, ଜିଲା ମଙ୍ଗଳ ଅଧିକାରୀ ମାନସ ରଞ୍ଜନ ମିଶ୍ର, ଜିଲା ସ୍ବାସ୍ଥ୍ୟ ମିଶନ କାର୍ଯ୍ୟକ୍ରମ ପରିଚାଳିକା ସୋନାଲି ପ୍ରିୟଦର୍ଶିନୀ, ଅର୍ଥ ପରିଚାଳକ ଧୀରେନ୍ଦ୍ର ନନ୍ଦ, ସୁପରଭାଇଜର ନଗର ମୋହନ ମହାନ୍ତି, ସୁକାନ୍ତ କୁମାର ଚାନ୍ଦ ପ୍ରମୁଖ ଉପସ୍ଥିତ ଥିଲେ। ସହକାରୀ ଜିଲା ଜନସ୍ବାସ୍ଥ୍ୟ ଅଧିକାରୀ (ପରିବାର କଲ୍ୟାଣ) ଡା. ବିଦ୍ୟୁତ୍ କୁମାର ନନ୍ଦ ଧନ୍ୟବାଦ ପ୍ରଦାନ କରିଥିଲେ।