ଭୁବନେଶ୍ୱର,୩୦।୪(ବ୍ୟୁରୋ): କରୋନା(କୋଭିଡ୍-୧୯) ସଂକ୍ରମଣ ଆଶଙ୍କାରେ ସମଗ୍ର ଦେଶ ମାସେରୁ ଊର୍ଦ୍ଧ୍ୱକାଳ ଧରି ଲକ୍ଡାଉନରେ ରହିଛି। ଲକ୍ଷଲକ୍ଷ ଲୋକ ଅସହାୟ ଅବସ୍ଥାରେ ବିଭିନ୍ନ ରାଜ୍ୟରେ ଫସି ରହିଛନ୍ତି। ସେଠାରେ ସେମାନଙ୍କୁ କାମଧନ୍ଦା ମିଳୁ ନ ଥିବାରୁ ନିଜ ଭିଟାମାଟିକୁ ଫେରିବାକୁ ବ୍ୟାକୁଳ ହେଉଛନ୍ତି। ତେବେ ଅନ୍ୟ ରାଜ୍ୟରେ ଫସିଥିବା ଲୋକମାନେ କିଭଳି ସୁରକ୍ଷିତ ଭାବେ ନିଜ ଗ୍ରାମକୁ ଫେରିବେ ଓ ସେମାନଙ୍କ କୋଭିଡ୍ ପରୀକ୍ଷା କରାଯିବ ସେନେଇ ରାଜ୍ୟ ସରକାର ପଞ୍ଚାୟତ ଓ ପାୈରାଞ୍ଚଳରେ ଅସ୍ଥାୟୀ ଚିକିତ୍ସା କ୍ୟାମ୍ପ ବା କ୍ୱାରାଣ୍ଟାଇନ୍ ସେଣ୍ଟର ଖୋଲିଛନ୍ତି। ଅନ୍ୟ ରାଜ୍ୟରୁ ଲୋକମାନେ କିଭଳି ସୁରକ୍ଷିତ ଭାବେ ନିଜ ରାଜ୍ୟକୁ ଫେରିବେ ସେ ନେଇ ଏସଓପି(ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ପ୍ରସ୍ତୁତ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭିଡିଓ କନ୍ଫରେନ୍ସିଂ ଆଲୋଚନାବେଳେ ପ୍ରସ୍ତାବ ଦେଇଥିଲେ। ବୁଧବାର କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ଲୋକଙ୍କ ଆନ୍ତଃରାଜ୍ୟ ପରିବହନ ନେଇ ଏକ ଗାଇଡ୍ଲାଇନ ବା ନିର୍ଦ୍ଦେଶନାମା ଜାରି କରିଛି। ବିଭିନ୍ନ ରାଜ୍ୟରେ ଫସି ରହିଥିବା ଶ୍ରମିକ, ତୀର୍ଥଯାତ୍ରୀ, ପର୍ଯ୍ୟଟକ, ଛାତ୍ରୀଛାତ୍ର, ଏବଂ ଅନ୍ୟାନ୍ୟ ଲୋକମାନେ କିପରି ବିନା ବାଧାରେ ଫେରି ପାରିବେ ସେନେଇ ଏହି ନିର୍ଦ୍ଦେଶନାମା ଜାରି କରାଯାଇଛି। ଅନ୍ୟ ରାଜ୍ୟରେ ଫସି ରହିଥିବା ଲୋକଙ୍କୁ ନିଜ ରାଜ୍ୟରୁ ପଠାଇବା ଏବଂ ଗ୍ରହଣ କରିବା ପାଇଁ ପ୍ରତ୍ୟେକ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳଗୁଡ଼ିକ ସ୍ବୀକୃତିପ୍ରାପ୍ତ ନୋଡାଲ କର୍ତ୍ତୃପକ୍ଷ ଗଠନ କରିବା ସହ ଏକ ଷ୍ଟାଣ୍ଡାର୍ଡ ପ୍ରୋଟୋକଲ ବିକାଶ କରିବାକୁ ସ୍ବରାଷ୍ଟ୍ର ମନ୍ତ୍ରଣାଳୟ ପରାମର୍ଶ ଦେଇଛି। ନୋଡାଲ କର୍ତ୍ତୃପକ୍ଷ ଲୋକଙ୍କ ପଞ୍ଜୀକରଣ କରିବା ଆବଶ୍ୟକ। ଯଦି ଫସି ରହିଥିବା ଲୋକମାନେ ଗୋଟିଏ ରାଜ୍ୟରୁ ଅନ୍ୟରାଜ୍ୟକୁ ଯିବାକୁ ଚାହିଁବେ ତେବେ ଉଭୟ ରାଜ୍ୟ ପରସ୍ପର ମଧ୍ୟରେ ସମନ୍ବୟ ରକ୍ଷା କରି ମିଳିତ ଭାବେ ସଡ଼କ ପଥରେ ଯିବାକୁ ଅନୁମତି ଦେବାକୁ କୁହାଯାଇଛି। ସେହିପରି ଅନ୍ୟ ରାଜ୍ୟକୁ ଯାଉଥିବା ଲୋକଙ୍କୁ ସ୍କ୍ରିନିଂ କରି ଛାଡ଼ିବାକୁ କୁହାଯାଇଛି। ଯଦି କେହି ସାମାନ୍ୟ ଅସୁସ୍ଥ ଅନୁଭବ କରୁଥିବେ ତେବେ ସେମାନଙ୍କୁ ଯିବା ପାଇଁ ଅନୁମତି ଦେବାକୁ ପରାମର୍ଶ ଦିଆଯାଇଛି। ନିଜ ରାଜ୍ୟରେ ପହଞ୍ଚତ୍ବା ପରେ ସ୍ଥାନୀୟ ସ୍ବାସ୍ଥ୍ୟ ଅଧିକାରୀଙ୍କ ଦ୍ୱାରା ସେମାନଙ୍କ ସ୍ବାସ୍ଥ୍ୟ ପରୀକ୍ଷା କାରାଯିବ। ଯଦି କେହି ଗୁରୁତର ନ ଥିବେ ତେବେ ସେମାନଙ୍କ ପାଇଁ ପ୍ରସ୍ତୁତ କରାଯାଇଥିବା ସରକାରୀ କ୍ୱାରାଣ୍ଟାଇନ୍ରେ ନ ରଖି ନିଜ ଘରେ କ୍ୱାରାଣ୍ଟାଇନରେ ରଖାଯିବ। ସେମାନଙ୍କ ସ୍ବାସ୍ଥ୍ୟ ଉପରେ ନଜର ରଖିବାସହିତ ନିୟମିତ ବ୍ୟବଧାନରେ ସ୍ବାସ୍ଥ୍ୟ ପରୀକ୍ଷା କରିବାକୁ ପରାମର୍ଶ ଦିଆଯାଇଛି।