ତିହିଡ଼ି, ୧୨।୭ (ଡି.ଏନ.ଏ.): ଭଦ୍ରକ ଜିଲା ତିହିଡ଼ି ଥାନା ଅଧୀନ ଗୁଆମାଳ ସେବା ସମବାୟ ସମିତିରୁ ୫ ଲକ୍ଷ ଟଙ୍କା ହଡ଼ପ ହୋଇଛି। ସମିତିର ଉପସଭାନେତ୍ରୀ ଚୁମାରାଣୀ ଜେନା ଗୁରୁବାର ଏ ସମ୍ପର୍କରେ ତିହିଡ଼ି ଥାନାରେ ଅଭିଯୋଗ କରିଥିଲେ। ପୋଲିସ ଏହି ଘଟଣାରେ ଏକ ମାମଲା(ନଂ.୩୦୬/୧୯) ରୁଜୁ କରି ଶୁକ୍ରବାର ସମିତିର ପୂର୍ବତନ ସମ୍ପାଦକ ଆର୍ତ୍ତବନ୍ଧୁ ଜେନାଙ୍କୁ ଗିରଫ କରି କୋର୍ଟ ଚାଲାଣ କରିଛି। ଏହି ସମବାୟ ସମିତିରେ ଆର୍ତ୍ତବନ୍ଧୁ ସମ୍ପାଦକ ଥିଲାବେଳେ ବିଭିନ୍ନ ଆର୍ଥିକ ଅନିୟମିତତା କରିଥିବା ନେଇ ଅଭିଯୋଗ ହୋଇଥିଲା। ପରେ ସମ୍ପାଦକ ଜେନାଙ୍କୁ ନିଲମ୍ବନ କରାଯାଇଥିଲା। ଉପସଭାନେତ୍ରୀ ଜେନା ସମିତିରୁ ଆର୍ତ୍ତବନ୍ଧୁ ୫ ଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ କରିବା ପରେ ପୋଲିସ ଏହି ପଦକ୍ଷେପ ନେଇଛି।