ଜାମଟିକ୍ରା, ୨୧।୮ (ଡି.ଏନ୍.ଏ): କେନ୍ଦ୍ର ଆର ରାଏଜ୍ ସରକାର ଗାଁଗଁଲିର ବିକାଶ ଲାଗି ଅନେକ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ଯୋଜନାକେ କାଯ୍କାରୀ କରୁଥିବାର ଅଧ୍କାରୀ, କରମ୍ଚାରୀ ଆର ଥାନୀୟ ନେତାକର ଉଦାସିନ୍ତା ଲାଗି ସରକାରକଁର ଇ ମହତ୍ ଯୋଜନାମାନ୍ ବାଟବନା ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ର ଭୁତଟିକ୍ରା ଗାଁରେ।
ସୂଚନା ହିସାବେ ଅତାବିରା ବ୍ଲକ ସଦରନୁ ୭ କି.ମି. ଦୂରେ ରହିଛେ ଭୁତଟିକ୍ରା। ଗାଁରେ ପାଖାପାଖି ୩ଶହରୁ ଅଧ୍କା ଲୋକ୍ ବାସ୍ କରୁଛନ୍। ସେନ୍ତା ଗାଁର ବଡ଼ଭାଗି ଲୋକ୍ ଚାଷବାସ ଉପରେ ନିରଭର କରି ନିଜର ଜୀବନ୍ ଜୀବ୍କା ଚଲଉଛନ୍। ହେଲେ ଗାଁବାସୀକର ସବୁଥିରୁ ବଡ଼ ଦୁଖ୍ ହେଉଛେ ଗାଁକେ ଭଲ ରାସ୍ତା ଖଁଡ଼େ ନଁାଇଁନ। ଯେନ୍ଥିରଲାଗି ବରଷା ଦିନେ ଗାଁବାସୀ ନାନା ସମସିଆର ସାମନା କରୁଛନ୍। ବରଷାରେ ଗାଁ ରାସ୍ତାଟା କାଦୋ ସରସର ହେଇଯାଉଛେ। ଗାଡ଼ିମଟର ତ ଦୂରର କଥା ଇ ରାସ୍ତାରେ ଝନେ ସାଧା ଲୋକ୍ ଚାଲିକରି ଯିବାରଟା ଭିଡ଼୍ ପଡ଼ୁଛେ। ସେନ୍ତା ଗାଁରେ ଗୁଟେ ଅଙ୍ଗନଓ୍ବାଡି କେନ୍ଦ୍ର ରହିଛେ। ହେଲେ କେନ୍ଦ୍ରର ନିଜର ଘର ନାଇଁଥିବାର ଲାଗି ଗାଁର କ୍ଲବ ଘରେ ପାଠ୍ପଢ଼ା ଚାଲିଛେ। ଗାଁରେ ପ୍ରାଥମିକ ସ୍କୁଲ ନଁାଇଁନ, ଯେନ୍ଥିରଲାଗି ଗାଁର ଛାତ୍ରୀଛାତ୍ର ୧ କି.ମି. ଦୂର ବୁଗବୁଗା ସ୍କୁଲକେ ପାଠ୍ପଢ଼ି ଯାଉଛନ୍। ସେନ୍ତା ହାଇସ୍କୁଲ ଲାଗି ଛାତ୍ରୀଛାତ୍ର ୩ କି.ମି. ଦୂର ପତ୍ରାପାଲିକେ ଯାଉଛନ୍। ହେଲେ ବରଷା ଦିନେ ଗଁାର ଛାତ୍ରୀଛାତ୍ରମାନେ ରାସ୍ତାରେ ଅଁାଠେ ପାନି କାଦୋ ଭିତରେ ଯାଆସ କରୁଛନ୍। ଗଁାରେ ଗୁଟେ ନଲ୍ଚୁଅଁା ଆର ଗୁଟେ ସୋଲାର ପାତାଲ ବୋରିଂ ଅଛେ। ସେନ୍ତା ଗଁାର ଟାଙ୍ଗରପଡ଼ାରେ ନଲ୍ଚୁଅଁା ଅଭାବୁ ଲୋକ୍ ଖୁଲା ଚୁଅଁାର ପାଏନ୍ ଖାଏବା ପିଇବାରେ ବେଭାର କରୁଛନ୍। ଗଁାର ଋଷି କର୍ଣ୍ଣ(୭୦)କଁର ଲେଖେଁ ଅନେକ୍ ବୁଢ଼ାବୁଢ଼ି ଭତା ପାଏବାରୁ ବଁଚିତ୍ ହେଇ ରହିଛନ୍। ଶେଷଦେବ କର୍ଣ୍ଣକଁର ଲେଖେଁ ଅନେକ୍ ଗରିବ୍ ହକ୍ଦାର ହିତାଧିକାରୀ ଆବାସ ଯୋଜନାରୁ ବଁଚିତ୍ ହେଇ ରହିଛନ୍। ସେନ୍ତା ଗଁାରୁ ଖଁଡ଼େ ଦୂରେ କୁଚିଆ ମଦ୍ ବିକ୍ରି ହେଉଛେ। ଯେନ୍ଥିରଲାଗି ଗଁାରେ ଅସାମାଜିକ କାଯ୍, ଚୁରିହାରି ବଢ଼ବାରେ ଲାଗିଛେ ବଲି ଗଁାବାସୀ ଅଭିଯୋଗ କରିଛନ୍। ଗଁାର ସମସିଆ ବାବ୍ଦେ ଗଁାବାସୀ ଥାନୀୟ ସରପଁଚ୍, ବିଡିଓ, ଥାନୀୟ ବିଧାୟିକାକୁଁ ବାରବାର ଗୁହାରି କରି ନିରାଶ ହେଇଥିବାର କହିଛନ୍। ଯଦି ଆଏବାର ଦିନେ ଗଁା ରାସ୍ତା ତିଆର ନାଇଁ ହେବା ଗଁାବାସୀ ରାଜ୍ ରାସ୍ତାକେ ଉତିରମୁ ବଲି ଚେତାବନୀ ଦେଇଛନ୍। ଇ ବାବ୍ଦେ ଥାନୀୟ ସରପଁଚ୍ ପୁଷ୍ପକାନ୍ତି ସେଟକୁଁ ପଚରାଲାରୁ ସମସିଆର ସମାଧାନ ଲାଗି ଯେତେ ଜଲଦି ହେବା ପଦକ୍ଷେପ ନିଆଯିବା ବଲି ସେ କହିଥିଲେ।