ମନମୁଣ୍ଡା, ୨୭।୭ (ଡି.ଏନ୍.ଏ)
ବୌଦ୍ଧ ଜିଲା ମନମୁଣ୍ଡା ସରକାରୀ ଉଚ୍ଚ ପ୍ରାଧମିକ ବିଦ୍ୟାଲୟ ଏହେଦେ ୧୩୮ ବଛର୍ରେ ପୁହୁଁଚିଛେ। ଦିନ୍ ଥିଲା ଇ ସ୍କୁଲର ବହୁତ ନଁା ଥିଲା। ଦୂରିଆ ଗଁାଗଁଡ଼ାରୁ ଛାତ୍ରୀଛାତ୍ର ଇ ସ୍କୁଲକେ ପାଠ୍ ପଢ଼ବାର ଲାଗି ଆସୁଥିଲେ। ହେଲେ ଏହେଦେ ସ୍କୁଲଟା ନାନା ସମସିଆ ଘେରରେ ରହିଛେ।
ସୂଚନା ହିସାବେ ସ୍କୁଲଟା ରାଜାଡ଼ି ଅମଲରେ ୧୮୮୧ ସାଲେ ଥାପନା ହେଇଥିଲା। ଅଂଚଲର ଅନେକ ଛାତ୍ରୀଛାତ୍ର ଇ ସ୍କୁଲରେ ପାଠ୍ପଢ଼ି ଭଲ ମୁନୁଷ୍ ହେଇପାରିଛନ୍। ଏହେଦେ ସ୍କୁଲରେ ୮ଟା ଶ୍ରେଣୀରେ ୧୪୪ ଛାତ୍ରୀଛାତ୍ର ପାଠ୍ ପଢ଼ୁଛନ୍। ଛାତ୍ରୀଛାତ୍ରକର ଲାଗି ୬ଟା ପଢ଼ାକୁଠି ରହିଥିଲାବେଲେ ସେଥ୍ରୁ ୩ଟା ପୂରା ଦଦ୍ରା ହେଇ ପଡ଼ିଛେ, ବାକି ୩ଟା କୁଠିରେ ପାଠ୍ପଢ଼ା ହେଉଛେ। ଯେନ୍ ୩ଟା କୁଠିଥି ପିଲା ପାଠ୍ ପଢ଼ୁଛନ୍ ସେ କୁଠିମାନକର ଛାତୁ ବି ସିମେଟ ଛାଡ଼ି ଲୁହା ଛଡ଼୍ ଦିଶୁଛେ। ଅଲପ ବରଷାରେ ଦରୋ ଦରୋ ପାଏନ୍ ଗଲୁଥିବାର ଶିକ୍ଷକ ବିଶ୍ୱାମିତ୍ର ଭୋଇ କହିଛନ୍। ଜାଗାଠାନ୍ ଅଭାବୁ ୮ମ ଶ୍ରେଣୀର ଛାତ୍ରୀଛାତ୍ର ପାସେ ଥିବାର ଆଞ୍ଚଳିକ ସାଧନକେନ୍ଦ୍ର କୁଠିଥି ବସି ପାଠ୍ ପଢ଼ୁଥିଲାବେଲେ ବାକି ଛାତ୍ରୀଛାତ୍ର ବାରନ୍ଡ଼ାରେ ବସି ପାଠ୍ ପଢ଼ୁଛନ୍। ସ୍କୁଲର ଇ ଅବସ୍ତା ଦେଖି ଅନେକ ଅଭିଭାବକ ନିଜର ଛୁଆପିଲାକର ନଁା ଉନିଅଁା ସ୍କୁଲମାନକେ ଲେଖଉଛନ୍। ସୂଚନା ହିସାବେ ସ୍କୁଲଟା ୨ ଏକର ୫୨ ଡେସିମିଲ ଜାଗାରେ ରହିଛେ। ହେଲେ ଦୁଖର କଥା ସ୍କୁଲର ଏତେ ବଡ଼ ଜାଗା ଥିଲେ ବି ପିଲାକର ଖେଲବାର ଲାଗି ଇଁଚେ ମେଲା ଜାଗା ନଁାଇଁନ। ସବୁଆଡ଼େ ଭଂଗା ଦଦ୍ରା ପୁରନା ପଢ଼ାକୁଠିମାନ ଲଟାବୁଟା ହେଇ ପଡ଼ି ରହିଛେ। ସ୍କୁଲର ଚାର୍ହିକୁତି ଶତାଧିକ୍ ପୁରନା ଶାଗୁଆନ ଗଛ ଥିଲା, ହେଲେ ଏହେଦେ ସେଥ୍ରୁ ୭୫ ଭାଗ୍ ଗଛ୍ ନଁାଇଁନ। ସ୍କୁଲରେ ଝନେ ପିଅନ ରହୁଥିଲେ ବି ବାହାରିଆ ଲୋକ୍ ପରିସର ଭିତରେ ଗାଡ଼ିମଟର ରଖୁଛନ୍। ସେନ୍ତା ରାତିରେ ବାହାରିଆ ଲୋକ ସ୍କୁଲ ପରିସରରେ ମଦ୍ପାଏନ୍ ପିଇବାର ସଂଗେ ଝାଡ଼ାଝପଟ ଯାଇ ପରିବେଶକେ ଅସକଟିଆ କରୁଛନ୍। ସ୍କୁଲର ଦକ୍ଷିଣ, ପଶ୍ଚିମ ଆର ପୂର୍ବ ଦିଗେ କେତେ ଜାଗାରେ ବାଡ଼ା ନଁାଇଁନ, ଯେନ୍ଥିରଲାଗି ଗାଈଗୋରୁ, ଘୁଷ୍ରି ସ୍କୁଲ ପରିସରରେ ହରମେଶା ବୁଲୁଛନ୍। ଅଂଚଲର ଇ ପୁରାତନ ଶିକ୍ଷାନୁଷ୍ଠାନର ଉନ୍ନତି ଲାଗି ଶିକ୍ଷକ ପଦବୀ ପୂରନ, ଚାର୍ହିକୁତି ବାଡ଼ା, ଭଂଗା ଦଦ୍ରା କୁଠିମାନକର ଜାଗାରେ ନୂତନକୁଠି ତିଆର, ସ୍କୁଲ ପରିସର ସଫାସୁତର କରି ଛାତ୍ରୀଛାତ୍ରକଁର ଲାଗି ଖେଲପଡ଼ିଆ ତିଆର କରବାକେ ପୁରାତନ ଛାତ୍ର ଗରିବ ଲୋଇ, କୁଶଧ୍ୱଜ ସାହୁ, ପଦ୍ମମୁଖ ସାହୁ, ବଜରଙ୍ଗ ଅଗ୍ରଓ୍ବାଲ, ସରପଁଚ୍ ମିନାକ୍ଷୀ ସାହୁ ପରମୁଖ ଦାବି କରିଛନ୍। ଇ ବାବ୍ଦେ କଣ୍ଟାମାଳ ବିଡିଓ ଦଶରଥ ମେହେରକୁଁ ପଚରାଲରୁ ସ୍କୁଲ ସମସିଆ ବାବ୍ଦେ ସରକାରକୁଁ ଜନେଇଁ ଦେଇଛେଁ ଆର ପଞ୍ଚାୟତିରାଜ ବିଭାଗ ସ୍କୁଲରେ ପଢ଼ାକୁଠି ତିଆର କରବାର ଯୋଜନା କରୁଛେ ବଲି ସେ କହିଥିଲେ।