ଅତାବିରା, ୯।୩ (ଡି.ଏନ୍.ଏ.)- କେନ୍ଦ୍ର ଆର ରାଏଜ୍ ସରକାର ଲୁକ୍କୁ ସୁଆସ୍ତିଅ ସେବା ଯୁଗେଇ ଦେବାରଲାଗି ଅନେକ ଯୋଜନା କାଯ୍କାରୀ କରୁଛନ୍। ସେନ୍ତା ଲୋକ ସଂଖ୍ୟା ଦେଖି ଅନେକ ଜାଗାରେ ନୂତନ ଡାକ୍ତରଖାନା ଖୁଲୁଛନ୍। ହେଲେ ଅନେକ ଜାଗାରେ ଡାକ୍ତର, କରମଚାରୀ, କୁଠା ଅଭାବ ଥିଲାବେଲେ ଆରକେନ୍ଠାନେ ଡାକ୍ତର ନାଇଁ ଆଏବାର ଲାଗି ରୁଗୀ ଦହଗଁଜ୍ ହେଉଥିବାର ଅଭିଯୋଗ ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ ଜିଲା ଅତାବିରା ବ୍ଲକ ଲରମ୍ଭା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ।
ସୂଚନା ଅନ୍ସାରେ ଲରମ୍ଭା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଝନେ ଏମ୍ବିବିଏସ୍, ଝନେ ଆୟୁଷ ଡାକ୍ତର, ଝନେ ଫାର୍ମାସିଷ୍ଟ ଆର ଝନେ ପିଅନ୍ ରହିଛନ୍। ଡାକ୍ତରଖାନା ପରିସରରେ ଡାକ୍ତରମାନେ ରହିବାର ଲାଗି ସରକାରୀ କ୍ୱାର୍ଟର୍ସ ବି ରହିଛେ। ହେଲେ ଉଭଏ ଡାକ୍ତର କ୍ୱାର୍ଟର୍ସରେ ନାଇଁ ରହିବାର ଲାଗି ଅନେକ ସମିଆରେ ଚିକିଛା ଲାଗି ଆସୁଥିବାର ରୁଗୀମାନେ ଦହଗଁଜ୍ ହେଉଥିବାର ଦେଖ୍ବାକେ ମିଲୁଛେ। ଗଲା ଶନିବାର ଥାନୀଅ ଧରିତ୍ରୀ ପରତିନିଧି ଦିନର ୧୦ ବଜେ ନିଜର ଦିହିପା ସମସିଆ ନେଇ ଇ ଡାକ୍ତରଖନାରେ ପୁହୁଁଚିଥିଲେ। ସେ ପୁହୁଁଚିଲା ବେଲେ ଉଭଏ ଡାକ୍ତର ନାଇଁଥାଇ। ଫାର୍ମାସିଷ୍ଟ ଶିବନାରାୟଣ ଦାଶକୁଁ ରୁଗୀକୁଁ ଚିକିଛା କରୁଥିବାର ଦେଖ୍ବାକେ ପାଇଥିଲେ। ଡାକ୍ତରମାନକର ବାବ୍ଦେ ଫାର୍ମାସିଷ୍ଟକୁଁ ପଚ୍ରାଲାରୁ ଡାକ୍ତରମାନେ ନାଇଁ ଆଏବାରତାଲ ସେଥିରଲାଗି ମୁଇଁ ଚିକିଛା କରୁଛେଁ ବଲି ସେ କହିଥିଲେ। ଅଧ୍କା ପଚ୍ରାଉଚରାରୁ ଜନାଯାଇଥିଲା ଯେ ଡାକ୍ତରମାନେ ରହିବାର ଲାଗି ସରକାରୀ ଘର ରହିଛେ। ହେଲେ ଡା.ଦେବାଶିଷ ବିଶ୍ୱାଳ ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ପାସୁ ଆର ଆୟୁଷ ଡା.ତ୍ରିଲୋଚନ ବରାଳ କନଟିକ୍ରାରୁ ଯିବାର ଆଏବାର କରୁଛନ୍। ଏନ୍ତାଥି ଅନେକ ସମିଆରେ ରୁଗୀ ସେବା ପରଭାବିତ ହେଉଥିବାର ଅଂଚଲବାସୀ ଅଭିଯୋଗ କରିଛନ୍। ସେନ୍ତା ଉଭଏ ଡାକ୍ତର ଷ୍ଟାଫ କ୍ୱାର୍ଟର୍ସରେ ରହି ଚିକିଛା କରବାକେ ଅଂଚଲବାସୀ ଦାବି କରିଛନ୍। ଇ ବାବ୍ଦେ ଅତାବିରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀ ରବିନାରାୟଣ ମିଶ୍ରକୁଁ ପଚ୍ରାଲାରୁ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି ସେ କହିଥିଲେ।