ଲଣ୍ଡନ,୧୧ା୪(ଏଏଫ୍ପି): କରୋନା ଭାଇରସ ପାଇଁ ସମସ୍ତ ଫୁଟ୍ବଲରମାନଙ୍କ ଟେଷ୍ଟ ହେବା ପରେ ଯାଇ ଇଂଲିଶ ସିଜନର ପୁନଃ ଆରମ୍ଭ ହେବ। ଲିଗ୍ ମ୍ୟାନେଜର୍ସ ଆସୋସିଏଶନ୍ସର ମୁଖ୍ୟ କାର୍ଯ୍ୟନିର୍ବାହୀ ରିଚାର୍ଡ ବେଭାନ ପ୍ରକାଶ କରିଛନ୍ତି। କୋଭିଡ୍-୧୯ ମହାମାରୀ ଯୋଗୁ ବ୍ରିଟେନରେ ପାଖାପାଖି ୯,୦୦୦ ଲୋକ ମୃତ୍ୟୁ ବରଣ କରିସାରିଲେଣି। ଏକମାସ ହେଲା ଫୁଟ୍ବଲ ଖେଳ ହୋଇ ନାହିଁ। ସ୍ଥିତିର ସୁଧାର ଆସିଲେ ଯଦି ଖେଳ ପୁନଃ ଆରମ୍ଭ ହୁଏ ତେବେ ସିଜନକୁ ୫୬ ଦିନରେ ଶେଷ କରାଯାଇପାରିବ ବୋଲି ଫୁଟ୍ବଲ ଲିଗ୍ ମୁଖ୍ୟମାନେ କହୁଛନ୍ତି। ବେଭାନ କହିଛନ୍ତି, ଏପ୍ରିଲ ମାସ ଶେଷ ପର୍ଯ୍ୟନ୍ତ ଲିଗ୍ର ପୁନଃ ଆରମ୍ଭ ନେଇ କୌଣସି ପୂର୍ବାନୁମାନ କରିବା ସମ୍ଭବପର ନୁହେଁ। ଜର୍ମାନୀ କଥା ଯଦି ଦେଖିବା ତେବେ ଏହି ଦେଶରେ ବର୍ତ୍ତମାନ ଦୈନିକ ୫୦,୦୦୦ କରୋନା ଭାଇରସ୍ ଟେଷ୍ଟ ହେଉଛି। ସେ ତୁଳନାରେ ଆମ ଦେଶରେ ଏହି ସଂଖ୍ୟା ଦୈନିକ ୧୦,୦୦୦ ରହିଛି। କୌଣସି ନିଷ୍ପତ୍ତି ନେବା ପୂର୍ବରୁ ଆମକୁ କୋଚ୍ ଏବଂ ମ୍ୟାନେଜରମାନଙ୍କ ମତାମତକୁ ଧ୍ୟାଦ ଦେବାକୁ ପଡ଼ିବ। ପଡ଼ିଆକୁ ଫେରିବାକୁ ହେଲେ ଖେଳାଳିମାନଙ୍କୁ ଅତି କମ୍ରେ ୩ ସପ୍ତାହ ଟ୍ରେନିଂ ନେବାକୁ ପଡ଼ିବ। ସୁବଠାରୁ ଗୁରୁତ୍ୱପୂର୍ଣ୍ଣ କଥା ହେଲା ସ୍ବାସ୍ଥ୍ୟ। ଜଣେ ଖେଳାଳି ସମ୍ପୂର୍ଣ୍ଣ ଫିଟ୍ ନ ହେଲେ ପଡ଼ିଆକୁ ଫେରିବା ଠିକ ହେବ ନାହିଁ।