ରାୟଗଡ଼ା ଅଫିସ, ୨୦ା୧- ରାୟଗଡ଼ା ଜିଲା ସଦର ବ୍ଲକ୍ ହାଲୁଆ ପଞ୍ଚାୟତ ବାରିଝୋଲା ଗାଁରେ ଅନେକ ସମସ୍ୟା ଲାଗି ରହିଛି। ଦୀର୍ଘ ଦିନ ହେଲା ଶିକ୍ଷା, ସ୍ବାସ୍ଥ୍ୟ ଓ ପାନୀୟ ଜଳର ସମସ୍ୟା ରହିଥିଲେ ମଧ୍ୟ ତାହାର ସମାଧାନ ପାଇଁ ଆନ୍ତରିକତା ନ ଥିବାରୁ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ।
ଗାଁରେ ୧୯୮୬ ନଭେମ୍ବର ୨୭ରେ ସ୍ଥାପନ ହୋଇଥିଲା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ। ଇତିମଧ୍ୟରେ ୩୩ବର୍ଷ ବିତି ଯାଇଥିଲେ ମଧ୍ୟ ବିଦ୍ୟାଳୟର ମରାମତି ହୋଇପାରୁନାହିଁ। ସ୍କୁଲ୍ ରୋଷେଇ ଘର ଛାତରେ କଣା ହୋଇଥିବାରୁ ବର୍ଷା ହେଲେ ପାଣି ଜମୁଛି। ସ୍କୁଲ୍ରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୯୫ ପିଲା ପାଠ ପଢ଼ୁଥିବାବେଳେ ସେମାନଙ୍କ ପାଇଁ ରହିଛି ୫ ଶ୍ରେଣୀଗୃହ। ହେଲେ ଶ୍ରେଣୀ କୋଠା ଅବସ୍ଥା ଯେପରି, କାନ୍ଥ ଭୁଶୁଡ଼ି ପଡ଼ିବା ଆଶଙ୍କା ରହିଛି। ସ୍କୁଲ୍ ପରିସରରେ ନଳକୂପଟିଏ ମଧ୍ୟ ନ ଥିବାରୁ ବାହାରୁ ପାଣି ଅଣାଯାଉଛି। ଏ ବିଷୟରେ ସ୍କୁଲ୍ର ପ୍ରଧାନଶିକ୍ଷକ ଶରତ କୁମାର ମାଦଳା କହିଛନ୍ତି, ସମସ୍ୟା ନେଇ ବାରମ୍ବାର ବିଇଓଙ୍କୁ ଅବଗତ କରାଯାଇଛି, ମାତ୍ର କୌଣସି ପଦକ୍ଷେପ ନିଆଯାଇନାହିଁ। ସେହିପରି ବାରିଝୋଲା ଗାଁରେ ପାନୀୟ ଜଳର ଘୋର ଅଭାବ ନେଇ ମହିଳାମାନେ କହିଛନ୍ତି। ୪ବର୍ଷ ତଳୁ ଏଠାରେ ପାନୀୟ ଜଳ ପ୍ରକଳ୍ପ ନିର୍ମାଣ ପାଇଁ ପ୍ରଶାସନ ପ୍ରତିଶ୍ରୁତି ଦେଇଥିଲା। ଟାଙ୍କି ନିର୍ମାଣ ହେଲେ ବୋର୍ଓ୍ବେଲ୍ ପାଣି ସେଠାରେ ସଂରକ୍ଷଣ କରି ରଖାଯାଇପାରିବ ଏବଂ ଗ୍ରାମବାସୀଙ୍କ ଜଳ ସଙ୍କଟ ଦୂର ହୋଇପାରିବ। ହେଲେ ଏ ପର୍ଯ୍ୟନ୍ତ ପ୍ରକଳ୍ପ ନିର୍ମାଣ ହୋଇପାରିନାହିଁ। ଗ୍ରାମରେ ଜନସ୍ବାସ୍ଥ୍ୟ ବିଭାଗ ପାନୀୟ ଜଳ ଯୋଗାଉଛି। ହେଲେ ତାହା ଗ୍ରାମବାସୀଙ୍କ ପାଇଁ ଯଥେଷ୍ଟ ହୋଇପାରୁନାହିଁ। ଏ ନେଇ ସରପଞ୍ଚ ସରସ୍ବତୀ ବିଡ଼ିକା କହିଛନ୍ତି, ଜେଇଙ୍କ ଅବହେଳା ଯୋଗୁ ଏପରି ସମସ୍ୟା ହେଉଛି। ଗାଁରେ ଟାଙ୍କି ପାଇଁ ଆର୍ଡବ୍ଲ୍ୟୁଏସ୍ଏସ୍ ବିଭାଗକୁ କହିଛୁ। ଅଙ୍ଗନୱାଡ଼ି କେନ୍ଦ୍ରରେ ପାଣି ଗଳୁଛି। ଏହାର ମରାମତି କାର୍ଯ୍ୟ ମଧ୍ୟ ଆରମ୍ଭ ହୋଇନାହିଁ। ଏହାଦ୍ୱାରା ପିଲାମାନେ ଖେଳ ଓ ପାଠପଢ଼ାରୁ ବଞ୍ଚିତ ହେଉଛନ୍ତି। ପ୍ରତିମାସରେ ଗର୍ଭବତୀଙ୍କ ସ୍ବାସ୍ଥ୍ୟ ପରୀକ୍ଷା କରିବାରେ ବାଧକ ଉପୁଜୁଥିବା ଅଙ୍ଗନୱାଡ଼ି କର୍ମୀ ଉମାବତୀ ବିଡିକା କହିଛନ୍ତି।