ନୂଆଦିଲ୍ଲୀ, ୧୮ା୫ (ପି.ଟି.)-‘ଜନ ଧନ’ ଆକାଉଣ୍ଟ ଥିବା ୬ଜଣ ଜୁନିୟର କ୍ରିକେଟର ଏବେ ସମସ୍ୟାରେ ପଡ଼ିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସେମାନଙ୍କ ଆକାଉଣ୍ଟରେ ପୁରସ୍କାର ରାଶି ଜମା କରିପାରୁନାହିଁ। ‘ଜନ ଧନ’ ଆକାଉଣ୍ଟରେ ସର୍ବାଧିକ ୫୦,୦୦୦ ଟଙ୍କା ପର୍ଯ୍ୟନ୍ତ ଜମା ରଖାଯାଇପାରିବ। ବିସିସିଆଇର ବାର୍ଷିକ ଉତ୍ସବରେ ସମସ୍ତ ବୟସବର୍ଗର କ୍ରିକେଟରଙ୍କୁ ୧.୫ ଲକ୍ଷ ଟଙ୍କା ପୁରସ୍କାର ପ୍ରଦାନ କରାଯାଇଛି। ଜାନୁୟାରୀ ୧୧ ତାରିଖ ପରେ ସିନିୟର ଖେଳାଳିମାନଙ୍କ ଆକାଉଣ୍ଟକୁ ପୁରସ୍କାର ରାଶି ଟ୍ରାନ୍ସଫର ହୋଇଯାଇଛି। ମାତ୍ର ‘ଜନ ଧନ’ ଆକାଉଣ୍ଟଧାରୀ କ୍ରିକେଟରମାନଙ୍କୁ ଆକାଉଣ୍ଟକୁ ପୁରସ୍କାର ରାଶି ଟ୍ରାନ୍ସଫର ହୋଇ ପାରୁ ନାହିଁ। ସୂଚନାଯୋଗ୍ୟ, ଆର୍ଥିକ କ୍ଷେତ୍ରରେ ଦୁର୍ବଳଙ୍କ ପାଇଁ କେନ୍ଦ୍ର ସରକାର ‘ଜନ ଧନ’ ଆକାଉଣ୍ଟ ବ୍ୟବସ୍ଥା କରିଛନ୍ତି। ଏହାକୁ ଜିରୋ ବାଲାନ୍ସ ଆକାଉଣ୍ଟ ବୋଲି କୁହାଯାଉଛି। ଖବର ଅନୁସାରେ ପୁରସ୍କାର ରାଶି ପାଇପାରୁ ନ ଥିବା ଏହି ‘ଜନ ଧନ’ ଆକାଉଣ୍ଟଧାରୀଙ୍କୁ କିପରି ସେମାନଙ୍କ ପ୍ରାପ୍ୟ ପ୍ରଦାନ କରିବ ସେ ନେଇ ବିସିସିଆଇ ନିଜ ବ୍ୟାଙ୍କ ବ୍ୟାଙ୍କ ଅଫ୍ ମହାରାଷ୍ଟ୍ର ସହ ଯୋଗାଯୋଗ କରିଛି। ସମସ୍ୟାର ସମାଧାନ ସୂତ୍ର ବାହାରିଛି। ସମ୍ପୃକ୍ତ ଖେଳାଳିମାନଙ୍କର ଯେଉଁ ବ୍ୟାଙ୍କ୍ରେ ‘ଜନ ଧନ’ ଆକାଉଣ୍ଟ ରହିଛି ତାହାକୁ ସେଭିଙ୍ଗ୍ସ ଆକାଉଣ୍ଟରେ ପରିବର୍ତ୍ତନ ଦ୍ୱାରା ଟଙ୍କା ଜମା କରିବାରେ କୌଣସି ସୀମା ରହିବ ନାହିଁ। ଜୁନିୟର କ୍ରିକେଟରଙ୍କ ମ୍ୟାଚ୍ ଫି’ ସେତେଟା ଅଧିକ ନୁହେଁ। ୧୬ ବର୍ଷରୁ କମ୍ ଖେଳାଳି ମ୍ୟାଚ୍ ପିଛା ୧୦,୦୦୦ ଟଙ୍କା( ଦିନ ପିଛା ୨୫୦୦ ଟଙ୍କା) ଏବଂ ୧୯ ବର୍ଷରୁ କମ୍ କ୍ରିକେଟ ଖେଳାଳି ୪୦,୦୦୦ (ଦିନ ପିଛା ୧୦,୦୦୦ ଟଙ୍କା) ଟଙ୍କା ପାଇଥାନ୍ତି। ଫଳତଃ ଅନ୍ୟ ସମୟରେ ଏହି ଆକାଉଣ୍ଟକୁ ମ୍ୟାଚ ଫି’ ଟ୍ରାନ୍ସଫର କରିବାରେ କୌଣସି ଅସୁବିଧା ହେଉ ନ ଥିଲା।