ଖଣ୍ଡପଡ଼ା,୮ା୭(ସ୍ବ.ପ୍ର.): ଖଣ୍ଡପଡ଼ା ବ୍ଲକ ଅନ୍ତର୍ଗତ କଣ୍ଟିଲୋ ନୀଳମାଧବ ମହାବିଦ୍ୟାଳୟ ପରିସରରେ ଶନିବାର ବ୍ଲକସ୍ତରୀୟ ବନ ମହୋତ୍ସବ ପାଳିତ ହୋଇଯାଇଛି। ଉକ୍ତ ବୈଠକରେ ମୁଖ୍ୟଅତିଥି ଭାବେ ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଯୋଗଦେଇଥିଲେ। ଏହି ଅବସରରେ କଲେଜର ବିଭିନ୍ନ ସମସ୍ୟା ପ୍ରତି କର୍ତ୍ତୃପକ୍ଷ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ସୂଚନାଯୋଗ୍ୟ, କଲେଜଟି ଦୀର୍ଘ ୨୪ ହେଲା ପ୍ରତିଷ୍ଠା ହୋଇଥିବାବେଳେ ବର୍ଷ ବର୍ଷ ଧରି ଅନେକ ଆବଶ୍ୟକତା ପୂରଣ ହୋଇପାରି ନ ଥିବା ଓ ସମସ୍ୟା ଘେରରେ ରହିଥିବା ଅଭିଯୋଗ ହୋଇଆସୁଛି। ତେବେ ବିଧାୟକ ଏହାର ସମାଧାନ ନିମନ୍ତେ ତୁରନ୍ତ ପଦକ୍ଷେପ ଗ୍ରହଣ କରିବା ସହ ଆସନ୍ତା ସେପ୍ଟେମ୍ବର ମାସ ସୁଦ୍ଧା ବିଶେଷତଃ ପାନୀୟ ଜଳ ଯୋଗାଣ ଓ ସୁରକ୍ଷା ପାଚେରି ନିର୍ମାଣ କରାଯିବ ବୋଲି ପଟ୍ଟନାୟକ ଦୃଢ଼ ପ୍ରତିଶୃତି ଦେଇଛନ୍ତି। ସେ କହିଛନ୍ତି, ଏହି ଦୁଇଟି କାର୍ଯ୍ୟ ଯଦି ଚଳିତ ସେପ୍ଟେମ୍ବର ମାସ ଶେଷ ସୁଦ୍ଧା ସମ୍ପନ୍ନ ନ କରିବେ ତେବେ ସେ ଆଉ କଲେଜ ଆସିବେ ନାହିଁ। ସୂଚନାଯୋଗ୍ୟ, କଲେଜର କେବଳ ସମ୍ମୁଖ ପାଚେରି ନିର୍ମାଣ ହୋଇଥିବାବେଳେ ଅନ୍ୟ ୩ ଦିଗର ପାଚେରି ନିର୍ମାଣ ହୋଇପାରିନି। ପାଚେରି ନ ଥାଇ ୩ ପାର୍ଶ୍ୱରେ ଧାନ ଜମି ଥିବାରୁ ଅଣଛାତ୍ରମାନେ କଲେଜ ପରିସରକୁ ପ୍ରବେଶ କରିବାର ଆଶଙ୍କା ରହିଛି। ଅପରପକ୍ଷେ ମହାନଦୀ କୂଳରେ ମହାବିଦ୍ୟାଳୟଟି ରହିଥିବାବେଳେ ଏଠାରେ ପାନୀୟ ଜଳର ଘୋର ସମସ୍ୟା ଦେଖାଦେଇଛି। ଯଦିଓ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ କଣ୍ଟିଲୋ ଅଞ୍ଚଳକୁ ପାନୀୟ ଜଳର ବ୍ୟବସ୍ଥା କରାଯାଇଛି ତେବେ କଲେଜ ପରିସରକୁ ଏହି ସୁବିଧା ଉପଲବ୍ଧ ହୋଇପାରିନି।ଏ ନେଇ ପ୍ରଶାସନକୁ ବାରମ୍ବାର ଅଭିଯୋଗ ହେଉଥିଲେ ମଧ୍ୟ କୌଣସି ପଦକ୍ଷେପ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଉଥିଲା। ତେବେ ବିଧାୟକ ପଟ୍ଟନାୟକଙ୍କ ଦୃଢ଼ ପ୍ରତିଶୃତି ପରେ କଲେଜରେ ଖୁସି ପ୍ରକାଶ ପାଇଛି।