ବଅଁରପାଳ,୯।୮ (ଡିି.ଏନ୍.ଏ.)-ବଅଁରପାଳ ବ୍ଲକ ଅଫିସ ନିକଟରେ ଥିବା ପିବିକେ ଉଚ୍ଚ ବିଦ୍ୟାଳୟ ବିଭିନ୍ନ ସମସ୍ୟାରେ ଗତି କରୁଛି। ଛାତ୍ରୀଛାତ୍ରଙ୍କ ତୁଳନାରେ ଶିକ୍ଷକ ନ ଥିବା ବେଳେ ଆବଶ୍ୟକ ଶ୍ରେଣୀ ଗୃହ ବି ନାହିଁ। ଏପରି କି ବେଞ୍ଚ ଓ ଡେସ୍କ ଅଭାବରୁ କେତେଜଣ ଛାତ୍ରୀଛାତ୍ରଙ୍କୁ ତଳେ ବସି ପଢ଼ିବାକୁ ପଡ଼ୁଛି। ଏ ନେଇ ବାରମ୍ବାର ଅଭିଯୋଗ ପରେ ମଧ୍ୟ ଶିକ୍ଷା ବିଭାଗ ଏଥିପ୍ରତି ଦୃଷ୍ଟି ଦେଉ ନ ଥିବା ଅଭିଯୋଗ ହେଉଛି।
ସରକାରଙ୍କ ଦ୍ୱାରା ପରିଚାଳିତ ଏହି ଉଚ୍ଚ ବିଦ୍ୟାଳୟ ୧୯୬୨ରେ ବିଜୟ କୁମାର ସିଂଙ୍କ ଉଦ୍ୟମରେ ପ୍ରତିଷ୍ଠା ହୋଇଥିଲା। ତେବେ ୫୭ ବର୍ଷ ପୂରଣ କରିଥିବା ଏହି ପୁରାତନ ଉଚ୍ଚ ବିଦ୍ୟାଳୟଟି ବିଭିନ୍ନ ସମସ୍ୟା ମଧ୍ୟରେ ରହିଥିଲେ ମଧ୍ୟ ଏହାର ଉନ୍ନତି ପ୍ରତି କାହାର ଦୃଷ୍ଟି ପଡ଼ୁନାହଁ। ଏଠାରେ ଷଷ୍ଠଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ଶିକ୍ଷାଦାନର ବ୍ୟବସ୍ଥା ରହିଛି। ୨୭୩ ଛାତ୍ରୀ ଓ ୩୭୧ ଛାତ୍ରଙ୍କୁ ମିଶାଇ ମୋଟ୍ ୬୪୪ ଜଣ ଅଧ୍ୟୟନ କରୁଛନ୍ତି। କିନ୍ତୁ ଏତେ ସଂଖ୍ୟକ ଛାତ୍ରୀଛାତ୍ରଙ୍କ ପାଇଁ ଅଛନ୍ତି ୧୩ ଜଣ ଶିକ୍ଷୟିତ୍ରୀ ଶିକ୍ଷକ। ତେବେ ଶ୍ରେଣୀ ଗୃହର ଅଭାବରୁ ଛାତ୍ରୀଛାତ୍ରଙ୍କ ପାଠପଢ଼ାରେ ବହୁ ଅସୁବିଧା ହେଉଛି। ଅଷ୍ଟମ ଶ୍ରେଣୀ ପାଇଁ ୨ଟି ସେକ୍ସନ, ନବମ ଶ୍ରେଣୀ ପାଇଁ ୩ଟି ସେକ୍ସନ, ୧୦ମ ଶ୍ରେଣୀ ପାଇଁ ଦୁଇଟି, ଷଷ୍ଠ ଓ ସପ୍ତମ ଶ୍ରେଣୀ ପାଇଁ ଗୋଟିଏ ଲେଖାଏ ଶ୍ରେଣୀ ଗୃହ ରହିଛି। ୯ମ ଶ୍ରେଣୀରେ ୨୦୬ ଜଣ ଓ ୧୦ମ ଶ୍ରେଣୀରେ ୧୭୭ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେହିପରି ଏହି କୋଠରି ଗୁଡ଼ିକ ମଧ୍ୟରୁ କେତେକ ମରାମତି ଅଭାବରୁ ଶୋଚନୀୟ ଅବସ୍ଥାକୁ ଆସିଗଲାଣି। ଏଠାରେ ୧୬ ଜଣ ଶିକ୍ଷକଙ୍କ ଆବଶ୍ୟକତା ଥିବାବେଳେ ବର୍ତ୍ତମାନ ୧୩ ଜଣ ରହିଛନ୍ତି। ଦୀର୍ଘ ଦିନ ହେଲା ପ୍ରଧାନ ଶିକ୍ଷକ ପଦବୀ ଖାଲି ପଡ଼ିଛି। ତେଣୁ ସହକାରୀ ଶିକ୍ଷକ ପ୍ରଧାନ ଶିକ୍ଷକ ଦାୟିତ୍ୱ ତୁଲାଉଛନ୍ତି। ପ୍ରଧାନ ଶିକ୍ଷକ ନ ଥିବାରୁ ବିଦ୍ୟାଳୟ ପରିଚାଳନା କ୍ଷେତ୍ରରେ ବହୁ ସମସ୍ୟା ସୃଷ୍ଟି ହେଉଛି। ଡେସ୍କ ଓ ବେଞ୍ଚ ଅଭାବ ଯୋଗୁ କେତେଜଣ ଛାତ୍ରୀଛାତ୍ର ଚଟାଣରେ ବସି ପଢ଼ୁଥିବା ଦେଖିବାକୁ ମିଳୁଛି। ସେହିପରି ଏଠାରେ ରାଜ୍ୟ ମୁକ୍ତ ବିଦ୍ୟାଳୟ ପ୍ରତିଷ୍ଠାନ, ତୃତୀୟ ଭାଷା ଧନ୍ଦାମୂଳକ ଶିକ୍ଷା ବ୍ୟବସ୍ଥା, ପ୍ରଯୁକ୍ତି ବିଦ୍ୟା ଟ୍ରାଭେଲ୍ ଟୁରିଜିମ୍ ବ୍ୟବସ୍ଥା ସହ ବିଜ୍ଞାନଗାର ମଧ୍ୟ ଏହି ବିଦ୍ୟାଳୟରେ ଖୋଲା ଯାଇଛି। ଏହି ସବୁ ବ୍ୟବସ୍ଥା ଥିଲେ ମଧ୍ୟ କୋଠରିର ଅଭାବ ରହିଛି। ସ୍କୁଲ ସମୟରେ ଯଦି କୌଣସି କାର୍ଯ୍ୟକ୍ରମ କରାଯାଉଛି ତେବେ କୌଣସି ଗୋଟିଏ ଶ୍ରେଣୀ ଛାତ୍ରୀଛାତ୍ରଙ୍କ ପଢ଼ା ବନ୍ଦ କରାଯାଇ ସେହି ଗୃହରେ ଉକ୍ତ କାର୍ଯ୍ୟକ୍ରମ କରାଯାଉଥିବା ଦେଖିବାକୁ ମିଳୁଛି।
ଏ ସମ୍ପର୍କରେ ବିଦ୍ୟାଳୟ ପରିଚାଳନା କମିଟି ସଭାପତି ଦୁଷ୍ମନ୍ତ କୁମାର ସେନାପତି କୁହନ୍ତି, ଶ୍ରେଣୀ ଗୃହ ଅଭାବରୁ ଛାତ୍ରୀଛାତ୍ରମାନେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରଧାନ ଶିକ୍ଷକ ପଦବୀ ଦୀର୍ଘ ଦିନ ହେଲା ଖାଲି ରହିଛି। ଛାତ୍ରୀଛାତ୍ରଙ୍କ ତୁଳନାରେ ଶିକ୍ଷକ ନାହାନ୍ତି। ଏ ନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ସେହିପରି ବଅଁରପାଳ ବ୍ଲକର ଅତିରିକ୍ତ ଶିକ୍ଷା ଅଧିକାରୀ ମନୋରମା ମାଝି କୁହନ୍ତି, ବିଦ୍ୟାଳୟର ସମସ୍ୟା ସମ୍ପର୍କରେ ପୂର୍ବରୁ ଆମ ପାଖରେ ଅଭିଯୋଗ ହୋଇଛି। ସ୍କୁଲର ଉନ୍ନତି ପାଇଁ ଦୃଷ୍ଟି ଦିଆଯିବ।