ବିଜେପୁର, ୧୮।୧୨ (ଡି.ଏନ୍.ଏ.)-ଟୁକେଲ୍ ଜନମ୍ ପର୍ଗୋତ୍ରି। ଏକା ପୁଓଟା ବୁଢ଼ାକାଲେ ମାଆବାପ୍କେ ସାହା ହେବା ବଲି ଆମର ସମାଜରେ ଗୁଟେ ବିଶୁଆସ ରହିଛେ। ହେଲେ ଏହେଦେ ଦୁନିଆଁଥି ଜନମ୍କଲା ପୁଓଠାନୁଁ ଥିର୍ ପାଏନ୍ ଟିକେ ପାଏବାର ଲାଗି ବୁଢ଼ାବୁଢ଼ି ମା’ବାପ୍ କେତେ କଲ୍ତପ୍ ହେଉଥିବାର ଦେଖ୍ବାକେ ମିଲୁଛେ। ଏନ୍ତା ସମିଆଥି ଅବିହାରି ଟୁକେଲ ହେମକାନ୍ତି ଡନସନା (୩୨) ନିଜର ବୁଢ଼ି ମା’ର ମୁହେଁ ହଁସ ଫୁଟେଇ ସମାଜ ଲାଗି ଉଦାହରନ୍ ସାଜିଛନ୍।
ସୂଚନା ଅନ୍ସାରେ ବରଗଡ଼ ଜିଲା ବିଜେପୁର ବ୍ଳକ ବେନିଆଁଚାଲ ପଁଚେତ୍ ସଦର ଗଁାର ବାପ୍ ସ୍ବର୍ଗତ ଦେବରାଜ ଡନସନା ଆର ମା’ ପାର୍ବତୀକଁର ଛେଦ୍ଲି ଝି’ ହେମକାନ୍ତି ଡନସନା। ଦେବରାଜ ଛୋଟ୍ଟେ କୁଚନି ପସରା କରି ୩ଟା ଟୁକେଲକେ ବିହାଚୁରା କରିଥିଲେ। ଦୁଖେସୁଖେ ତାକର ଜୀବନ୍ ଡଂଗା ଗଡ଼ି ଯାଉଥିଲା। ଆଏଜ୍କେ ୧୩ ବଛର ତଲେ ଦେବରାଜ ବେମାର ପଡ଼ଲାରୁ ତାକର ମୁରତୁ ହେଇଥିଲା। ସେ ଯେନ୍ ଦୁଇ ପଏସା ଅଗ୍ଲେଇ ସଁଚିଥିଲେ ସେଟା ତାକର କାମ୍କାଯ୍ଥି ନିପ୍ଟିଗଲା। ଏନ୍ତାଥି ପରିବାର ଚିନ୍ତାରେ ପାର୍ବତୀକୁଁ ଚାର୍ହିକୁତି ଅଁଧାର ଦିଶ୍ଲା। ମା’ର ବୋଝ୍କେ ହାଲକା କରି ତାକର ମୁହେଁ ହଁସ ଫୁଟାବାକେ ହେମ ଅଁଟା ଭିର୍ଲେ। ମାଗିଯାଚି ୫ଶହ ଟଁକାଥି ହେମ ବାପ୍ କରୁଥିବାର୍ କୁଚନି ପସରାକେ ଫେର ମୂଲକଲେ। ଗାଁର ଆସେପାସେ ବସୁଥିବାର ଲାଉମୁଣ୍ଡା, ଆଗଲପୁର, ଇଚ୍ଛାପୁର ହାଟ୍କେ ଯାଇ ତୁନ୍ଶାଗ୍, ଚାହାଚିନି, ସରପ ସାଗୁନ ଘିନ୍ଲେ। ଖେଜାବୁଜା କରି କୁଚନି ପସରାରୁ ଯେନ୍ ଦୁଇ ପଏସା ପାଏଲେ ସେଥି ମା’ଝି ଦୁଖେକଷ୍ଟେ ଦୁଇବେଲା ଦୁଇମୁଠା ଖାଇ ପାରୁଛନ୍। ହେମ ମୋର ଝି’ ନୁହେସେ, ମୋର ପୁଓ ଆଏ। ତା’ର ଲାଗି ଏକା ମୁଇଁ ଦୁଇବେଲା ଦୁଇମୁଠା ଖାଇ ପାରୁଛେଁ ବଲି ବୁଢ଼ି ମା’ ପାର୍ବତୀ ଡନସନା କହିଛନ୍। ମୋର ବା ମରିଗଲା ଉତାରୁ ମୋର ମା’ କହେଲା ତୁଇ ଖଟିଗଲେ ମତେ କିଏ ପୁଷ୍ବାରେ ନୁନି! ତା’ର ଇ କଥା ପଦ୍କର ଲାଗି ମୁଇଁ ବିହାଚୁରା ନାଇଁ ହେବାର ନିଷ୍ପତି ନେଲି ଆର ବାପ୍ କରୁଥିବାର କୁଚ୍ନି ପସରାକେ ମୂଲ କଲି। ପସରାଟା ଭଲ ଚଲୁଥିଲା। ହେଲେ ଗଲା ମାସୁ ପଏସା ପତର ଅଭାବୁ ପସରାଟାକେ ବନେ କରି ଚଲେଇ ନାଇଁ ପାରବାର। ଯେନଥିର ଲାଗି ମତେ ପର୍ହର କାମ୍ବୁତା କରବାକେ ପଡୁଛେ। କିଛି ସରକାରୀ ସାହାଯ୍ ମିଲ୍ଲେ ମୁଇଁ ମୋର ଗୁଡେ ଠିଆ ହେଇ ପାରତି ବଲି ହେମକାନ୍ତି କହିଛନ୍। ଇ ବାବ୍ଦେ ଗଁାର କବିରାମ ପ୍ରସାଦ ବାଗ କହିଛନ୍ ଯେ, ଆମର ଗାଁର ହେମର କାମ୍କେ ସହଁରାବାକେ ପଡ଼ବା। ଟୁକେଲଟେ ହେଲେବି ଭେଁଡିଆ ପିଲାନୁ କମ୍ ନୁହେ। ବାପ୍ କରିଥିବାର୍ କୁଚନି ପସରାକେ ସେ ବଁଚେଇ ରଖିଛେ। ସରକାରୀ ପୋରଛାହନ୍ ଦେଲେ ସେ ନିଜର ଗୁଡେ ଠିଆହେଇ ପାରତା। ସେନ୍ତା ଇ ବାବ୍ଦେ ବିଡିଓ ପଦ୍ମନାଭ ସାମନ୍ତରାୟକୁଁ ପଚ୍ରାଲାରୁ ଆପନ୍କଁରନୁ ହେମକାନ୍ତିର କଥା ଶୁନି ବଡା ଉଷତ୍ ଲାଗଲା। ସେ ନିଜେ ଚାହେଁଲେ ତାହାକୁ ଓଡ଼ିଶା ଜୀବିକା ମିଶନ ଜରିଆରେ ସରକାରୀ ସହାଯ୍ ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ।