ଛତ୍ରପୁର, ୨୭।୪(ଡି.ଏନ୍.ଏ.): ସମୁଦ୍ର ପଥଦେଇ ଆଜ ୩୫ ମତ୍ସ୍ୟଜୀବୀ ଚେନ୍ନାଇରୁ ଗଞ୍ଜାମ ଫେରୁଛନ୍ତି। ସୋମବାର ସନ୍ଧ୍ୟା ସୁଦ୍ଧା ସେମାନଙ୍କ ଡଙ୍ଗା ଗଞ୍ଜାମ ସମୁଦ୍ର କୂଳରେ ଲାଗିବ ବୋଲି ଜଣାଯାଇଛି। ଉକ୍ତ ମତ୍ସ୍ୟଜୀବୀମାନେ ଗଞ୍ଜାମ ଜ଼ିଲାର ପତିସୋନପୁର, ରାମେୟାପାଟଣା, ମାରକଣ୍ଡି, ଗୋପାଳପୁର, ଗୋଳାବନ୍ଧ, ରେ. କତୁରୁ, ବନ୍ଦର, ଆର୍ଯ୍ୟପଲି, ଅଗସ୍ତିନୂଆଗାଁ ଅଞ୍ଚର ବୋଲି ଜଣାପଡିଛି। ଏହି ଖବର ମିଳିବା ପରେ ଆର୍ଯ୍ୟପଲି ମେରାଇନ ପୋଲିସ ସଜାଗ ହୋଇପଡିଛି। ପ୍ରଶାସନ ଓ ପଞ୍ଚାୟତର ସରପଞ୍ଚ ଓ ଅନ୍ୟ କର୍ମଚାରୀ ମଧ୍ୟ ଏଥିପ୍ରତି ନଜର ରଖିଛନ୍ତି। କୋଷ୍ଟଗାର୍ଡ ଓ ସ୍ଥାନୀୟ ମତ୍ସ୍ୟଜୀବୀଙ୍କୁ ପୋଲିସ ପକ୍ଷରୁ ଏ ସମ୍ପର୍କରେ ଅବଗତ କରାଯାଇଛି। ଚେନ୍ନାଇରୁ ଡଙ୍ଗା କିଣି ଉକ୍ତ ଡଙ୍ଗାରେ ସେମାନେ ଫେରୁଥିବା ପରିବାର ସଦସ୍ୟଙ୍କଠାରୁ ଜଣାପଡ଼ିଛି।
ପ୍ରକାଶ ଯେ, ଗତ ୨୫ ତାରିଖରେ ଚେନ୍ନାଇରୁ ଡଙ୍ଗାରେ ୩୮ ଜଣ ମତ୍ସ୍ୟଜୀବୀ ଗଞ୍ଜାମ ଜିଲା ପାତିସୁନାପୁର ସମୁଦ୍ର କୂଳରେ ପହଞ୍ଚିଥିଲେ। ପରେ ଏମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ କ୍ୱାରାଣ୍ଟାଇନରେ ରଖାଯାଇଥିଲା । ସେହିପରି ଗତ ସପ୍ତାହରେ ସମୁଦ୍ର ପଥରେ ୨୭ଜଣ ମତ୍ସ୍ୟଜୀବୀ ଡଙ୍ଗାରେ ଆସି ଆନ୍ଧ୍ର ପ୍ରଦେଶର ଇଚ୍ଛାପୁର ନିକଟ ସମୁଦ୍ର କୂଳରେ ପହଞ୍ଚିଥିଲେ। ଏମାନଙ୍କ ମଧ୍ୟରେ ଗଞ୍ଜାମ ଜ଼ିଲା ପାତିସୋନପୁର ଅଞ୍ଚଳର ୯ ଜଣ ରହିଥିଲେ। ସମସ୍ତେ ଆନ୍ଧ୍ର ପ୍ରଦେଶରେ କ୍ୱାରାଣ୍ଟାଇନରେ ଅଛନ୍ତି।
