ଭୁବନେଶ୍ୱର, ୧୮ା୧(ବ୍ୟୁରୋ): ହାଇସ୍କୁଲରେ କ୍ରୀଡ଼ା, ହିନ୍ଦୀ ଓ ସଂସ୍କୃତ ଶିକ୍ଷକ ନିଯୁକ୍ତି ହେଉନାହାନ୍ତି। ୨୦୧୯ ସୁଦ୍ଧା ପ୍ରାୟ ୧୫ ହଜାର କ୍ରୀଡ଼ା, ହିନ୍ଦୀ ଓ ସଂସ୍କୃତ ଶିକ୍ଷକ ପଦବୀ ଖାଲି ଥିଲେ ମଧ୍ୟ ଗଣଶିକ୍ଷା ବିଭାଗ କୌଣସି ପଦକ୍ଷେପ ନେଉନାହିଁ ବୋଲି ପ୍ରଶିକ୍ଷଣପ୍ରାପ୍ତ ଆଶାୟୀ ଶିକ୍ଷକ ସଂଘ ପକ୍ଷରୁ କୁହାଯାଇଛି। ସଂଘ ପକ୍ଷରୁ ଏନେଇ ଶୁକ୍ରବାର ପିଏମ୍ଜିଠାରେ ଧାରଣା ଦିଆଯାଇଥିଲା। ସମାନ ଦାବି ନେଇ ପୂର୍ବରୁ ମଧ୍ୟ ଦୁଇ ଦୁଇଥର ଧାରଣା ହୋଇଥିଲା। ସଂଘର କହିବାନୁଯାୟୀ, ଧାରଣା ସମୟରେ କ୍ରୀଡ଼ା, ହିନ୍ଦୀ ଓ ସଂସ୍କୃତ ଶିକ୍ଷକ ପଦବୀ ପୂରଣ ହେବ ବୋଲିି ବିଭାଗ ପକ୍ଷରୁ ପ୍ରତିଶ୍ରୁତି ମିଳିଥିଲା। କିନ୍ତୁ ଗଣଶିକ୍ଷା ବିଭାଗର କର୍ମକର୍ତ୍ତାମାନେ ବର୍ତ୍ତମାନ ପର୍ଯ୍ୟନ୍ତ ପଦବୀ ଫାଇଲ୍କୁ ଅର୍ଥ ବିଭାଗକୁ ପଠାଇ ନାହାନ୍ତି। ତେଣୁ ନିରାଶ ହୋଇ ସଂଘ ପକ୍ଷରୁ ଶୁକ୍ରବାର ପୁଣି ଥରେ ଧାରଣା ଦିଆଯାଇଥିଲା। ଏହାର ସମାଧାନ ଲାଗି ସଂଘ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛି। ଯଦି ସରକାର ଯଥାଶୀଘ୍ର ନିଯୁକ୍ତି ପାଇଁ ବିଜ୍ଞାପନ ବାହାର ନ କରନ୍ତି, ତେବେ ସେମାନେ ସମୂହ ଆତ୍ମାହୁତି ଦେବେ ବୋଲି ସଂଘ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ଜରିଆରେ ଜଣାଯାଇଛି।