ବାରିପଦା ଅଫିସ, ୯ା୬- ନିଜର ବ୍ୟବସାୟକୁ ବୃଦ୍ଧି କରିବା ପାଇଁ ପୂର୍ବରୁ ସ୍ବୟଂ ସହାୟିକା ଗୋଷ୍ଠୀ (ଏସ୍ଏଚଜି)ର ମହିଳାମାନେ ବିଭିିନ୍ନ ଅର୍ଥ ଲଗାଣକାରୀ ସଂସ୍ଥାଠାରୁ ଟଙ୍କା ଋଣ ଆଣିଥିଲେ। ସୁଧ ସହ ସେମାନେ ନିୟମିତ କିସ୍ତି ପୈଠ କରୁଥିଲେ। ହେଲେ ମହାମାରୀ କରୋନା ଯୋଗୁଁ ସେମାନଙ୍କ ରୋଜଗାର ଠପ୍ ହୋଇପଡ଼ିଛି। ଏପରିସ୍ଥଳେ ସେମାନେ ଟଙ୍କା କିପରି ଋଣ ସୁଝିବେ ସେ ନେଇ ଚିନ୍ତାରେ ଅଛନ୍ତି। ଏଭଳି ଘଡିସନ୍ଧି ସମୟରେ ଅର୍ଥ ଲଗାଣକାରୀ ସଂସ୍ଥାର କର୍ମଚାରୀମାନେ ଆସି ସେମାନଙ୍କୁ ସୁଧ ଟଙ୍କା ଦେବା ପାଇଁ ବାଧ୍ୟ କରୁଛନ୍ତି। ତେଣୁ ସେମାନଙ୍କ ଋଣ ଟଙ୍କା ସମୂର୍ଣ୍ଣ ଛାଡ଼ କରିବା ପାଇଁ ରାଜ୍ୟ ସରକାର ଉକ୍ତ ଅର୍ଥ ଲଗାଣକାରୀ ସଂସ୍ଥାମାନଙ୍କୁ ନିର୍ଦ୍ଦେଶ ଦିଅନ୍ତୁ ବୋଲି ମହିଳାମାନେ ଦାବି କରିଛନ୍ତି। ସୋମବାର ଅପରାହ୍ନରେ ମୟୂରଭଞ୍ଜ ଜିଲା ବାରିପଦା ପୌରପରିଷଦ ୱାର୍ଡ଼ ନଂ.୨୮ର ଏସ୍ଏଚଜି ମହିଳାମାନେ ଉପରୋକ୍ତ ଦାବି ନେଇ ଜିଲାପାଳଙ୍କ କାର୍ଯ୍ୟାଳୟ ଆଗରେ ଆନ୍ଦୋଳନ କରିଥିଲେ। ଏ ନେଇ ଗତ ୨୯ ତାରିଖରେ ମହିଳାମାନେ ଜିଲା ପ୍ରଶାସନ ନିକଟରେ ଅଭିଯୋଗ କରିଥିଲେ। ହେଲେ ଏ ଯାଏ ଏହାର କୌଣସି ସମାଧାନ ହୋଇ ନ ଥିବା କାରଣରୁ ବାଧ୍ୟ ହୋଇ ଆନ୍ଦୋଳନ କରିଥିଲେ। ପରେ ମହିଳାମାନେ ଜିଲାପାଳଙ୍କୁ ଭେଟି ଏ ସମ୍ପର୍କରେ ଏକ ଦାବିପତ୍ର ପ୍ରଦାନ କରିଥିଲେ। ନମିତା ଚାନ୍ଦଙ୍କ ନେତୃତ୍ୱରେ ଏକାଧିକ ମହିଳା ଆସି ଜିଲାପାଳଙ୍କ କାର୍ଯ୍ୟାଳୟ ଆଗରେ ଆନ୍ଦୋଳନ କରିଥିଲେ।