ନୂଆଦିଲ୍ଲୀ,୧୭।୪ : ଦୁଇଟି ପର୍ଯ୍ୟାୟରେ ଏବେ ଲକ୍ଡାଉନ ମେ ମାସ ୩ ଯାଏ ବଢ଼ିଛି। ୨୫ ମାର୍ଚ୍ଚରୁ ୧୪ ଏପ୍ରିଲ ଯାଏ ବୁକିଂ ହୋଇଥିବା ଟିକେଟର ସମ୍ପୂର୍ଣ୍ଣ ଅର୍ଥ ବିମାନ କମ୍ପାନୀଗୁଡିକ ଯାତ୍ରୀଙ୍କୁ ଫେରାଇବେ। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ବିମାନ କମ୍ପାନୀଗୁଡିକୁ ଏ ସଂକ୍ରାନ୍ତରେ ନିର୍ଦ୍ଦେଶ ଦିଆଯାଇଛି। ଲକ୍ଡାଉନ ସବୁ ବିମାନ କମ୍ପାନୀ ଟିକେଟ ବାତିଲ କରିଛନ୍ତି। ହେଲେ ଲୋକଙ୍କ ବୁକିଂ ଅର୍ଥ ଏବେ ଯାଏ ଫେରସ୍ତ କରିବା ନେଇ କୌଣସି ପଦକ୍ଷେପ ଘୋଷଣା କରିନାହାନ୍ତି। ସୂଚନାଯୋଗ୍ୟ ଏହି ସମୟ ଅବଧିରେ ଲୋକମାନେ ଟ୍ରେନ୍ ଟିକେଟ ଉପରେ ସମ୍ପୂର୍ଣ୍ଣ ରିଫଣ୍ଡ ପାଇବେ ବୋଲି ରେଲଓ୍ବେ ପକ୍ଷରୁ କୁହାଯାଇଛି। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ ପକ୍ଷରୁ ନୂଆ ନିର୍ଦ୍ଦେଶ ଜାରି ହେବା ପରେ ଯାତ୍ରୀ ବିମାନ ଟିକେଟ ବୁକିଂ ଅର୍ଥ ଫେରିପାଇବା ନେଇ ସ୍ପଷ୍ଟ ହୋଇଛି। ଯାତ୍ରୀ ଟିକେଟ କ୍ୟାନ୍ସେଲ ଅନୁରୋଧ କରିବାର ୩ ସପ୍ତାହ ମଧ୍ୟରେ ରିଫଣ୍ଡ କରିବାକୁ କୁହାଯାଇଛି। ରିଫଣ୍ଡ ନେଇ ଗତ କିଛିଦିନ ହେବ ଯାତ୍ରୀଙ୍କ ମଧ୍ୟରେ ବେଶ୍ ଆଶଙ୍କା ପ୍ରକାଶ ପାଇଥିଲା। ବିମାନ କମ୍ପାନୀଗୁଡ଼ିକର ସିଇଓଙ୍କ ସହ ସରକାର ଆଲୋଚନା କରିବା ପରେ ଏହି ପ୍ରସଙ୍ଗ ଏବେ ସ୍ପଷ୍ଟ ହୋଇଛି।