ଢେଙ୍କାନାଳ ଅଫିସ, ୧୯।୪ – ଢେଙ୍କାନାଳ ପୌରାଞ୍ଚଳର ସିମିଳିଆ ଅଞ୍ଚଳର ନାରୀଶକ୍ତି ସଂଘ ପକ୍ଷରୁ କରୋନା ଯୋଦ୍ଧାଙ୍କୁ ଶନିବାର ସମ୍ବର୍ଦ୍ଧିତ କରାଯାଇଛି। ପୋଲିସ, ଅଙ୍ଗନୱାଡି କର୍ମୀ, ସଫେଇ କର୍ମଚାରୀ, ଆଶା କର୍ମୀ, ସ୍ବଚ୍ଛସାଥୀ, ପୂର୍ବତନ କାଉନ୍ସିଲରଙ୍କୁ ସମ୍ବର୍ଦ୍ଧନା ଦିଆଯାଇଥିଲା। ମିଶନ ଶକ୍ତି ଅଧିକାରୀ ସୁଶାନ୍ତ ମହାପାତ୍ରଙ୍କ ନେତୃତ୍ୱରେ ସୁଭଦ୍ରା ନାରୀଶକ୍ତି ଆଞ୍ଚଳିକ ମହାସଂଘ ଚେୟାରମ୍ୟାନ ଅଙ୍ଗୁରବାଳା ଦାସ, କଳ୍ପନା ଦାଶ, ନାରୀଶକ୍ତି ମହାସଂଘ ସମ୍ପାଦିକା କଳ୍ପନା ନନ୍ଦ, ଲକ୍ଷ୍ମୀ ନାରାୟଣ ଆଞ୍ଚଳିକ ମହାସଂଘର ସଦସ୍ୟମାନେ କାମନାକାଳୀ ମନ୍ଦିର ପଡିଆରେ ଏକାଠି ହୋଇଥିଲେ। ସାମାଜିକ ଦୂରତା ରଖି କରୋନା ଯୋଦ୍ଧାଙ୍କୁ ପୁଷ୍ପଗୁଚ୍ଛ, ଉତ୍ତରୀୟ ପ୍ରଦାନ କରାଯାଇଥିଲା। ଏହାଦ୍ୱାରା କରୋନା ଲଢ଼େଇ ଲାଗି ମନୋବଳ ବୃଦ୍ଧି ପାଇବ ବୋଲି ମିଶନ ଶକ୍ତି ଅଧିକାରୀ କହିଛନ୍ତି।