ନୂଆଦିଲ୍ଲୀ,୧୯।୧୦: ଭାରତୀୟ ରେଳ ବିଭାଗ ପକ୍ଷରୁ ଯାତ୍ରୀଙ୍କ ସୁବିଧା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ତେବେ ସମୟାନୁବର୍ତ୍ତିତାରେ ଏହା ପଛୁଆ ରହିଥିବା ସୂଚନା ଅଧିକାର ଆଇନ (ଆର୍ଟିଆଇ) ଅନ୍ତର୍ଗତ ମିଳିଥିବା ଏକ ରିପୋର୍ଟରୁ ଜଣାପଡ଼ିଛି। ପାସେଞ୍ଜର ଟ୍ରେନ୍ ଗୁଡ଼ିକ ମଧ୍ୟରୁ ୩୩ ପ୍ରତିଶତ ଏବଂ ମାଲବାହୀ ଟ୍ରେନ୍ ଗୁଡ଼ିକ ମଧ୍ୟରୁ ୩୧ ପ୍ରତିଶତ ସମୟାନୁବର୍ତ୍ତିତାରେ ପଛୁଆ ରହିଛନ୍ତି। ମଧ୍ୟପ୍ରଦେଶ ନିମଚ ଜିଲାର ଆର୍ଟିଆଇ କାର୍ଯ୍ୟକର୍ତ୍ତା ଚନ୍ଦ୍ରଶେଖର ଗୌଡ଼ ଭାରତୀୟ ରେଳର ସମୟାନୁବର୍ତ୍ତିତା ନେଇ ରେଳ ମନ୍ତ୍ରଣାଳଠାରୁ ରିପୋର୍ଟ ପାଇଁ ଆବେଦନ କରିଥିଲେ। ମନ୍ତ୍ରଣାଳ ପକ୍ଷରୁ ପ୍ରଦାନ କରାଯାଇଥିବା ରିପୋର୍ଟରେ ଦର୍ଶାଯାଇଛି ଯେ, ଏକ୍ସପ୍ରେସ୍, ମାଲବାହୀ ଟ୍ରେନ୍, ପାସେଞ୍ଜର, ରାଜଧାନୀ, ଶତାବ୍ଦୀ, ଗରିବରଥ ଆଦି କୌଣସି ଟ୍ରେନ୍ ସମୟାନୁବର୍ତ୍ତିତାକୁ ମାନୁ ନାହାଁନ୍ତି। ୨୦୧୬-୧୭ରେ ମାଲବାହୀ-ପାସେଞ୍ଜର ଟ୍ରେନ୍ ମଧ୍ୟରୁ ୭୬.୫୩ ପ୍ରତିଶତ ଠିକ୍ ସମୟରେ ଯିବା ଆସିବା କରିଥିବାବେଳେ ୨୦୧୭-୧୮ରେ ୭୨.୬୬ ପ୍ରତିଶତ ଏବଂ ୨୦୧୮-୧୯ରେ ୬୭.୫ ପ୍ରତିଶତ ଟ୍ରେନ୍ର ଯିବା ଆସିବା ସମୟ ଠିକ୍ ଥିଲା ବୋଲି ରିପୋର୍ଟରେ ପ୍ରକାଶ ପାଇଛି।