ଅନୁଗୋଳ ଅଫିସ, ୨୪।୪ – ବହୁ ପୂର୍ବରୁ ସ୍ଥିର ହୋଇଥିଲା ବିବାହ। ତିଥି ଅନୁଯାୟୀ ତିନି ଦିନ ପରେ ପଡ଼ିଥାନ୍ତା ହସ୍ତଗଣ୍ଠି। ଏଥିପାଇଁ ଛୁଟି ମଧ୍ୟ ମିଳିସାରିଥିଲା ପୋଲିସ ବିଭାଗରୁ। ହେଲେ କର୍ତ୍ତବ୍ୟକୁ ଗୁରୁତ୍ୱ ଦେଇ ବିବାହ ସ୍ଥଗିତ କରିଦେଲେ ଅନୁଗୋଳ ଜିଲା ଆଠମଲ୍ଲିକ ଥାନାର ଲେଡି ଏସ୍ଆଇ ଦେବଯାନୀ ଛତର। ତାଙ୍କର ଏପରି ନିଷ୍ପତ୍ତିକୁ ଉଚ୍ଚ ପ୍ରଶଂସା କରିଛନ୍ତି ପୋଲିସ ଡିଜି ଅଭୟ। ନିଜ ଟୁଇଟର ହ୍ୟାଣ୍ଡେଲରେ ଡିଜିପି ଏହି କରୋନା ଯୋଦ୍ଧାଙ୍କ ସମ୍ପର୍କରେ ତଥ୍ୟ ରଖିବା ପରେ ଦେବଯାନୀଙ୍କ ନିକଟକୁ ଛୁଟୁଛି ଶୁଭେଚ୍ଛାର ସୁଅ। ଦେବଯାନୀ କହିଛନ୍ତି, ଏ ସମୟ ନୂଆ ସଂସାର କରିବାର ନୁହେଁ ବରଂ କରୋନାରୁ ଲୋକଙ୍କୁ ସୁରକ୍ଷା ଦେବା ତାଙ୍କ ପାଇଁ ବଡ଼ ଆହ୍ବାନ।
ବରଗଡ଼ ଜିଲା ସୋହେଲାର ଦେବଯାନୀ ୨୦୧୭ରେ ପୋଲିସ ବିଭାଗରେ ଯୋଗ ଦେଇଥିଲେ। କିଛିଦିନ ପୂର୍ବରୁ ତାଙ୍କର ବିବାହ କଟକ ସୂତାହାଟର ପ୍ରଭାତ ନାୟକଙ୍କ ସହ ସ୍ଥିର ହୋଇଥିଲା। ପ୍ରଭାତ ଆନ୍ଧ୍ରପ୍ରଦେଶର ଏକ ବ୍ୟାଙ୍କରେ ପିଓ ଭାବେ କାର୍ଯ୍ୟ କରୁଛନ୍ତି। ୨୭କୁ ତାରିଖ ଧାର୍ଯ୍ୟ ହୋଇଥିବାରୁ ଉଭୟ ପରିବାର ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଥିଲା। କିନ୍ତୁ କରୋନା ଯୋଦ୍ଧା ସାଜିଥିବା ଦେବଯାନୀ ଏପରି ପରିସ୍ଥିତିରେ ବିବାହ ଅପେକ୍ଷା କର୍ତ୍ତବ୍ୟ କରିବେ ବୋଲି ପରିବାରକୁ ଜଣାଇ ଦେଇଥିଲେ। ଛୁଟି ଆବେଦନ ଗ୍ରହଣ କରିଥିବା ଅନୁଗୋଳ ଏସ୍ପି ଜଗମୋହନ ମୀନାଙ୍କୁ ମଧ୍ୟ ଦେବଯାନୀ କାର୍ଯ୍ୟ ଜାରିରଖିବେ ବୋଲି ଅବଗତ କରିଥିଲେ। ତାଙ୍କ ନିଷ୍ପତ୍ତିକୁ ସମ୍ମାନ ଜଣାଇ ଉଭୟ ପରିବାର ତିଥି ଘୁଞ୍ଚାଇ ଦେଇଥିଲେ। ସେହିପରି ଏସ୍ପି ମୀନା ଦେବଯାନୀଙ୍କ ସମ୍ପର୍କରେ ଅନୁଗୋଳ ଗସ୍ତରେ ଆସିଥିବା ପୋଲିସ ଡିଜିଙ୍କୁ ଜଣାଇବା ପରେ ଡିଜି ତାଙ୍କ ଟୁଇଟର୍ ହ୍ୟାଣ୍ଡେଲରେ ଏ ନେଇ ଦେବଯାନୀଙ୍କୁ ବେଶ୍ ପ୍ରଶଂସା କରିଛନ୍ତି।