କର୍ଲାମୁଣ୍ଡା, ୨।୪ (ଡି.ଏନ.ଏ)- କରୋନାକୁ ମହାମାରି ଘୋଷଣା ହେବା ପରେ ସରକାର ବାର୍ଦ୍ଧକ୍ୟ, ବିଧବା, ମଧୁବାବୁ ପେନସନ ଯୋଜନାରେ ଭତ୍ତା ପାଉଥିବା ହିତାଧିକାରୀମାନଙ୍କୁ ୪ ମାସର ଟଙ୍କା ଆଗୁଆ ଦେବାକୁ କଡା ନିର୍ଦ୍ଦେଶ ଦେଇଛନ୍ତି। ହେଲେ ତାହାର ବ୍ୟତିକ୍ରମ ଦେଖିବାକୁ ମିଳିଛି କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ବୋରପଦର ପଞ୍ଚାୟତରେ। ଏହି ବ୍ଲକରେ ଅନ୍ୟାନ୍ୟ ପଞ୍ଚାୟତରେ ଏପ୍ରିଲ, ମେ, ଜୁନ, ଜୁଲାଇର ଭତ୍ତା ପ୍ରଦାନ କରାଯାଇ ସାରିଛି। ହେଲେ ବୋରପଦର ପଞ୍ଚାୟତର ପାଲେପଡାର ପ୍ରାୟ ୧୦ ଜଣ ବ୍ୟକ୍ତିଙ୍କୁ ଭତ୍ତା ଟଙ୍କା ଦିଆ ଯାଇନଥିବା ଅଭିଯୋଗ ହେଉଛି । ଏ ନେଇ ବ୍ଲକ ସମାଜ ସୁରକ୍ଷା ସଂପ୍ରସାରଣ ଅଧିକାରୀ (ବିଏସଏସଇଓ) ସସ୍ମିତା ପଟେଲଙ୍କୁ ପଚାରିବାରୁ ପଞ୍ଚାୟତର ପିଇଓଙ୍କୁ ଟଙ୍କା ଦିଆଯାଇଛି। ତେବେ ସେ କାହିଁକି ବାଣ୍ଟି ନାହାନ୍ତି ତାଙ୍କ ଫୋନ ଲାଗୁ ନ ଥିବାରୁ ଜଣାପଡୁ ନାହିଁ ବୋଲି ପଟେଲ କହିଛନ୍ତି । ଅନ୍ୟପଟେ ସରପଞ୍ଚ ମାଧବ ସାହୁଙ୍କୁ ପଚାରିବାରୁ ସେ ଅଭିଯୋଗ ପାଇବା ପରେ ପିଇଓଙ୍କୁ ଫୋନ୍ କରିଥିଲେ। ତାଙ୍କ ମୋବାଇଲ ସୁଇଚ୍ ଅଫ୍ ଅଛି। ଏଣୁ କିଛି କରାଯାଇ ପାରୁନାହିଁ ବୋଲି କହିଛନ୍ତି।