ବାହାନଗା,୨୪।୭(ଡି.ଏନ.ଏ.)-ଖନ୍ତାପଡ଼ା ଥାନା ଅଧୀନସ୍ଥ ରେମୁଣା ବ୍ଲକର ଶ୍ରୀଜଙ୍ଗ ଗ୍ରାମର ସରକାରୀ ଗୋଚର ଓ ଆଡ଼ିବନ୍ଧକୁ ପ୍ରଭାବଶାଳୀ ଲୋକମାନେ ଜବରଦସ୍ତ ଅବରୋଧ କରି ରଖିଥିବାରୁ ଗ୍ରାମବାସୀ ଏହାର ପ୍ରତିବାଦ କରିଛନ୍ତି। ଗ୍ରାମବାସୀ ମଙ୍ଗଳବାର ଅବରୋଧ ହଟାଇବା ଦାବିରେ ଗ୍ରାମ ରାସ୍ତା ଓ ବାଲେଶ୍ୱରରୁ ବାସୁଦେବପୁରକୁ ସଂଯୋଗ କରୁଥିବା ସଲ୍ଟ ରୋଡ଼କୁ ଦୀର୍ଘ ୪ଘଣ୍ଟା ଧରି ଅବରୋଧ କରିଥିଲେ। ରେମୁଣା ତହସିଲଦାର ଓ ଖନ୍ତାପଡ଼ା ଥାନା ପୋଲିସ ପହଞ୍ଚତ୍ ଲୋକମାନଙ୍କୁ ପ୍ରତିଶ୍ରୁତି ଦେବା ପରେ ରାସ୍ତା ଅବରୋଧ ହଟିଥିଲା।
ଗ୍ରାମର ଥିବା କିମ୍ବଦନ୍ତୀ ପୋଖରୀଆଡ଼ି ସମେତ ଗୋଚର ଜମି ୨୨ ଏକର ଥିଲା। ତେବେ ଏହି ଜମି ମଧ୍ୟରୁ ଏବେ ୯ଏକର ଜମି ରହିଥିବା ବେଳେ ଅବଶିଷ୍ଟ ଜମିକୁ ଘରବାଡ଼ି, ଜମି ଥିବା ଲୋକମାନେ ଏବେ ଅବରୋଧ କରି ନିଜ ଅକ୍ତିଆରକୁ ନେଇଯାଇଛନ୍ତି। ଫଳରେ ଗ୍ରାମର ଗୋର ଚରିବା ପାଇଁ ଆଉ ସ୍ଥାନ ନାହିଁ। ଯେଉଁଥିପାଇଁ ଗ୍ରାମବାସୀ ମଙ୍ଗଳବାର ପ୍ରଥମେ ଗ୍ରାମର ଥିବା ସ୍ବାଧୀନତା ସଂଗ୍ରାମୀ ସତ୍ୟାଗ୍ରହୀ ସ୍ମୃତିସ୍ତମ୍ଭ ନିକଟସ୍ଥ ଗ୍ରାମକୁ ପ୍ରବେଶ ରାସ୍ତାକୁ ପୂର୍ବାହ୍ନ ୯ଟାରୁ ୧୨ଟା ପର୍ଯ୍ୟନ୍ତ ଦୀର୍ଘ ୩ଘଣ୍ଟା କାଳ ଅବରୋଧ କରିଥିଲେ। ପରେ ଦିନ ୧୨ଟାରୁ ୧ଟା ପର୍ଯ୍ୟନ୍ତ ବାଲେଶ୍ୱର-ବାସୁଦେବପୁରକୁ ସଂଯୋଗ କରୁଥିବା ସଲ୍ଟ ରୋଡ଼କୁ ଦୀର୍ଘ ୧ ଘଣ୍ଟା କାଳ ଅବରୋଧ କରିଥିଲେ। ଘଟଣାସ୍ଥଳକୁ ରେମୁଣା ତହସିଲଦାର ସଞ୍ଜୟ ରାଉତଙ୍କ ସମେତ ଆର୍ଆଇ ଓ ଖନ୍ତାପଡ଼ା ଥାନା ପୋଲିସ୍, ଶ୍ରୀଜଙ୍ଗ ପଞ୍ଚାୟତ ସରପଞ୍ଚ କାର୍ତ୍ତିକେଶ୍ୱର ବାରିକ୍ ପହଞ୍ଚତ୍ ବୁଝାଶୁଝା କରିବା ସହିତ ଅବରୋଧକାରୀଙ୍କ ନାମରେ ମାମଲା ରୁଜୁ କରାଯିବା ସହିତ ନୋଟିସ୍ ପରେ ଅବରୋଧ ତୁରନ୍ତ ହଟାଯିବ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ରାସ୍ତା ଅବରୋଧ ହଟିଥିଲା। ଏହି ଅବରୋଧରେ ଗ୍ରାମର ସନିଆ ମଲ୍ଲିକ, ବିକର୍ତ୍ତନ ମଲ୍ଲିକ, ନାରଣ ମଲ୍ଲିକ, ଘନଶ୍ୟାମ ମଲ୍ଲିକ, ଯଶକେତନ ମଲ୍ଲିକ, କାଶିନାଥ ମଲ୍ଲିକ, ଚିଲ୍ଲ ମଲ୍ଲିକ, ଅଖ ମଲ୍ଲିକ, ଜଳିଆ ମଲ୍ଲିକ ପ୍ରମୁଖଙ୍କ ନେତୃତ୍ୱରେ ଗ୍ରାମବାସ ରାସ୍ତା ଅବରୋଧ ହୋଇଥିଲା।