ଭୁବନେଶ୍ୱର,୨୦।୧(ବ୍ୟୁରୋ): ନିଜକୁ କଟକ ଏସ୍ସିବି ମେଡିକାଲର ଡାକ୍ତର କହି କେତେଜଣଙ୍କୁ ସରକାରୀ ଜମି ବିିକ୍ରି କରିଥିଲେ। ସେମାନେ ଠକେଇର ଶିକାର ହୋଇଥିବା ଜାଣିବା ପରେ ଖଣ୍ଡଗିରି ଥାନାରେ ଅଭିଯୋଗ କରିଥିଲେ। ପୋଲିସ ରବିବାର ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ଜଗତସିଂହପୁର ବାଲିକୁଦାର ସାରଦା ପ୍ରସାଦ ମହାନ୍ତି(୪୨)। ସେ ସଁାପୁରରେ ରୁହନ୍ତି। ମିଳିଥିବା ସୂଚନା ଅନୁଯାୟୀ, ସାରଦା କଟକ ଏସ୍ସିବିରେ ପାରାମେଡିକାଲ ଓ୍ବାର୍କରଭାବେ କାମ କରନ୍ତି। ସେ ସ୍ଥାନୀୟ ଲୋକଙ୍କୁ ଏସ୍ସିବି ମେଡିକାଲରେ ଡାକ୍ତର ଥିବା କହୁଥିଲେ। ଏପରି କି ସେ ପଣ୍ଡାକୁଦିଆ ଅଞ୍ଚଳରେ ଥିବା କିଛି ସରକାରୀ ଜାଗାକୁ ମାଡ଼ିବସିଥିଲେ। ଏହାକୁ ନିଜ ଜାଗା ବୋଲି କହି ବିକ୍ରି ନିମନ୍ତେ କେତେଜଣଙ୍କଠାରୁ ଟଙ୍କା ନେଇଥିଲେ। କିନ୍ତୁ ସେ କବଲା କରି ନ ଥିଲେ। ଜମି ପାଇଁ ଟଙ୍କା ଦେଇଥିବା ବ୍ୟକ୍ତିମାନେ ଉକ୍ତ ଜାଗାରେ ଆଜବେଷ୍ଟସ ଘର କରି ଦେଇଥିଲେ। ଶେଷରେ ବିଡିଏ ପକ୍ଷରୁ ଉକ୍ତ ଘର ଭାଙ୍ଗିବା ପରେ ତାହା ସରକାରୀ ଜାଗା ବୋଲି ସେମାନେ ଜାଣିବାକୁ ପାଇଥିଲେ। ଏନେଇ ସେମାନେ ସାରଦାଙ୍କୁ ଟଙ୍କା ମାଗିଥିଲେ ମଧ୍ୟ ସେ ଧରାଛୁଅଁା ଦେଇ ନ ଥିଲେ। ଶେଷରେ ଠକେଇର ଶିକାର ହୀରାବତୀ ଦାଶ, ସୁଜାତା ଦାଶ ଏବଂ ଅନ୍ୟଜଣେ ଥାନାରେ ଅଭିଯୋଗ କରିଥିଲେ। ସେମାନଙ୍କଠାରୁ ସାରଦା ୩ଲକ୍ଷ ଟଙ୍କା ନେଇଥିବାବେଳେ ଏକାଧିକ ବ୍ୟକ୍ତିଙ୍କଠାରୁ ପ୍ରାୟ ୩୫ ଲକ୍ଷ ଟଙ୍କା ନେଇଥିବା ପୋଲିସ ତଦନ୍ତରୁ ଜାଣିପାରିଛି।