ପରଜଙ୍ଗ, ୨୬।୧୦(ଡି.ଏନ.ଏ.) – ପରଜଙ୍ଗ ବ୍ଲକ ଆଖୁଆପାଳ ପଞ୍ଚାୟତ ଭେଜିଆ ୪ନଂ. କଲୋନୀ ନିକଟବର୍ତ୍ତୀ ସରକାରୀ ଜମିକୁ ଚଞ୍ଚକତା କରି ପଟ୍ଟା କରାଇ ନେବାକୁ ମସୁଧା କରାଯାଉଥିବା ଅଭିଯୋଗ ହୋଇଛି। ଏ ନେଇ ଗ୍ରାମବାସୀ ଶୁକ୍ରବାର ତହସିଲଦାରଙ୍କ ଦ୍ୱାରସ୍ଥ ହୋଇଛନ୍ତି। ଏଥିରେ ତାଳଚେର ଅଞ୍ଚଳର ୧୨ଜଣ ବ୍ୟକ୍ତିଙ୍କ ସମ୍ପୃକ୍ତି ରହିଥିବା ଅଭିଯୋଗରେ ଉଲ୍ଲେଖ ରହିଛି।
ତାଳଚେର ଅଞ୍ଚଳର ସମ୍ପୃକ୍ତ ବ୍ୟକ୍ତିମାନେ ଉକ୍ତ ଜାଗା ପାଇଁ ଏନ୍କ୍ଲୋଜମେଣ୍ଟ ଦେଇଥିଲେ। ପରେ ୬୪/୧୩ରେ ସିଭିଲ ଅଦାଲତରେ ମାମଲା ଦାଏର କରିଥିଲେ। ଏହାପରେ କୋର୍ଟ ମୋକଦ୍ଦମା ନଂ.୧୪୦୪/୧୯ ଅନୁଯାୟୀ ସେମାନଙ୍କୁ ସରକାରୀ ଜମିର ପଟ୍ଟା ଦେବାକୁ ନିର୍ଦ୍ଦେଶ ଦେଇଥିଲେ। ହେଲେ ସମ୍ପୃକ୍ତ ବ୍ୟକ୍ତିମାନେ ବେଆଇନ ଭାବେ କାଗଜପତ୍ର କରି ଜମିକୁ ହାତେଇବାକୁ ଷଡ଼ଯନ୍ତ୍ର କରୁଥିବା ଜଣାପଡ଼ିବା ପରେ ଏହାକୁ ନେଇ ଅସନ୍ତୋଷ ଦେଖାଦେଇଛି।
ଦଦରାଘାଟି ଜଳସେଚନ ପ୍ରକଳ୍ପ ଦ୍ୱାରା କ୍ଷତିଗ୍ରସ୍ତ ହୋଇଥିଲେ ଭେଜିଆ ଅଞ୍ଚଳର ଶତାଧିକ ପ୍ରଜା। ସେମାନଙ୍କୁ ୧୯୮୧ରେ ବସୁଲେଇ ରାଜସ୍ବ ଗ୍ରାମର କଲୋନୀ ନଂ.୪ରେ ଥଇଥାନ କରାଯାଇଛି। ବିସ୍ଥାପନର ଦୀର୍ଘବର୍ଷ ପରେ ବି ସେମାନେ ମୌଳିକ ସୁବିଧାରୁ ବଞ୍ଚତ୍ତ ହୋଇ ରହିଛନ୍ତି। ଏପରି ସ୍ଥିତିରେ ଗ୍ରାମବାସୀ ବ୍ୟବହାର କରୁଥିବା ସରକାରୀ ଜମିକୁ କେତେଜଣ ବ୍ୟକ୍ତି ପଟ୍ଟା କରାଇନେବାକୁ ଉଦ୍ୟମ କରୁଛନ୍ତି। ତହସିଲ କାର୍ଯ୍ୟାଳୟ ପକ୍ଷରୁ ନୋଟିସ ମରାଯିବା ପରେ ଏହି ଘଟଣା ପଦାକୁ ଆସିଥିଲା। ଏହାର ଉପଯୁକ୍ତ ତଦନ୍ତ କରିବାକୁ ଦିଲୀପ କୁମାର ନାଥ, ନିରାକାର ସିଂ, ଗଙ୍ଗାଧର ପ୍ରଧାନ, ଜିତେନ୍ଦ୍ର ସାହୁ, ଲୋକନାଥ ସିଂ, ଗଙ୍ଗାଧର ପ୍ରଧାନ ପ୍ରମୁଖ ଶତାଧିକ ଗ୍ରାମବାସୀ ଦାବି କରିଛନ୍ତି। ନ୍ୟାୟ ପାଇଁ ସେମାନେ ହାଇକୋର୍ଟକୁ ଯିବେ ବୋଲି କହିଛନ୍ତି।
ଏ ନେଇ ତହସିଲଦାର ଜୟନ୍ତ କୁମାର ଜୟସିଂ କୁହନ୍ତି, ସମ୍ପୃକ୍ତ ବ୍ୟକ୍ତିଙ୍କୁ ସରକାରୀ ଜମିର ମାଲିକାନା ଦେବାକୁ ତଳ କୋର୍ଟ ଆଦେଶ ଦେଇଛନ୍ତି। ହେଲେ ଏହା ସରକାରୀ ସମ୍ପତ୍ତି ହୋଇଥିବାରୁ ତହସିଲ ପକ୍ଷରୁ ଜିଲା କୋର୍ଟରେ ମାମଲା ରୁଜୁ କରାଯିବ। ତହସିଲ ଏବଂ ଗ୍ରାମବାସୀ ଗୋଟିଏ ପକ୍ଷ ରହିବେ। ଆବେଦନକାରୀଙ୍କୁ ଅନ୍ୟ ଏକ ପକ୍ଷ ରଖାଯିବ ବୋଲି ସେ ସୂଚନା ଦେଇଛନ୍ତି।