ପର୍ଲା, ୨୪।୨ (ଡି.ଏନ୍.ଏ.)- ସରକାର ଦିବ୍ୟାଙ୍ଗମାନକୁ ଭତା, ଆବସ ଯୋଜନାରେ ଘର, ସରକାରୀ ପୋରଛାହନ୍ ଆଦି ଯୁଗେଇ ଦେଇ ସମାଜର ମୁଖିଆ ଧାରରେ ସାମିଲ କରୁଛନ୍। ହେଲେ ସରକାରୀ ଅଧ୍କାରୀ, କରମ୍ଚାରୀକର ଅନ୍ଦେଖା ଲାଗି ଅନେକ ଜାଗାରେ ଦିବ୍ୟାଙ୍ଗମାନେ ସରକାରୀ ସୁବିଧା ସୁଯୋଗ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲର ଛଞ୍ଚାଣବାହାଲି ପଁଚେତ୍ ବେହେରାଗୁଡ଼ା ଗଁାରେ।
ସୂଚନା ହିସାବେ ବେହେରାଗୁଡ଼ା ଗଁାର ବିକ୍ରମ ଛତରିଆକଁର ପୁଓ ଗୁଣବନ୍ତ ଛତରିଆ(୧୦)। ସେ ଜନ୍ମୁ ଅଁଧ୍ ଆଏ। ଡାକ୍ତର ତାହାକୁ ଶହେ ପରତିଶତ ଦିବ୍ୟାଙ୍ଗ ପରମାନପତର ବି ଦେଇଛନ୍। ବିକ୍ରମ ପୁଓ ଭିନେ ଭିନେ ସରକାରୀ ଯୋଜନାର ସାହାଯ୍ ପାଏବା ବଲି ଦରକାରୀ କାଗଜପତର ଦେଇ ପଁଚେତ୍ରୁ ବ୍ଲକ ତକ୍ ଆବେଦନ କରିଛନ୍। ଇଆଡ଼େ ଦିବ୍ୟାଙ୍ଗମାନକୁ ଗୁରୁତ୍ ଦେଇ ଭତା, ଆବାସ ଯୋଜନାରେ ଘର, ଅନ୍ତ୍ୟୋଦୟ ଅନ୍ନପୂର୍ଣ୍ଣା ଯୋଜନାରେ ମାସିକ ୩୫ କେ.ଜି. ଚାଉଲ ଆଦି ଯୁଗେଇ ଦେବାର ସରକାରୀ ନିୟମ ରହିଛେ। ହେଲେ ଦୁଖର କଥା ଗୁଣବନ୍ତ ଲେଖେଁ ଝନେ ଜନମ୍ ଅଁଧ୍ ପିଲା ଆଏଜ୍ତକ ସବୁ ପରକାର ସରକାରୀ ସାହାଯ୍ରୁ ବଁଚିତ୍ ହେଇ ରହିଛନ୍। ସେନ୍ତା ଗୁଣବନ୍ତ ଏହେଦେ ନିଜକୁ ଝନେ କଳାକାର ହିସାବେ ଗଢ଼ିଛନ୍। ୫ ବଛର ବଏସ୍ରୁ ସେ ଟିନ୍ ଡବା, ଛାତିରେ ବଜା ବଜାବାର ବଏସିରା କରି ଏହେଦେ ସେ ଝନେ ମୁର୍ଦୁଁଗିଆ ପାଲଟିଯାଇଛନ୍। ଏହେଦେ ସେ ଅଂଚଲରେ ଅନେକ ନାଚ୍ଗୀତ୍ରେ ମୁର୍ଦୁଁଗ୍ ବଜେଇ ଦେଖନ୍ହାରିକଁର ମନ୍ମୁହୁଛନ୍। ଗଲା ନିରବାଚନ ଆଗରୁ ଭିନେ ଭିନେ ପଁଚେତ୍ମାନକେ ପିଠା କାଯ୍କରମ ଜରିଆରେ କଳାକାର ଚିନ୍ହଁଟ କରାଯାଇ କଳାକାରମାନକୁ ଭତା, ସରକାରୀ ପୋରଛାହନ୍ ଯୁଗେଇ ଦିଆଯାଉଛେ। ହେଲେ ଗୁଣବନ୍ତ ଝନେ ଦିବ୍ୟାଙ୍ଗ ଶିଶୁ କଳାକାର ହେଇଥିଲେ ବି ସରକାରୀ ପୋରଛାହନ୍ ପାଏବାରୁ ବଁଚିତ୍ ହେବାରଟା ସମ୍କୁ ଆଶିରିଯ୍ କରିଛେ। ଜିଲା ଆର ବ୍ଲକ ପରଶାସନ ଶହେ ପରତିଶତ ଦିବ୍ୟାଙ୍ଗ ଗୁଣବନ୍ତକଁର ଉପରେ ଦୁରୁଷ୍ଟି ଦେଇ ତାହାକୁ ସବୁପରକାର ସରକାରୀ ଯୋଜନାରେ ସାମିଲ କରବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ଧର୍ମଗଡ଼ ବିଡିଓ ଗୋପାଳ କୃଷ୍ଣ ମିଶ୍ରକୁଁ ପଚ୍ରାଲାରୁ ଇ ବାବ୍ଦେ ମୋର ପାସେ ଖବର ନାଇଁଥାଇ। ବ୍ଲକକେ ଆସି ମୋତେ ଭେଟ୍ଲେ ସବୁପରକାର ସାହାଯ୍ ସହଯୋଗ ଯୁଗେଇ ଦେବାର ବେବସ୍ତା କରମି ବଲି ସେ କହିଥିଲେ।