ଭାପୁର,୧୮ା୬(ଡି.ଏନ୍.ଏ.)-ବର୍ଷସାରା ଠାକୁର ଠାକୁରାଣୀଙ୍କ ପୂଜାନୀତି କରି ଜୀବିକା ନିର୍ବାହ କରୁଥିବା ହଜାର ହଜାର ପୂଜକ ସମାଜ ସମସ୍ତ ସରକାରୀ ଯୋଜନାରୁ ବାଦ୍ ପଡ଼ିଚାଲିଛନ୍ତି। ଏପରିକି ସେମାନଙ୍କ ପିଲାମାନେ ପାଠ ପଢିବା ପାଇଁ ବାସଗୃହ ପ୍ରମାଣପତ୍ର ନ ପାଇ ଅଧାରୁ ପାଠ ଛାଡୁଛନ୍ତି। ଏ ନେଇ ସରକାର କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ସେମାନେ ଆନ୍ଦୋଳନ ପାଇଁ ପ୍ରସ୍ତୁତ ହେଉଛନ୍ତି। ନୟାଗଡ଼ ଜିଲା ଭାପୁର ଓ ଖଣ୍ଡପଡ଼ା ବ୍ଲକର ୮୦ ଖଣ୍ଡ ଗ୍ରାମରେ ରହୁଥିବା ୧୫/୧୮ ହଜାର ପୂଜକ ଜାତିର ଲୋକ ଶିବ ଶକ୍ତି ପୂଜକ ସମାଜ ଗଠନ କରି ସୋମବାର ସଭାପତି ବିକ୍ରମ ମହାପାତ୍ରଙ୍କ ନେତୃତ୍ୱରେ ଏକ ବିରାଟ ପ୍ରସ୍ତୁତି ବୈଠକ କରିଛନ୍ତି। ଏହି ସଭାରେ ୨ ବ୍ଲକର ଶତାଧିକ ବ୍ୟକ୍ତି ଯୋଗ ଦେଇଥିଲେ। ସଭାରେ ଜିଲା ସଭାପତି ଗୌରାଙ୍ଗ ଚରଣ ମହାପାତ୍ର, ସମ୍ପାଦକ ମହେଶ୍ୱର ରଣା, କୋଷାଧ୍ୟକ୍ଷ ହାଡ଼ିବନ୍ଧୁ ମହାପାତ୍ର ଓ ବରିଷ୍ଠ କର୍ମକର୍ତ୍ତା ସୂର୍ଯ୍ୟମଣୀ ରଣା ଯୋଗଦେଇଥିଲେ। ଏହି ବୈଠକରେ ପ୍ରତ୍ୟେକ ପରିବାରଙ୍କ ନାମରେ ୪ ଡିସିମିଲ ଘରଡ଼ିହ ଯୋଗାଇ ଦେବା, ଆବାସ ଯୋଜନାରେ ସେମାନଙ୍କୁ ସାମିଲ କରିବା, ବାସଗୃହ ପ୍ରମାଣପତ୍ର ଯୋଗାଇ ଦେବା ଓ ଭୋଗ ଦଖଲ କରୁଥିବା ଠାକୁର ଓ ଠାକୁରାଣୀଙ୍କ ନାମ ସହ ସେମାନଙ୍କ ନାମ ରଖିବା ନେଇ ଏକ ଦାବିପତ୍ର ଜିଲାପାଳ, ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିଛନ୍ତି। ଏ ନେଇ ଭାପୁର ବ୍ଲକ ବାଇଗୁଣିଆ ପଞ୍ଚାୟତ ଧଳାବନ୍ଧ ଗ୍ରାମଠାରେ ସୋମବାର ଏକ ପ୍ରସ୍ତୁତି ବୈଠକ ଆୟୋଜିତ ହୋଇଥିଲା।
