ସଇଁତଲା, ୧୭।୧ (ଡି.ଏନ୍.ଏ)- ବଲାଙ୍ଗୀର ଜିଲା ସଇଁତଳା ବ୍ଲକ ସଦର ପଁଚେତ୍ ଅଧୀନ କର୍ଲାବାହାଲି ଗାଁ ର ନୀଳ ନାଏକ(୬୦)। ସେ ଝନେ ନିହାତି ଗରିବ୍, ଗାଁ ରେ ଘରଦୁଆର ବଲି କିଛି ନାଇଁ। ବାପ୍ଅଜା ଗାଁ ତରେ ଥିବାର ଜଂଗଲ ପାସେ ଜମିଟିକେ ଘିନିଥିଲେ। ନୀଳ ସେଠାନେ ନଡ଼ାଛପର କୁରିଆଟେ କରି ଅନେକ ବଛର ହେଲା ରହିଆସୁଛନ୍। ଆଏଜ୍ତକ ସେ ଅନେକ ସରକାରୀ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍।
ସୂଚନା ଅନ୍ସାରେ କର୍ଲାବାହାଲି ନୀଳ ନାଏକ। ସେ ବିହାଚୁରା ହେଇଥିଲେ। ହେଲେ ବିହାର ଦିନାକେତେ ଉତାରୁ ମାଏକିନା ଆରପାରକେ ଚାଲିଗଲେ। ସେଦିନ୍ଠାନୁ ନୀଳ ଏକ୍ଟିଆ ଜୀବନ୍ ବିତଉଛନ୍। ଗାଁ ରେ ଘରଦୁଆର ନାଇଁଥିବାର ଲାଗି ନୀଳ ଆଏଜ୍କେ ୨୫ ବଛର ହେଲା ଗାଁ ରୁ ଖଁଡ଼େଦୂରେ ଜଂଗଲ ତରେ ଥିବାର ନିଜର ଜମିରେ ନଡ଼ାଛପର କୁରିଆଟେ କରି ରହି ଆସୁଛନ୍। ହେଲେ ସେ କୁରିଆର ଅବସ୍ତା ଏନ୍ତା ଯେ, କେତେବେଲେ ଧୁକାଗରେଲ, ବରଷାରେ ମାଡ଼ିବସ୍ବା। ସ୍ବଚ୍ଛ ଭାରତ ମିଶନ ଯୋଜନାରେ ନୀଳକଁର ଲାଗି ଗୁଟେ ପାଇଖାନା ତିଆର ହେଇଛେ। ହେଲେ ସେ ପାଇଖାନାକେ ନୀଳ ନିଜର ଭଁଡ଼ାର ଘର ହିସାବେ ବେଭାର କରୁଛନ୍। ପାଇଖାନାରେ ନିଜର ବ୍ୟାଙ୍କ ପାସବୁକ, ରାଶନକାର୍ଡ, ଆଧାରକାର୍ଡ, ଗାଁ ବାସୀ ଦେଇଥିବାର ଚାଉଲଗଉଲ ରଖି ତାଲାଟେ ପକେଇଛନ୍। ସେନ୍ତା ନୀଳ ଫିମାସ ପଁଚେତ୍ରୁ ୫ କେ.ଜି. ଚାଉଲ ପାଉଥିଲାବେଲେ ଆଏଜ୍ତକ ବୁଢ଼ାବୁଢ଼ି ଭତା ଆର ଆବାସ ଯୋଜନାରେ ଘରଖଁଡ଼େ ପାଏବାରୁ ବଁଚିତ୍ ହେଇ ରହିଛନ୍। ଗାଁ ର ବିରଞ୍ଚତ୍ ସର୍ବକଁର କହେବାର ହିସାବେ ମାସ୍କେତେ ତଲେ ନୀଳକଁର ନଁାରେ ଗୁଟେ ପକାଘର ଆସିଥିଲା। ପଁଚେତ୍ର କେତେ ଅଧ୍କାରୀ ଆସି ତାକର କାଗଜପତର କରବାର ସଂଗେ ଘର ମିଲିଛେ ଆକାଉଣ୍ଟରେ ଟଁକା ଜମା ହେଲେ ଘର ତିଆରି କରବ ବଲି କହିଥିଲେ। ହେଲେ ଆଏଜ୍ତକ ସେ ପକାଘରର ଖୋଜଖବର ନଁାଇଁନ। ସେନ୍ତା ଗାଁ ର କପୁର ପୁଟା କହିଛନ୍ ଯେ, ନୀଳ ଜଂଗଲ ତରେ ପୂରା ଅସୁରକ୍ଷିତ ଅବସ୍ତାରେ ରହୁଥିଲାବେଲେ ତାକର ବଲ୍ବଏସ୍ ବି ଖସି ଗଲାନ। ଏନ୍ତାଥି ତାହାକୁ ନିହାତି ଗୁଟେ ପକାଘର ଦରକାର ବଲି କହିଛନ୍। ଗାଁ ର ପିଣ୍ଟୁ ସାହୁ ଦିନାକେତେ ତଲେ ସାଂଗ୍ସାଥି ସଂଗେ ଜଂଗଲକେ ବୁଲି ଯାଇଥିଲାବେଲେ ନୀଳକଁର ଦୁରଦଶା ଦେଖିଥିଲେ। ସେ ତାକର ଫଟୋ, ଘରର ଫଟୋ ଉଠେଇ ସୋସିଆଲ ମିଡିଆରେ ଛାଡ଼ିଥିଲେ ଆର ଥାନୀଅ ଧରିତ୍ରୀ ପରତିନିଧିକୁଁ ଇ ବାବ୍ଦେ ସୂଚନା ଦେଇଥିଲେ। ସେନ୍ତା ନୀଳକୁଁ ମାସିକ୍ ୩୫ କେ.ଜି. ଚାଉଲ ଆର ବୁଢ଼ାବୁଢ଼ି ଭତା ଯୁଗେଇ ଦେବାକେ ସେ ଦାବି କରିଛନ୍। ଇ ବାବ୍ଦେ ଥାନୀଅ ବିଡିଓ ପ୍ରଦୀପ କୁମାର ପଟ୍ଟନାୟକକୁଁ ପଚ୍ରାଲାରୁ ଇ ବାବ୍ଦେ ମୁଇଁ କିଛି କହି ନାଇଁପାରେଁ। କାରନ୍ ଆମକୁ ଗଣମାଧ୍ୟମ ଆଘେ କେହେନ୍ସି ବିଷେରେ କହିବାର ଲାଗି ବାରନ୍ କରାଯାଇଛେ। ଇ ବାବ୍ଦେ ଜିଲାପାଳ କହିପାରବେ ବଲି ସେ କହିଥିଲେ।