ଭୁବନେଶ୍ୱର, ୨୫।୭(ବ୍ୟୁରୋ): ଭୁବନେଶ୍ୱର ସ୍ମାର୍ଟସିଟି ଲିମିଟେଡ (ବିଏସ୍ସିଏଲ) ପକ୍ଷରୁ ଆରମ୍ଭ ହୋଇଥିବା ‘ସୋସିଆଲି ସ୍ମାର୍ଟ ପ୍ରୋଜେକ୍ଟ’କୁ ନେଇ ବୁଧବାର ବୈଠକ ଅନୁଷ୍ଠିତ ହୋଇଯାଇଛି। ଭୁବନେଶ୍ୱର ମହାନଗର ନିଗମ (ବିଏମ୍ସି) ମୁଖ୍ୟ କାର୍ଯ୍ୟାଳୟର ସମ୍ମିଳନୀ କକ୍ଷରେ ଆୟୋଜିତ ବୈଠକରେ ସହରର ଉନ୍ନତୀକରଣ ପାଇଁ ଆବଶ୍ୟକ ବିଭିନ୍ନ କ୍ଷେତ୍ର ଉପରେ ଆଲୋଚନା ହୋଇଥିଲା। ସରକାରଙ୍କ ଦ୍ୱାରା ଲୋକଙ୍କୁ ଯୋଗାଇ ଦିଆଯାଉଥିବା ସମସ୍ତ ଯୋଜନାଗୁଡ଼ିକର ଲାଭ ସେମାନେ କିପରି ଉଠାଇ ପାରିବେ ସେ ବିଷୟରେ ସେମାନେ ଜାଣିବା ଓ ସଚେତନ ହେବା ଆବଶ୍ୟକ ବୋଲି ଉପସ୍ଥିତ ବିଏମ୍ସି ଓ ବିଏସ୍ସିଏଲ ଅଧିକାରୀମାନେ ମତପ୍ରକାଶ କରିଥିଲେ। ବିଏମ୍ସି ଅତିରିକ୍ତ ଆୟୁକ୍ତ ଶ୍ରୀମନ୍ତ ମିଶ୍ର, ବିଏମ୍ସି ଅତିରିକ୍ତ ଆୟୁକ୍ତ ସଂଘମିତ୍ରା ବେହେରା, ବିଏସ୍ସିଏଲ ସାମାଜିକ ପ୍ରକଳ୍ପ ପରିଚାଳକ ଦୀପ୍ତିରାଣୀ ସାହୁ ପ୍ରମୁଖ ଉପସ୍ଥିତ ରହି ଉପରୋକ୍ତ ମତ ଦେଇଥିଲେ। ଏଥିରେ ଅନ୍ୟମାନଙ୍କ ମଧ୍ୟରେ ସୋସିଆଲି ସ୍ମାର୍ଟ ପ୍ରୋଜେକ୍ଟରେ ୨୬ଟି ଓ୍ବାର୍ଡରେ ନିୟୋଜିତ ପ୍ରଗତିସାଥୀ, ଗୋଷ୍ଠୀ ସଙ୍ଗଠକ, ସାନିଟାରୀ ଇନ୍ସପେକ୍ଟର ଓ ଓ୍ବାର୍ଡ ଅଫିସରମାନେ ଉପସ୍ଥିତ ଥିଲେ। ଏହି ଅବସରରେ ଅଧିକାରୀମାନେ ସେମାନଙ୍କ ମତାମତ ଗ୍ରହଣ କରିଥିଲେ। ଉଲ୍ଲେଖଥାଉ କି, ବସ୍ତିବାସିନ୍ଦାମାନଙ୍କୁ ସାମାଜିକ ଭାବେ ଉନ୍ନତି ଓ ବିକଶିତ କରିବା ଲାଗି ବିଏସ୍ସିଏଲ ପକ୍ଷରୁ ବିଭିନ୍ନ କାର୍ଯ୍ୟ ହାତକୁ ନିଆଯାଇଛି। ସେମାନଙ୍କୁ ସମସ୍ତ ବିଷୟରେ ସଚେତନ କରିବା ଉଦ୍ଦେଶ୍ୟରେ ହିଁ ପ୍ରଗତିସାଥୀମାନଙ୍କୁ ନିୟୋଜିତ କରାଯାଇଛି। ବର୍ତ୍ତମାନ ସୁଦ୍ଧା ସେମାନେ ବସ୍ତିରେ ବହୁ ସଚେତନତା ମୂଳକ କାର୍ଯ୍ୟ କରିବା ସହ ଫନୀ ପରେ ଗଛ କାଟିବା ଓ ଉଠାଇବା କାର୍ଯ୍ୟ ମଧ୍ୟ କରିଛନ୍ତି। ଏଥିସହ ଗୋଷ୍ଠୀ ସଙ୍ଗଠକମାନଙ୍କ ସହ ମିଶି ବିଭିନ୍ନ ଅଞ୍ଚଳ ବୁଲି ଲୋକଙ୍କୁ ସ୍ବଚ୍ଛ ଓ ସୁସ୍ଥ ରହିବା ନେଇ ଶିକ୍ଷା ଦେଉଛନ୍ତି। ଏ ନେଇ ସେମାନେ ପଥପ୍ରାନ୍ତ ନାଟକ ମଧ୍ୟ ପରିବେଷଣ କରୁଛନ୍ତି।
