ବ୍ରହ୍ମପୁର ଅଫିସ୍,୧୮ା୬-କମ୍ ଉପସ୍ଥାନ ଦର୍ଶାଇ ଗଞ୍ଜାମ ଜିଲାର ୪୭ ସରକାରୀ ସ୍କୁଲକୁ ଚଳିତ ବର୍ଷ ବନ୍ଦ କରିବାକୁ ନିର୍ଦ୍ଦେଶ ହୋଇଛି । ଏହାକୁ ମାନବ ଅଧିକାର ସୁରକ୍ଷା ମଞ୍ଚ ପକ୍ଷରୁ ତୀବ୍ର ବିରୋଧ କରାଯାଇଛି । ସୋମବାର ମଞ୍ଚ ପକ୍ଷରୁ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଘଣ୍ଟପିଟି ପ୍ରତିବାଦ କରାଯାଇଥିଲା। ମଞ୍ଚ ପକ୍ଷରୁ ଅଭିଯୋଗ ହୋଇଛି, ପ୍ରତି ବର୍ଷ କମ୍ ଉପସ୍ଥାନ ଦର୍ଶାଇ ସରକାରୀ ସ୍କୁଲଗୁଡ଼ିକୁ ବନ୍ଦକରି ଦିଆଯାଉଛି। ଶିକ୍ଷାର ମାନ ବଢ଼ାଇବା ବଦଳରେ ବନ୍ଦ କରିଦେବା ନିନ୍ଦନୀୟ । ଗରିବ ପିଲାମାନେ ଘରୋଇ ସ୍କୁଲଗୁଡ଼ିକରେ ପାଠ ପଢ଼ିପାରୁ ନାହାନ୍ତି ।
ଏଭଳି ସ୍ଥଳେ ସରକାରୀ ସ୍କୁଲ ହିଁ ଏକମାତ୍ର ଭରସା । ଯଦି ଗୋଟିଏ ପରେ ଗୋଟିଏ ସ୍କୁଲକୁ ବନ୍ଦକରି ଦିଆଯିବ, ତେବେ ଗରିବ ପିଲାମାନେ ପଢ଼ିବେ କେଉଁଠି । ସରକାରୀ ଅଧିକାରୀଙ୍କ ପିଲାମାନେ ସରକାରୀ ସ୍କୁଲରେ ପଢ଼ିଲେ ହିଁ ଏହି ସମସ୍ୟା ଦୂର ହୋଇପାରିବ । ଶିକ୍ଷା ଅଧିକାର ଆଇନ୍-୨୦୦୯ର କାର୍ଯ୍ୟକାରିତା, କେ.ସି. ହାଇସ୍କୁଲ, କେ.ସି. ବାଳିକା ଉଚ୍ଚ ବିଦ୍ୟାଳୟ ଏବଂ କେ.ସି. ଟାଉନ୍ ହାଇସ୍କୁଲକୁ ସରକାର ନିଜ ଅଧୀନକୁ ନେବା ଏବଂ ଘରୋଇ ସ୍କୁଲଗୁଡ଼ିକ ପବ୍ଲିକ ସ୍କୁଲ ନ ଲେଖିବାକୁ ମଞ୍ଚ ପକ୍ଷରୁ ଦାବି କରାଯାଇଛି । ପରେ ଏନେଇ ଜିଲା ଶିକ୍ଷା ଅଧିକାରୀ ଡ. ସନାତନ ପଣ୍ଡାଙ୍କ ସହ ଆଲୋଚନା କରାଯାଇଥିଲା । ମଞ୍ଚ ସାଧାରଣ ସମ୍ପାଦକ ମାଗୁଣି ନାହାକ, ଅବନୀ କୁମାର ଗୟା, ମନୋଜ କୁମାର ତରାଇ, ଶ୍ୟାମ ସୁନ୍ଦର ଖାଡ଼ଙ୍ଗା, ଶିବ ସୁନ୍ଦର ରଥ, ମହେଶ୍ୱର ବାଡ଼ତ୍ୟା, ସତ୍ୟନାରାୟଣ ରାଓ ଏବଂ ଲକ୍ଷ୍ମୀନାରାୟଣ ରାଉତ ପ୍ରମୁଖ ଏଥିରେ ଭାଗନେଇଥିଲେ ।