ଅନୁଗୋଳ ଅଫିସ, ୧୩।୮
ସରକାରଙ୍କ ସ୍ପଷ୍ଟ ଗାଇଡ୍ଲାଇନ ଓ ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ଅନୁଗୋଳ ଜିଲାର କେତେକ ଘରୋଇ ବିଦ୍ୟାଳୟ କର୍ତ୍ତୃପକ୍ଷ ଛାତ୍ରୀଛାତ୍ରଙ୍କ ପିଠିରୁ ବସ୍ତାନି ବୋଝ କମ୍ କରୁନାହାନ୍ତି। ଏହାର କୁପ୍ରଭାବ ଶିଶୁମାନଙ୍କ କୋମଳ ଶରୀର ଉପରେ ପଡ଼ୁଥିବାରୁ ଏହାକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ଦେଖାଦେଇଛି। ସରକାର ଓ କୋର୍ଟଙ୍କ ନିର୍ଦ୍ଦେଶର ଅବମାନନା କରାଯାଉଥିଲେ ବି କାହିଁକି ଉକ୍ତ ଘରୋଇ ବିଦ୍ୟାଳୟଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ନାହିଁ ସେ ନେଇ ବୁଦ୍ଧିଜୀବୀ ମହଲରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଘରୋଇ ସ୍କୁଲ ବିଶେଷକରି ଆଇସିଏସ୍ଇ ଓ ସିବିଏସ୍ଇ ପାଠ୍ୟକ୍ରମରେ ପଢ଼ୁଥିବା ପିଲାଙ୍କ ବସ୍ତାନି ବୋଝ ହ୍ରାସ କରିବା ଲାଗି କେନ୍ଦ୍ର ସରକାର ଏକ ବିଜ୍ଞପ୍ତି ଜାରି କରିବା ସହ ଏହାକୁ ପ୍ରତ୍ୟେକ ରାଜ୍ୟ ସରକାର କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଥିଲେ। ରାଜ୍ୟ ସରକାର ଏହା କାର୍ଯ୍ୟକାରୀ କରିବା ଲାଗି ଏକ ଗାଇଡଲାଇନ୍ ପ୍ରସ୍ତୁତ କରି ପ୍ରତ୍ୟେକ ବିଦ୍ୟାଳୟ ପାଳନ କରିବାକୁ ନିର୍ଦ୍ଦେଶ ହୋଇଥିଲେ। ଏପରି କି ପ୍ରତ୍ୟେକ ସ୍କୁଲ କର୍ତ୍ତୃପକ୍ଷଙ୍କୁ ଏ ନେଇ ଜିଲା ଶିକ୍ଷା ଅଧିକାରୀ (ଡିଇଓ)ଙ୍କ ମାଧ୍ୟମରେ ଅବଗତ କରାଯାଇଥିଲା। କିନ୍ତୁ ଜିଲାର ବହୁ ଘରୋଇ ସ୍କୁଲରେ ଏଯାଏ ଛାତ୍ରୀଛାତ୍ରଙ୍କ ବସ୍ତାନି ବୋଝ ହାଲୁକା ହେଉ ନ ଥିବା ଅଭିଯୋଗ ହେଉଛି। ଏ ନେଇ ବୁଦ୍ଧିଜୀବୀମାନେ କ୍ଷୋଭ ପ୍ରକାଶ କରିଛନ୍ତି। ଜିଲା ଶିକ୍ଷା ବିଭାଗ କେବଳ ଚିଠି ଦେଇ ଦେଇ କାର୍ଯ୍ୟସାରି ଦେଇଥିବା ସେମାନେ ଅଭିଯୋଗ କରିଛନ୍ତି। ଅଭିଯୋଗ ସମ୍ପର୍କରେ ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରା କହିଛନ୍ତି, ସମସ୍ତ ସ୍କୁଲକୁ ଗାଇଡ୍ଲାଇନ ବିଷୟରେ ଅବଗତ କରାଯାଇଛି। ଖୁବ୍ଶୀଘ୍ର ସମସ୍ତ ଘରୋଇ ବିଦ୍ୟାଳୟ ମୁଖ୍ୟଙ୍କୁ ଡକାଯାଇ ଜିଲାପାଳଙ୍କ ଅଧ୍ୟକ୍ଷତାରେ ଏକ ବୈଠକ କରାଯିବା ଯୋଜନା ଥିବା ବେହେରା କହିଛନ୍ତି।